టెలిగ్రాం యాప్ ను నిషేధించాలి!

ప్రముఖ సోషల్ మీడియా సంస్థ టెలిగ్రాంలో ఎన్నో అసాంఘిక కార్యకలాపాలు జరుగుతున్నాయని, దీనిపై చర్యలు తీసుకోవాలని ఎప్పట్నుంచో డిమాండ్లు వస్తున్నాయి. కొన్ని కేసుల్లో అయితే కనీసం సమాచారం ఇవ్వడానికి కూడా టెలిగ్రాం అంగీకరించడం లేదు. ప్రపంచవ్యాప్తంగా పలు దేశాల్లో దీనిపై ఇప్పటికే నిషేధం ఉంది. మనదేశంలో కూడా పలు టెలికాం ఆపరేటర్లు ఇప్పటికే టెలిగ్రాం వెబ్ వెర్షన్ ను బ్యాన్ చేశాయి. తాజాగా హీరో నిఖిల్ కూడా ఈ డిమాండ్ కు జత కలిశాడు. అయితే ఇప్పుడు దీనికి సినీ హీరో నిఖిల్ కూడా జత కలిశారు. టెలిగ్రాంను బ్యాన్ చేయడంపై ప్రభుత్వం వెంటనే దృష్టి సారించాలని ఆయన పేర్కొన్నారు. సినిమా పైరసీకి, ఉగ్రవాద కార్యకలాపాలకు టెలిగ్రాం నిలయంగా మారిందన్నారు. ట్వీటర్ లో ఓ అభిమాని అడిగిన ప్రశ్నకు నిఖిల్ పై విధంగా సమాధానమిచ్చారు. దీనిపై వెంటనే హైదరాబాద్ సిటీ పోలీస్ కూడా స్పందించగా.. నిఖిల్ వారికి కృతజ్ఞతలు తెలిపారు. అయితే కేవలం పైరసీ, ఉగ్రవాద కార్యకలాపాలు మాత్రమే కాకుండా ఎన్నో అసాంఘిక కార్యకలాపాలు జరుగుతున్నాయి. టెలిగ్రాంలో అక్రమంగా జరుగుతున్న అసాంఘిక కార్యకలాపాలు ఇవే.. టెలిగ్రాం అనగానే ముందుగా గుర్తొచ్చేది సినిమా పైరసీ. ఎందుకంటే ఏ కొత్త సినిమా విడుదలైనా అదే రోజు మ్యాట్నీ సమయానికి వాటికి సంబంధించిన పైరసీ కాపీలు ఇందులో ప్రత్యక్షమవుతాయి. ఇందులో దీనికి సంబంధించిన కొన్ని వందల చానెల్స్ ఉన్నాయి. ఆన్ లైన్ లో సినిమా పైరసీని అడ్డుకున్నా టెలిగ్రాం పైరసీని అడ్డుకోవడం చాలా కష్టం అవుతోంది. ఈ సమస్య కేవలం తెలుగు సినిమాది మాత్రమే కాదు. తెలుగు, తమిళం, కన్నడ, మలయాళం, హిందీ ఇలా దేశంలోని అన్ని భాషలకు సంబంధించిన కొత్త సినిమాలు అందులో విడుదల అవుతాయి. కాబట్టి ఈ యాప్ ను నిషేధించాలని సినిమా పరిశ్రమ బలంగా కోరుకుంటోంది. టెలిగ్రాం యాప్ లో పోర్న్ కు సంబంధించిన చానెల్స్ కూడా ఎన్నో ఉన్నాయి. భారతదేశంలో పోర్న్ ను నిషేధించాలన్న డిమాండ్ ఎప్పటి నుంచో ఉంది. ప్రభుత్వం ఆ వైపుగా ఎన్నో చర్యలు తీసుకుంటున్నా టెలిగ్రాం యాప్ ద్వారా పెరుగుతున్న పోర్న్ చానెల్స్ కు అడ్డుకట్ట వేయడం కష్టంగా మారింది. అయితే ఇందులో ప్రపంచవ్యాప్తంగా నిషేధం పొందిన చైల్డ్ పోర్న్, రేప్ వీడియోలకు సంబంధించిన చానెల్స్ కూడా ఉండటం బాధాకరం. ఎందుకంటే చైల్డ్ పోర్న్ కారణంగానే దేశంలో బాలికలపై అత్యాచారాలు పెరుగుతున్నాయని ఎన్నో నివేదికలు చెబుతున్నాయి. అ లాగే న్యాయస్థానాలు కూడా ఇవే అభిప్రాయపడుతున్నాయి. టెలిగ్రాం చానెల్ ద్వారా ఎన్నో ఉగ్రవాద కార్యకలాపాలు కూడా జరుగుతున్నాయని వార్తలు వస్తున్నాయి. ఐసిస్ వంటి ఉగ్రవాద సంస్థలు టెలిగ్రాం యాప్ ద్వారా యువతను పెడదోవ పట్టించి రిక్రూట్ చేసుకుంటున్నాయని ఎన్నో ఆరోపణలు ఉన్నాయి. అంతే కాకుండా టెలిగ్రాం ద్వారా హ్యాకింగ్, బెట్టింగ్, నకిలీ పాస్ పోర్టులు తయారు చేయడం వంటి నేరాలు కూడా జరుగుతున్నాయని కొందరు అంటున్నారు. టెలిగ్రాం త్వరలో మరో డార్క్ వెబ్ గా మారుతుందని ఏటీ టీ సైబర్ సెక్యూరిటీ అనే ప్రముఖ భద్రతా సంస్థ తెలిపింది. అయితే టెలిగ్రాం వాదన మాత్రం దీనికి కాస్త భిన్నంగా ఉంది. తమ యాప్ లో ఉన్న అసాంఘిక కార్యకలాపాలకు సంబంధించిన చానెళ్లపై చర్యలు తీసుకుంటున్నామని టెలిగ్రాం చెబుతున్నా.. అటువంటి దాఖలాలు ఏవీ కనిపించడం లేదు. చైల్డ్ పోర్నోగ్రఫీ, టెర్రరిజంకు సంబంధించిన చానెళ్లకు తమ యాప్ లో స్థానం లేదని టెలిగ్రాం చెబుతోంది. సమాచార భద్రత విషయంలో టెలిగ్రాం కట్టుదిట్టమైన జాగ్రత్తలు తీసుకుంటోంది. వాట్సాప్ కంటే కట్టుదిట్టంగా దీని భద్రతా ఏర్పాట్లు ఉన్నాయి. సీక్రెట్ చాట్, మాస్క్ డ్ మొబైల్ నంబర్లు వంటి ఎన్నో ఫీచర్లు ఇందులో ఉన్నాయి. అంతేకాకుండా కొన్ని న్యాయపరమైన అంశాల్లో ప్రభుత్వాలు డేటాను అందించాలని కోరితే టెలిగ్రాం నిర్మొహమాటంగా తిరస్కరిస్తుంది. దీని కారణంగానే కేవలం మనదేశంలోనే కాకుండా ఇతర దేశాల్లో కూడా దీన్ని లాంచ్ చేయాలని డిమాండ్లు వెల్లువెత్తుతున్నాయి. ఇరాన్, రష్యాల్లో దీనిపై ఇప్పటికే నిషేధం కొనసాగుతోంది కూడా. సంఖ్య తక్కువే అయినప్పటికీ మరీ తీసిపారేయదగ్గ స్థాయి తక్కువ మాత్రం కాదు. ప్రపంచవ్యాప్తంగా వాట్సాప్ వినియోగించే వారు 150 కోట్ల మంది కాగా, టెలిగ్రాంను 20 కోట్ల మందికి పైగా వినియోగిస్తున్నారు. మనదేశంలో కూడా టెలిగ్రాం వినియోగదారుల సంఖ్య గణనీయంగానే పెరిగింది. గత డిసెంబర్ లో మన దేశంలో 1.8 కోట్ల మంది టెలిగ్రాం వినియోగదారులు ఉండగా, ఈ సెప్టెంబర్ నాటికి ఆ సంఖ్య 2.9 కోట్లకు చేరింది.