లాస్ట్ బాల్ సిక్స్...హంటర్స్ థ్రిల్లింగ్ విక్టరీ

Written by : smtv Desk | Tue, Dec 10, 2019, 11:36 AM

ఖతార్ టీ10లీగ్ సంచనల విజయంతో ప్రారంభమైంది. శనివారం (డిసెంబర్ 7న) ఈ టోర్నీ మొదలైంది. తొలిరోజు పెర్ల్ గ్లాడియేటర్స్-ఫ్లైయింగ్ ఓరిక్స్‌తో మ్యాచ్ మొదలైంది. అయితే అసలు మజా తర్వాతి రోజు ఆదివారం జరిగిన మ్యాచ్‌లో హీట్ స్ట్రోమర్స్-డిసర్ట్ రైడర్స్‌లో నమోదైంది. చివరిబంతికి సిక్సర్ కొట్టిన పాకిస్థాన్ మాజీ కెప్టెన్ సల్మాన్ భట్ జట్టుకు విజయాన్ని అందించాడు. ప్రస్తుతం ఈ వీడియో ఇప్పుడు నెట్‌లో వైరల్‌గా మారింది. మరోవైపు ఈ మ్యాచ్ చివరికంటా ఉత్కంఠభరితంగా జరిగింది. ఈమ్యాచ్‌లో తొలుత బ్యాటింగ్ చేసిన హీట్ స్ట్రోమర్స్ నిర్ణీత 10 ఓవర్లలో ఆరు వికెట్లకు 103 రన్స్ చేసింది. సత్వీర్ సింగ్ (23) టాప్ స్కోరర్‌గా నిలిచాడు. స్కాట్ ఎడ్వర్డ్స్, ఆండ్రీ బెరేంగర్ చెరో 18 రన్స్‌తో ఫర్వాలేదనిపించారు. బౌలర్లలో తామూర్ సజ్జాద్ (2/21) రాణించాడు. ఛేజింగ్‌లో హంటర్స్‌కు అదిరిపోయే ఆరంభం దక్కింది. ఓపెనర్ సల్మాన్ భట్ (27 బంతుల్లో 39) ఒంటిచేత్తో జట్టును గెలిపించాడు. అతనికి హషీమ్ ఆమ్లా (9 బంతుల్లో 17) చక్కని సహకారం అందించాడు. వీరిద్దరూ తొలి మూడు ఓవర్లలోనే 36 పరుగులు బాదారు. అయితే ప్రత్యర్థి బౌలర్ ఒవైస్ అహ్మద్ (3/19) హంటర్స్‌కు కళ్లెం వేయడంతో మ్యాచ్ ఆసక్తికరంగా సాగింది. అయితే ఆఖరి ఓవర్‌లో చివరిబంతికి ఐదు పరుగులు సాధిస్తే హంటర్స్ విజయం సాధిస్తుందనే సమీకరణంగా ఉంది. ఈదశలో ప్రేక్షకులంతా నరాలు తెగే ఉత్కంఠలో మునిగిపోయారు. మరోవైపు విజయం రెండువైపులా దోబూచులాడుతున్న వేళలో సల్మాన్ అద్భుతం చేశాడు. షార్ట్ లెంగ్త్‌లో వేసిన బంతిని సల్మాన్ మిడాన్ దిశగా సిక్సర్‌గా బాదాడు. దీంతో ఆరు వికెట్లతో హంటర్స్ గెలుపొందింది. దీంతో ఆటగాళ్లంతా మైదనానికి చేరుకుని సంబరాలు చేసుకున్నారు. మొత్తంమీద కీలకదశలో భారీ సిక్సర్ బాదిన సల్మాన్ హీరోగా మారాడు. ఇక ఇంటర్నేషనల్ కెరీర్ విషయానికొస్తే 2003లో అరంగేట్రం చేసిన భట్.. 2010లో ఇంగ్లాండ్‌పై చివరి టెస్టు ఆడాడు. అంతకముందు మ్యాచ్ ఫిక్సింగ్‌కు పాల్పడడంతో ఐసీసీ భట్‌పై ఐదేళ్ల నిషేధం విధించిన సంగతి తెలిసిందే. అతనితోపాటు పాక్ మాజీలు మహ్మద్ ఆసిఫ్, మహ్మద్ ఆమిర్‌లపై బ్యాన్ విధించిన సంగతి విదితమే