ఇష్టపడి పనిచేస్తున్నప్పుడు ఆదాయాన్ని ఆశించలేం

     Written by : smtv Desk | Fri, Aug 16, 2019, 02:59 PM

ఇష్టపడి పనిచేస్తున్నప్పుడు ఆదాయాన్ని ఆశించలేం

హృదయకాలేయం సినిమాతో ఎంట్రీ ఇచ్చిన బర్నింగ్ స్టార్ సంపూర్ణేష్ బాబు తాజాగా ‘కొబ్బరి మట్ట’ సినిమాతో మళ్ళీ ప్రేక్షకుల ముందుకొచ్చాడు. ఈ చిత్రం ఊహించని స్థాయి విజయాన్ని అందుకుంది. సంపూర్ణేష్ బాబు త్రిపాత్రాభినయం చేసిన ఈ చిత్రం తొలిరోజు మంచి కలెక్షన్లతో సంపూర్ణేష్ బాబు కెరియర్‌లోనే మంచి ఓపెనింగ్స్ రాబట్టింది. బీ, సీ సెంటర్లలోని ప్రేక్షకులు ఈ చిత్రానికి బ్రహ్మరథం పట్టడంతో హౌస్ ఫుల్ కలెక్షన్లు వచ్చాయి. కొబ్బరి మట్ట’ చిత్ర విజయంతో సంపూర్ణేష్ బాబు ఫుల్ ఖుషీలో ఉన్నారు. ఈ సందర్భంగా ఈ చిత్రం విడుదలకు ఎన్ని కష్టాలు పడింది.. మూడున్నర నిమిషాల డైలాగ్‌ను సింగిల్ టేక్‌లో చెప్పడానికి ఎన్ని రోజులు హార్డ్ వర్క్ చేశారో తదితర విషయాలతో పాటు తన రెమ్యూనరేషన్‌పై ఆసక్తికరమైన విషయాలను తెలియజేశారు. ‘డైలాగ్స్ చెప్పడంతో నాకు ఆదర్శం మా గురువు గారు మోహన్ బాబు గారు. ఆయనే డైలాగ్ కింగ్. నేనైతే ఓ చిన్న ప్రయత్నం చేశా. ఇంతకు ముందు 1.30 నిమిషాల డైలాగ్ చెప్పా. బేసిక్ గా నాకు డైలాగ్ చెప్పడం అంటే ఇష్టం అందుకే.. ఆ రికార్డ్‌ని బ్రేక్ చేద్దాం అనుకుని మూడున్నర నిమిషాల డైలాగ్ చెప్పా. ఈ ఆలోచన దర్శకుడు స్టీవెన్ శంకర్ గారిది. కథ పరంగా ఆలోచించి కొబ్బరి మట్టలో మూడున్నర నిమిషాల డైలాగ్ రాశారు. రాజేష్ గారు నాకు ఆ డైలాగ్ రాసి ఇచ్చినప్పుడు నాకు ఏం అర్ధం కాలేదు. అసలు నాకు నోరు తిరగనేలేదు. ఇంచుమించు 15 రోజులు ట్రై చేశా. కాని నా కష్టం ఊరికే పోలేదు. ట్రైలర్‌లో ఆ డైలాగ్ పెట్టినప్పుడు అద్భుతమైన స్పందన వచ్చింది. నామీద నాకు కాన్ఫిడెంట్ పెరిగింది. నేను హీరో అవుతా.. సినిమాల్లోకి వస్తానంటే మా ఇంట్లో వాళ్లకే నమ్మకం కుదర్లేదు. నా తొలి సినిమా ‘హృదయకాలేయం’తో నా కోరిక తీరింది. ఆ సినిమాకి అద్భుమైన స్పందన వచ్చింది. అయితే ఆ సినిమాకి నేను చాలా తక్కువ రెమ్యూనరేషన్ తీసుకున్నా. లక్షల్లో తీసుకోలేదు. నాకు వాళ్లు ఎంత ఇచ్చినా ఎక్కువే అనుకున్నా. ఇష్టపడి పనిచేస్తున్నప్పుడు ఆదాయాన్ని ఆశించలేం. వృత్తి అయినప్పటికీ కమర్షియల్‌గా చూడలేం. నిర్మాత నన్ను నమ్మి చేశాడు కాబట్టి నేను రెమ్యూనరేషన్‌ కోసం చూసుకోలేదు. అయితే ఆర్ధికంగా స్థిరంగా ఉన్నానని చెప్పలేను. ముక్కు ఉన్నన్నాళ్లు జలుపు చేస్తూనే ఉంటుంది. అలాగని ముక్కుని కోసేసుకోలేంగా. ఎక్కడున్నా ఇబ్బందులు ఉంటాయి. ప్రస్తుతానికైతే జీవితం సాఫీగానే సాగుతుంది’ అంటూ చెప్పుకొచ్చారు సంపూర్ణేష్ బాబు. కాగా ‘హృదయకాలేయం’, ‘కొబ్బరి మట్ట’ చిత్రాలతో సంపూ రేంజ్ ఒక్కరోజుకు రెండు నుండి మూడు లక్షలకు ఆయన రేటు పెరిగినట్టు తెలుస్తోంది. ప్రస్తుతం సంపూకి తెలుగులో రెండు సినిమాలు డిస్కషన్స్‌లో ఉండగా.. తమిళ్‌లో ఎంట్రీకి రెడీ అయ్యారు. తమిళ్ చిత్రానికి సంబంధించి చర్చలు జరుగుతున్నట్టు తెలిపారు సంపూర్ణేష్ బాబు.





Untitled Document
Advertisements