అంపైర్‌తో గొడవ...టీంఇండియా క్రికెటర్ కు జరిమానా!

మైదానంలో క్రమశిక్షణ తప్పిన భారత టెస్టు జట్టు సీనియర్ ఓపెనర్ మురళీ విజయ్‌కు జరిమానా విధించారు. తమిళనాడులోని దిండిగల్ వేదికగా కర్ణాటక, తమిళనాడు మధ్య రంజీ మ్యాచ్ జరుగుతుండగా.. ఫీల్డ్ అంపైర్‌తో మురళీ విజయ్ దూకుడుగా వ్యవహరించాడు. దీంతో.. అతని మ్యాచ్ ఫీజులో 10 శాతం జరిమానా విధించినట్లు తమిళనాడు టీమ్‌ మేనేజ్‌మెంట్ తెలిపింది. టీమిండియా తరఫున గత ఏడాది డిసెంబరులో ఆఖరిగా మురళీ విజయ్ టెస్టులు ఆడాడు.మ్యాచ్‌లో తమిళనాడు సీనియర్ ఆఫ్ స్పిన్నర్ రవిచంద్రన్ అశ్విన్ బౌలింగ్‌లో కర్ణాటక బ్యాట్స్‌మెన్ పవన్ వికెట్ల ముందు ఎల్బీడబ్ల్యూగా దొరికిపోయాడు. దీంతో.. ఔట్ కోసం తమిళనాడు ఫీల్డర్లతో పాటు అశ్విన్ అప్పీల్ చేయగా.. ఫీల్డ్ అంపైర్ నితిన్ ఆ అప్పీల్‌ని తిరస్కరించాడు. దీంతో.. కోపంతో ఊగిపోయిన మురళీ విజయ్ నోటికి పనిచెప్పాడు. మరోవైపు తమిళనాడు కెప్టెన్ విజయ్ శంకర్‌తో పాటు ఫీల్డర్లు కూడా పిచ్ మధ్యలోకి వచ్చేయగా.. బౌలర్ అశ్విన్‌కి అంపైర్ సర్దిచెప్పే ప్రయత్నం చేశాడు.అశ్విన్‌తో అంపైర్ మాట్లాడుతుండగా.. మురళీ విజయ్ పరుష పదజాలంతో అంపైర్‌ వద్దకి వెళ్లే ప్రయత్నం చేశాడు. కానీ.. స్క్వేర్ లెగ్‌‌లో నిల్చొని ఉన్న మరో ఫీల్డ్ అంపైర్.. మురళీ విజయ్ చేయి పట్టుకుని సర్దిచెప్పేందుకు ట్రై చేశాడు. అయినప్పటికీ.. మురళీ విజయ్ వెనక్కి తగ్గలేదు. దీంతో.. క్రమశిక్షణ తప్పిన మురళీ విజయ్ మ్యాచ్ ఫీజులో 10 శాతం కోత విధించారు. మ్యాచ్‌లో తొలుత బ్యాటింగ్ చేసిన కర్ణాటక జట్టు 336 పరుగులకి ఆలౌటవగా.. ప్రస్తుతం తమిళనాడు టీమ్ బ్యాటింగ్ చేస్తోంది. ఓపెనర్ మురళీ విజయ్ (21 నాటౌట్: 44 బంతుల్లో 1x4) నెమ్మదిగా ఆడుతున్నాడు.భారత జట్టులోకి 2008లో అరంగేట్రం చేసిన మురళీ విజయ్.. అనతికాలంలో ఓపెనర్‌గా మంచి గుర్తింపు పొందాడు. కానీ.. తప్పిదాల్ని దిద్దుకోవడంలో ఆ తర్వాత అలక్ష్యం వహించిన ఈ ఓపెనర్ క్రమంగా టీమిండియాకి దూరమవుతూ వచ్చాడు. గత ఏడాది టెస్టుల్లో ఘోరంగా విఫలమైన ఈ ఓపెనర్ స్థానంలో చోటు దక్కించుకున్న పృథ్వీషా, మయాంక్ అగర్వాల్ శతకాలతో సత్తా నిరూపించుకున్నారు. ముఖ్యంగా.. ఇటీవల మయాంక్ అగర్వాల్ డబుల్ సెంచరీతో టెస్టు జట్టులో ఓపెనర్‌గా తన స్థానాన్ని సుస్థిరం చేసుకున్నాడు. దీంతో.. ఇప్పట్లో మళ్లీ మురళీ విజయ్ టీమిండియాకి ఆడే సూచనలు కనిపించడం లేదు.