న్యాయం చేయకపోతే ఆత్మహత్య చేసుకుంటా...ఫిల్మ్ ఛాంబర్ ఎదుట హీరో ఆందోళన!

Written by : smtv Desk | Wed, Dec 11, 2019, 08:01 AM

సినిమా ఇండస్ట్రీలో ఒక ఏడాదిలో భారీ చిత్రాలు ఎన్ని వస్తాయో వాటికి పది రెట్లు చిన్న సినిమాలు కూడా వస్తుంటాయి. ఇలాంటి చిన్న సినిమాలను బతికించడానికి స్వర్గీయ దాసరి నారాయణరావు వంటి పెద్దలు అప్పట్లో ప్రయత్నాలు చేశారు. ప్రస్తుతం ఇండస్ట్రీలో అలాంటి చిన్న సినిమాల గురించి పట్టించుకునే నాథుడే లేడు. ఈ కారణంగా చాలా సినిమాలు స్టూడియోల్లోనే ఆగిపోతున్నాయి. అయితే, ఇప్పుడు మీరు తెలుసుకోబోయే సినిమా పరిస్థితి మరీ దారుణం. లక్షలు ఖర్చుపెట్టి ఒక చిన్న సినిమాను తీస్తే.. అది విడుదల కాకముందే ఎవరో యూట్యూబ్‌లో పెట్టేశారు. ఇది చూసి ఇప్పుడు ఆ చిత్ర హీరో, యూనిట్ గుండెలు బాధుకుంటున్నారు. న్యాయం చేయాలని ఫిలిం ఛాంబర్ వద్ద ఆందోళన చేస్తున్నారు. ఇంతకీ ఆ సినిమా పేరు ‘నానిగాడు’. ‘నానిగాడు’ చిత్ర హీరో దుర్గాప్రసాద్ తాను ఆత్మహత్య చేసుకుంటానని బెదిరిస్తున్నాడు. సినిమా విడుదల కాకముందే యూట్యూబ్‌లో మొత్తం సినిమా ఉందని దుర్గాప్రసాద్ ఆవేదన వ్యక్తం చేస్తున్నారు. ఇప్పటికే యూట్యూబ్‌పై పోలీసులకు ఫిర్యాదు చేశారు. న్యాయం చేయకపోతే రేపు ఫిల్మ్ ఛాంబర్ వద్ద ‘నానిగాడు’ చిత్ర యూనిట్ మొత్తం ఆత్మహత్య చేసుకుంటుందని బెదిరిస్తున్నాడు. మొత్తం 40 లక్షల రూపాయలు అప్పు చేసి ‘నానిగాడు’ సినిమా తీశామని హీరో దుర్గాప్రసాద్ చెప్పాడు. ఎన్నో ఆశలతో తీసిన సినిమా విడుదలకు సిద్ధమవుతోందని ఎంతో సంతోషించామని.. కానీ, సినిమా విడుదల కాకముందే యూట్యూబ్‌లో పెట్టారని తీవ్ర ఆవేదన వ్యక్తం చేశాడు. తమ సినిమాకు సెన్సార్ బోర్డు ‘యు’ సర్టిఫికెట్ కూడా ఇచ్చిందని తెలిపారు. సినిమా విడుదలకు ప్లాన్ చేసుకుంటున్న నేపథ్యంలో యూట్యూబ్‌లో సినిమా మొత్తం పెట్టారని తెలిసి షాక్‌కు గురయ్యామని చెప్పారు. రేపటి లోగా యూట్యూబ్‌లో సినిమాను తొలగించకపోతే ఆత్మహత్య చేసుకుంటామని దుర్గాప్రసాద్ హెచ్చరించాడు.