అతను వదిలే ‘గ్యాస్’కు ఒక్క దోమ కూడా మిగలదు..!

Written by : smtv Desk | Thu, Dec 12, 2019, 05:51 PM

సాధారణంగా మనుషుల కడుపు నుంచి వచ్చే అవపాన వాయువు (పిత్తు) జనాలను ఎలా తరిమిస్తుందో తెలిసిందే. కానీ, ఆ దుర్వాసన దోమల ప్రాణాలను తీస్తాయట. నమ్మబుద్ధి కావడం లేదు కదూ. అయితే, ఉగాండాకు చెందిన జోయె ర్వామిరామ అనే ఈ వ్యక్తి గురించి తెలుసుకోవల్సిందే. కంపాలాలో నివసిస్తున్న జోయె తన కడుపులో గ్యాసును గాల్లోకి వదిలితే చాలు.. ఆరు మీటర్ల పరిధిలో ఉండే దోమలన్నీ చచ్చిపోతాయట. అతడి సామర్థ్యం గురించి తెలుసుకున్న ఓ కంపెనీ.. దోమలను చంపే మందును తయారు చేసేందుకు జోయెను ఉద్యోగంలో చేర్చుకుంది. ఇందులో అతడు పెద్దగా చేయాల్సింది ఏమీ లేదు. బాగా గ్యాస్ పట్టే ఆహారాన్ని తినడం, దాన్ని చాంబర్‌లోకి వదలడం.. ఇదే అతడి పని. అయితే, అతడు వదిలే గ్యాస్‌లో దోమలను చంపేంత శక్తి ఏముందనేది మాత్రం ఇంకా తెలియరాలేదు. ఈ సందర్భంగా జోయె talkofnaija.com అనే వెబ్‌సైట్‌తో మాట్లాడుతూ.. ‘‘నేను సాధారణ ఆహారాన్నే తింటాను. కానీ, నాపై ఏ కీటకం వాలదు. నన్నెప్పుడు దోమలు కుట్టవు. సాధారణ వ్యక్తుల్లో వచ్చే వాసనే నా నుంచి కూడా వస్తుంది. నేను రోజూ స్నానం కూడా చేస్తాను. అందరిలాగానే గ్యాస్ వదులుతా. కానీ, అది చిన్న కీటకలు, దోమలకు మాత్రమే ప్రమాదకరం’’ అని తెలిపాడు. అయితే, అతడి ‘గ్యాస్’తో ప్రయోగాలు చేస్తున్న కంపెనీ పేరును బయటకు వెల్లడించకుండా గోప్యంగా ఉంచాడు. జోయె గురించి ఓ స్థానిక వ్యక్తి మాట్లాడుతూ.. ‘‘జోయె గురించి మా ఊరిలో ప్రతి ఒక్కరికీ తెలుసు. అతడు మా దగ్గర ఉంటే చాలు.. దరిదాపుల్లో దోమలే ఉండవు. క్షణాల్లో మాయమవుతున్నాయి. అయితే, అతడు పిత్తుతున్నాడని మేము ఏ రోజు వేళాకోలం చేయలేదు. అతన్ని మేం ఎంతో గౌరవిస్తాం’’ అని తెలిపాడు. అతడి వల్ల తమ గ్రామంలో డెంగ్యూ, మలేరియా వంటి ప్రాణాంత వ్యాధులు కలిగించే దోమలు చనిపోతున్నాయని, అతడు తమకు ఎంతో మేలు చేస్తున్నాడని గ్రామస్తులు సంతోషం వ్యక్తం చేస్తున్నారు.