1982లో మిస్సయ్యి 2019లో సెప్టిక్ ట్యాంక్ లో శవమై తేలింది!!!

1982లో ఓ రైతు భార్య మిస్సయ్యింది. అయితే రెండు రోజుల వరకు ఆమె కనిపించకపోవడంతో ఆ రైతు పోలీసు కంప్లేంట్ ఇచ్చాడు. అలాగే పత్రికా ప్రకటన కూడా వేశాడు. కాని అప్పుడు మిస్సయిన అతని భార్య కొద్ది రోజుల కిందట వారి ఇంటి వెనుక ఉన్న సెప్టిక్ ట్యాంక్ (మరుగుదొడ్డి మడుగు) శుభ్రం చేస్తుండగా శరీర భాగాలు కనిపించాయి. దీంతో హడలిపోయిన వర్కర్లు వెంటనే పోలీసులకు సమాచారం అందించారు. పోలీసులు వాటిని డీఎన్‌ఏ పరీక్షలకు పంపారు. పూర్తి వివరాల ప్రకారం...ఆస్ట్రేలియాలో న్యూ సౌత్ వేల్స్‌లోని కెంప్సేలో డెవిడ్ వెనబుల్స్ భార్య బ్రెండా వెనబుల్స్ 1982లో అకస్మాత్తుగా కనిపించకుండా పోయింది. అప్పటికి ఆమె వయస్సు 48 ఏళ్లు. రెండు రోజులైనా ఆమె ఆచూకీ లభించకపోవడంతో డెవిడ్ పోలీసులకు ఫిర్యాదు చేశాడు. అప్పట్లో ఈ కేసు పలు పత్రికల్లో ప్రచురితమైంది. ‘‘ఉదయం నిద్రలేచిన తర్వాత నా భార్య కనిపించలేదు. ఆమె కోసం అన్నిచోట్లా వెతికాను. బంధువులను కూడా అడిగాను. కానీ ఆమె ఆచూకీ లభించలేదు. ఆ రోజు ఆమె తీవ్రమైన జ్వరంతో ఉంది. డిప్రషన్‌తో బాధపడేది. గతంలో ఎప్పుడూ ఆమె ఇలా చేయలేదు. ఎక్కడికెళ్లినా క్షేమంగా ఉండాలని, త్వరగా ఇంటికి తిరిగి రావాలని కోరుకుంటున్నా’’ అని డెవిడ్ ఆ రోజు పత్రికలకు తెలిపాడు. డెవిడ్, బ్రెండాలకు పిల్లలు లేరు. ఆమె నర్సరీ పిల్లలకు ట్యూషన్లు చెప్పేది. డెవిడ్‌కు అప్పట్లో అక్కడ 500 ఎకరాల పొలం ఉండేది. అక్కడే అతడు పందులను కాసేవాడు. పోలీసులు ఈ కేసును మిస్సింగ్ కేసుగానే పరిగణించారు. హత్య కోణంలో దర్యాప్తు చేయలేదు. స్థానికుల్లో కూడా ఈ జంటపై మంచి అభిప్రాయం ఉండటం కూడా ఈ కారణం. డెవిడ్‌కు ఇప్పుడు 86 ఏళ్లు. అతడు భార్యతో కలిసి జీవించిన ఫార్మ్‌హౌస్‌ను 2014లో 4,67,000 పౌండ్ల(రూ.4.02 కోట్లు)కు విక్రయించి, ఆ ఇంటికి కొద్ది దూరంలోనే 3 లక్షల పౌండ్ల(2.58 కోట్ల)తో మరో బంగ్లాను కొనుగోలు చేసి అందులోనే నివాసం ఉంటున్నాడు. జులై 12న డెవిడ్ పాత ఇల్లు (ఫార్మ్‌హౌస్)లో మెయింటెనన్స్ వర్కర్లు సెప్టిక్ ట్యాంక్‌ను శుభ్రం చేస్తుండగా ఓ మహిళ అస్థికలు భయటపడ్డాయి. దీంతో వర్కర్లు పోలీసులకు సమాచారం అందించారు. అయితే, ఆ ప్రాంతంలో ఇదివరకు కూడా చాలామంది మిస్సయ్యారు. ఈ నేపథ్యంలో పోలీసులు ఆ అస్థికలు డెవిడ్ భార్యవేనని ఖచ్చితంగా చెప్పడం లేదు. కుళ్లిన స్థితిలో ఉండటం వల్ల డీఎన్ఏ‌ పరీక్ష‌తోనే అవి ఎవరివో తెలుసుకోవడం సాధ్యమవుతుందని భావిస్తున్నారు. ఈ ఘటనపై డెవిడ్ స్పందించేందుకు నిరాకరించాడు. మిస్టరీగా మారిన ఈ కేసును పోలీసులు తిరగతోడుతున్నారు. ఇది హత్య? ఆత్మహత్య? లేదా ప్రమాదమా అని తెలుసుకునేందుకు విచారణ వేగవంతం చేస్తున్నారు.