కోహ్లీ వల్లే శతకాన్ని చేజార్చుకున్న రాహుల్!

     Written by : smtv Desk | Thu, Dec 12, 2019, 04:05 PM

కోహ్లీ వల్లే శతకాన్ని చేజార్చుకున్న రాహుల్!

బుధవారం రాత్రి ముగిసిన ఆఖరి టీ20 మ్యాచ్‌లో భారత కెప్టెన్ విరాట్ కోహ్లీ తన సహజశైలికి భిన్నంగా ఆరంభం నుంచే సిక్సర్లు బాదేశాడు. ఇన్నింగ్స్ 13వ ఓవర్‌లో రిషబ్ పంత్‌ ఔటవగానే నాలుగో స్థానంలో బ్యాటింగ్‌కి వచ్చిన విరాట్ కోహ్లీ కేవలం 29 బంతుల్లోనే 4x4, 7x6 సాయంతో 70 పరుగులు చేశాడు. కోహ్లీ క్రీజులోకి వచ్చిన వెంటనే భారీ షాట్లు ఆడటంతో అప్పటి వరకూ దూకుడుగా ఆడిన కేఎల్ రాహుల్ (91: 56 బంతుల్లో 9x4, 4x6) నెమ్మదించాడు. దానికి కారణం విరాట్ కోహ్లీ ఆదేశాలని మ్యాచ్‌ తర్వాత వెలుగులోకి వచ్చింది.‘ఫస్ట్ బ్యాటింగ్ కావడంతో బోర్డుపై భారీ స్కోరు ఉంచాలని నిర్ణయించుకున్నాం. ఆ మేరకు టీమ్ ప్రణాళికల్లో భాగంగా నాకు కూడా భిన్నంగా ఆడే అవకాశం దక్కింది. సాధారణంగా నేను క్రీజులోకి వచ్చిన వెంటనే భారీ షాట్లు ఆడను. కానీ.. వ్యూహాల్లో భాగంగా తప్పలేదు. క్రీజులోకి రాగానే కేఎల్ రాహుల్‌కి నేను చెప్పింది ఒక్కటే.. చివరి వరకూ నువ్వు సపోర్ట్ ఇవ్వు నేను హిట్టింగ్ చేసేస్తా’ అని విరాట్ కోహ్లీ వెల్లడించాడు. వాల్ష్ బౌలింగ్‌లో మొదటి సిక్స్‌తో బాదుడు మొదలెట్టిన కోహ్లీ ఆ తర్వాత వరుసగా హోల్డర్, విలియమ్స్, పొలార్డ్, కాట్రెల్ బౌలింగ్‌లోనూ భారీ షాట్లు ఆడేశాడు. ముఖ్యంగా.. కీరన్ పొలార్డ్ వేసిన ఇన్నింగ్స్ 19వ ఓవర్‌లో రెండు సిక్సర్లు బాదిన కోహ్లీ.. సిక్స్‌తోనే తన హాఫ్ సెంచరీని పూర్తి చేసుకోవడం విశేషం.వాస్తవానికి వాంఖడే టీ20లో కేఎల్ రాహుల్ సెంచరీ నమోదు చేసేలా కనిపించాడు. కానీ.. కెప్టెన్ కోహ్లీ ఆదేశాల కారణంగా బ్యాటింగ్‌లో దూకుడు తగ్గించిన రాహుల్‌.. చివరి ఓవర్‌ వచ్చేసరికి 91 పరుగులతో నిలిచాడు. ఆ ఓవర్‌లో నాలుగో బంతిని హిట్ చేయబోయిన రాహుల్.. నికోలస్ పూరన్ చేతికి చిక్కాడు. దీంతో.. కెరీర్‌లో మూడో టీ20 శతకాన్ని రాహుల్ చేజార్చుకున్నాడు. 2016లో వెస్టిండీస్‌తో జరిగిన టీ20 మ్యాచ్‌లో 51 బంతుల్లో 110 పరుగులు చేసిన కేఎల్ రాహుల్.. 2018లో ఇంగ్లాండ్‌తో జరిగిన టీ20 మ్యాచ్‌లో 54 బంతుల్లో 101 పరుగులతో నాటౌట్‌గా నిలిచాడు. వాంఖడే టీ20లో అతను 56 బంతులాడినా సెంచరీ మార్క్‌ని అందుకోలేకపోవడం గమనార్హం.









Untitled Document
Advertisements