ఐటీఆర్ ఫైలింగ్ పూర్తి వివరాలు

పన్ను చెల్లింపుదారులకు ఆగస్ట్ 31న ఆఖరి తేది అని కేంద్రం ఆదేశించిన సంగతి తెలిసిందే. అయితే ఆదాయపు పన్ను శాఖ వెబ్‌సైట్ లేదా థర్డ్ పార్టీ ఐటీ రిటర్న్స్ ఫైలింగ్ వెబ్‌సైట్స్ ద్వారా సులభంగా ఉచితంగానే పన్ను చెల్లించొచ్చు. ఇన్‌కమ్ ట్యాక్స్ ఫైలింగ్‌కు ఏడు ఫామ్స్ ఉంటాయి. ఐటీఆర్ 1, ఐటీఆర్ 2, ఐటీఆర్ 3, ఐటీఆర్ 4, ఐటీఆర్ 5, ఐటీఆర్ 6, ఐటీఆర్ 7 అనేవి వీటి పేర్లు. ఐటీఆర్ 1 (సహజ్)ను రూ.50 లక్షలలోపు ఆదాయం ఉన్నవారు దాఖలు చేయాలి. దాదాపుగా వేతన జీవులందరికీ ఇదే ఫామ్ వర్తిస్తుంది.

ఆన్‌లైన్‌లో ఐటీఆర్ ఇలా దాఖలు చేయాలి::

ఆదాయపు పన్ను శాఖ వెబ్‌సైట్‌కు వెళ్లండి. మీరు తొలిగా అకౌంట్ క్రియేట్ చేసుకోండి. అకౌంట్ క్రియేట్ చేసుకున్న తర్వాత లాగిన్ అవ్వండి. ఫైలింగ్ ఆఫ్ ఇన్‌కమ్ ట్యాక్స్ రిటర్న్‌పై క్లిక్ చేయండి. తర్వాత అసెస్‌మెంట్ ఇయర్‌ను సెలెక్ట్ చేసుకోండి. మీరు రిటర్న్ దాఖలు చేసే ఏడాది తర్వాతి సంవత్సరమే అసెస్‌మెంట్ ఇయర్. ఉదాహరణకు 2018-19 ఆర్థిక సంవత్సరానికి మీరు ఐటీ రిటర్న్ దాఖలు చేస్తున్నారు. అప్పుడు అసెస్‌మెంట్ ఇయర్ 2019-20 అవుతుంది. తర్వాత ఐటీఆర్ ఫామ్ నెంబర్, ఫైలింగ్ టైప్ (ఒరిజినల్/రివైజ్డ్ రిటర్న్ ఎంచుకోండి) సెలెక్ట్ చేసుకోండి. సబ్‌మిషన్ మోడ్‌ సెలెక్ట్ చేయండి. ఇక్కడ ప్రిపెయిర్ అండ్ సబ్‌మిట్ ఆన్‌లైన్ ఎంచుకోవాలి. తర్వాత కంటిన్యూ సెలెక్ట్ చేయండి. మీ ఆదాయానికి సంబంధించిన కొన్ని వివరాలు ఆటోమేటిక్‌గానే ఫిల్ అవుతాయి. మీరు ఉద్యోగం చేస్తూ ఉండి, ఇతర ఆదాయ వనరు లేకపోతే.. మీరు మీ ఇన్వెస్ట్‌మెంట్లు, ఖర్చులను కంపెనీకి తెలియజేసి ఉంటే.. మీరు ఎలాంటి డేటాను ఫిల్ చేయాల్సిన అవసరం లేకపోవచ్చు. కేవలం బ్యాంక్ వివరాలు అందజేస్తే సరిపోతుంది. బ్యాంక్ వివరాలు అందించేందుకు ట్యాక్సెస్ అండ్ వెరిఫికేషన్ ట్యాబ్‌పై క్లిక్ చేయండి. తర్వాత కింద డీ21 బ్యాంక్ అకౌంట్ డీటైల్స్ వద్దకు రండి. వివరాలు ఎంటర్ చేసి, యాడ్‌పై క్లిక్ చేయండి. ఇది కచ్చితంగా చేయాలి. ఇన్‌కమ్ ట్యాక్స్ రిఫండ్‌ మీ అకౌంట్‌కు క్రెడిట్ కావడానికి ఇది ఉపయోగపడుతుంది. కిందకు వచ్చేసి సేవ్ డ్రాఫ్ట్‌పై క్లిక్ చేయండి. తర్వాత జనరల్ ఇన్‌ఫర్మేషన్ దగ్గరి నుంచి ప్రతి ట్యాబ్‌కు వెళ్లి వివరాలను ఒకసారి చెక్ చేసుకోండి. పేరు, అడ్రస్ ఇతర సమాచారం కరెక్ట్‌గా ఉండేలా జాగ్రత్త పడండి. ఇప్పుడు ఇన్‌కమ్ డీటైల్స్ ట్యాబ్‌పై క్లిక్ చేయండి. ఇక్కడ మీ జీతం వివరాలు అన్ని ముందుగానే ఫిల్ అయ్యి ఉంటాయి. ఒకవేళ వివరాలు లేకపోతే కంపెనీ నుంచి ఫామ్ 16ని పొందదండి. ఆదాయ వివరాలు ఎంటర్ చేయండి. ఇప్పుడు బీ5.గ్రాస్ టోటల్ ఇన్‌కమ్ సెక్షన్ వద్దకు వెళ్లండి. ఇక్కడ మీ డడక్షన్ల వివరాలు అన్నీ కరెక్ట్‌గా ఉండాలి. లైఫ్ ఇన్సూరెన్స్ ప్రీమియం, పీపీఎఫ్, ఎన్‌పీఎస్, ఇన్వెస్ట్‌మెంట్స్, హెల్త్ ఇన్సూరెన్స్ ప్రీమియం వంటి వివరాలు ఎంటర్ చేయాలి. అలాగే సీ15.80టీటీఏ ఇంట్రెస్ట్ ఆన్ సేవింగ్స్ బ్యాంక్ అకౌంట్స్ చెక్ చేయడం మరువొద్దు. చివరగా సీ18.టోటల్ డిడక్షన్స్, సీ19.ట్యాక్సబుల్ టోటల్ ఇన్‌కమ్ చెక్ చేసుకోండి. ఇవ్వన్నీ కరెక్ట్‌గా ఉన్నాయని భావిస్తే.. కిందకు వచ్చి సేవ్ డ్రాఫ్ట్‌పై క్లిక్ చేయండి. ఇప్పుడు 80జీ ట్యాబ్‌ను చెక్ చేయాల్సి ఉంది. ఛారిటబుల్ డొనేషన్లు ఏమైనా ఉంటే ఇక్కడ డిక్లేర్ చేయాలి. మళ్లీ ఇంకోసారి అన్ని ట్యాబ్స్ వివరాలు కరెక్ట్‌గా ఉన్నాయో లేదో చూసుకోండి. తర్వాత ట్యాక్సెస్ పెయిడ్ అండ్ వెరిఫికేషన్‌కు వెళ్లండి. కిందకు వచ్చి ఐ వుడ్ లైక్ టు ఇ-వెరిఫై పై క్లిక్ చేయండి. తర్వాత ప్రివ్యూ అండ్ సబ్‌మిట్‌పై క్లిక్ చేయండి. ఇప్పుడు ఓకేపై క్లిక్ చేయండి. ఇప్పుడు ఐటీఆర్ ప్రివ్యూ కనిపిస్తుంది. ఇక్కడ ప్రతి అంశాన్ని జాగ్రత్తగా చదవండి. అన్ని వివరాలు కరెక్ట్‌గా ఉండేటా చూసుకోండి. తర్వాత సబ్‌మిట్‌పై క్లిక్ చేయండి. ఇప్పుడు మీకు పాపప్ మెసేజ్ వస్తుంది. ఇక్కడ ఐటీ రిటర్న్స్‌ ఇ-వెరిఫై చేసుకోవాలి. ఆధార్, ఫోన్ నెంబర్ లింక్ అయ్యి ఉంటే ఆధార్ ఓటీపీ సెలెక్ట్ చేసుకోండి. లేదంటే నెట్ బ్యాంకింగ్ ఎంచుకోండి. తర్వాత కంటిన్యూపై క్లిక్ చేయండి. ఇప్పుడు సబ్‌మిట్ కొట్టేయండి. మీరు ఈ ప్రక్రియను విజయవంతంగా పూర్తి చేసి ఉంటే.. మీకు ఒక కన్ఫర్మేషన్ మెసేజ్ వస్తుంది. ‘మీ రిటర్న్ విజయవంతంగా అప్‌లోడ్ అయ్యింది’ అని ఇందులో ఉంటుంది. మీరు ఒకవేళ ఇ-వెరిఫై చేసుకోకపోతే.. ఐటీ రిటర్న్ ఫైల్ తర్వాత 120 రోజుల్లోగా ఈ పని పూర్తి చేయవచ్చు. ఐటీ ఈ-ఫైలింగ్ అకౌంట్‌తో లాగిన్ అవ్వండి. మై అకౌంట్‌లోని ఇ-వెరిఫై రిటర్న్‌లోని ఇ-వెరిఫై‌పై క్లిక్ చేయండి. ఇక్కడ మీకు నచ్చిన ఆప్షన్ ఎంచుకొని వెరిఫై పూర్తి చేయండి.