చెప్పినట్లు వినే ‘స్మార్ట్’ కారు....ఫుల్లీ కనెక్టెడ్ ఎస్‌యూవీ

Written by : smtv Desk | Tue, May 21, 2019, 05:13 PM

ప్రముఖ కార్ల తయారీ కంపెనీ హ్యుందాయ్ తాజాగా ఎట్టకేలకు తన తొలి సబ్ కాంపాక్ట్ ఎస్‌యూవీ వెన్యూ మోడల్‌ను మార్కెట్‌లోకి తీసుకువచ్చింది. దీని ఎక్స్‌షోరూమ్ ప్రారంభ ధర రూ.6.5 లక్షలుగా ఉంది. భారత్ మార్కెట్‌లోకి వస్తున్న తొలి ఫుల్లీ కనెక్టెడ్ ఎస్‌యూవీ ఇది. మారుతీ వితారా బ్రెజా, టాటా నెక్సన్, ఫోర్డ్ ఎకో స్పోర్ట్, మహీంద్రా 300 వంటి మోడళ్లకు ఇది గట్టి పోటీ ఇచ్చే అవకాశముంది.

‘హ్యుందాయ్ వెన్యూ మోడల్‌ను భారత్ మార్కెట్‌లో లాంచ్ చేయడం సంతోషంగా ఉంది. గ్లోబల్ బ్లూలింక్ కనెక్టెడ్ టెక్నాలజీని ఈ కారులో అమర్చాం’ అని హ్యుందాయ్ మోటార్ ఇండియా సీఈవో, మేనేజింగ్ డైరెక్టర్ ఎస్.ఎస్.కిమ్ తెలిపారు. కంపెనీ గ్లోబల్ వృద్ధి ప్రణాళికలకు భారత్ కేంద్రమని పేర్కొన్నారు.

ఈ కారులో 8 అంగుళాల ఇన్ఫోటైన్‌మెంట్ టచ్‌స్క్రీన్, సెమీ డిజిటల్ ఇన్‌స్ట్రుమెంట్ క్లస్టర్, ఎయిర్ ఫ్యూరిఫయర్, సన్ రూఫ్, రియర్ ఏసీ వెంట్స్, వైర్‌లెస్ చార్జింగ్, క్రూయిజ్ కంట్రోల్ వంటి ఫీచర్లున్నాయి. భద్రత విషయానికి వస్తే.. కారులో ఆరు ఎయిర్ బ్యాగ్స్, హిల్ అసిస్ట్ కంట్రోల్, వెహికల్ స్టెబిలిటీ మేనేజ్‌మెంట్, బ్రేక్ అసిస్ట్ సిస్టమ్ వంటి ప్రత్యేకతలున్నాయి. కారు 1.2 లీటర్ పెట్రోల్, 1.4 లీటర్ డీజిల్ ఇంజిన్ ఆప్షన్లలోఅందుబాటులో ఉంటుంది. ఐదు గేర్లు ఉంటాయి. అలాగే టర్బో పెట్రోల్ ఇంజిన్ ఆప్షన్‌తో మరో వేరియంట్ కూడా ఉంది.

కారులోని బ్లూలింక్ కనెక్టివిటీ టెక్నాలజీతో 33 రకాల సేవలు పొందొచ్చు. వైర్‌లెస్ కనెక్టివిటీ కోసం కారులో వొడాఫోన్ సిమ్ కార్డు ఉంటుంది. దీంతో లైవ్ ట్రాపిక్ అప్‌డేట్స్, లైవ్ నావిగేషన్, స్టోలెన్ వెహికల్ నోటిఫికేషన్, రోడ్ సైడ్ అసిస్ట్, వెహికల్ ట్రాకింగ్, నావిగేషన్ వాయిస్ కంట్రోల్ వంటి సదుపాయాలు పొందొచ్చు. కారు వాయిస్ కంట్రోల్ ఫీచర్‌తో ఎక్కడెక్కడ ఏమున్నాయో చెబుతుంది. డేట్, వెదర్, టైమ్ వంటి అప్‌డేట్స్ ఇస్తుంది.