పొలార్డ్‌కి వార్నింగ్

బుధవారం రాత్రి మూడో టీ20 జరగనున్న సందర్భంగా వెస్టిండీస్ కెప్టెన్ కీరన్ పొలార్డ్‌కి ఆ జట్టు కోచ్ ఫిల్ సిమన్స్ వార్నింగ్ ఇచ్చాడు. మూడు టీ20ల సిరీస్‌లో భారత్, వెస్టిండీస్ చెరొక మ్యాచ్‌‌లో గెలవగా.. విజేత నిర్ణయాత్మక ఆఖరి టీ20పై సర్వత్రా ఆసక్తి నెలకొంది. తిరువనంతపురం టీ20 తరహాలో ఫీల్డింగ్ తప్పిదాలు చేస్తే ఊరుకునేది లేదని ఆటగాళ్లని సిమన్స్ హెచ్చరించాడు. తిరువనంతపురం వేదికగా జరిగిన రెండో టీ20 మ్యాచ్‌లో భారత ఆల్‌రౌండర్ శివమ్ దూబే ఇచ్చిన సులువైన క్యాచ్‌ని కీరన్ పొలార్డ్ పేలవంగా చేజార్చాడు. ఆఫ్ స్టంప్‌ లైన్‌పై స్పిన్నర్ వాల్ష్ విసిరిన బంతిని లాంగాన్ దిశగా శివమ్ దూబే సిక్స్‌గా మలిచే ప్రయత్నం చేశాడు. అయితే.. బంతి అతను ఆశించిన విధంగా కనెక్ట్ కాకపోవడంతో.. గాల్లోకి లేచిపోయింది. దీంతో.. బౌండరీ లైన్ వద్ద ఫీల్డింగ్ చేస్తున్న పొలార్డ్ సులువుగా దాన్ని అందుకునేలా కనిపించాడు. కానీ.. ప్లడ్‌ లైట్స్ వెలుగు కంట్లో పడటంతో బంతి గమనంపై అతని అంచనా తప్పింది. దీంతో.. పొలార్డ్ పక్కన పడిన బంతి.. అతడి శరీరాన్ని తాకుతూ పక్కకి వెళ్లింది. సులువైన క్యాచ్‌ని చేజార్చిన తర్వాత పొలార్డ్ ప్లడ్ లైట్స్‌ వైపు వేలు చూపిస్తూ.. లైటింగ్ కంట్లో పడటంతో క్యాచ్ అందుకోలేకపోయానని బౌలర్‌ వాల్ష్‌కి వివరణ ఇచ్చే ప్రయత్నం చేశాడు. మరోవైపు టీమిండియా కూడా మూడు ఫీల్డింగ్ తప్పిదాలకి పాల్పడింది. వాషింగ్టన్ సుందర్, రిషబ్ పంత్ బంతిని అంచనా వేయలేక.. క్యాచ్‌ల్ని చేజార్చగా.. పొలార్డ్ తరహాలో లైటింగ్ కారణంగా మనీశ్ పాండే ఒక క్యాచ్‌ని చేజార్చాడు. టీమిండియా మ్యాచ్ ఓడిపోవడానికి ఈ క్యాచ్‌లు మిస్ కావడం ప్రధాన కారణమని కోహ్లీ స్వయంగా అంగీకరించిన విషయం తెలిసిందే. రెండో టీ20లో మిస్ ఫీల్డింగ్‌పై సిమన్స్ మాట్లాడుతూ ‘క్యాచ్‌ల్ని చేజారిస్తే మ్యాచ్‌లను గెలవలేం. సాధారణంగా క్యాచ్‌లు మిస్‌ చేయగానే ఆటగాళ్లు.. ప్లడ్‌ లైట్స్, మంచు లేదా సరైన పొజిషన్‌లో లేకపోయామని చెప్తుంటారు. కానీ.. ఆ కారణాల్ని నేను ఒప్పుకోను. ఎందుకంటే..? క్యాచ్ మిస్ అయ్యిందంటే అది కచ్చితంగా ఫీల్డర్ తప్పిదమే. పైన చెప్పిన కారణాలు చెప్పనేకూడదు. అంతర్జాతీయ క్రికెటర్‌గా ఉన్న తర్వాత పరిస్థితులకి తగినట్లు ప్రాక్టీస్ చేసి నేర్చుకోవాలి’ అని సూచించాడు.