280 పైగా సినిమాలు చేసినా గొల్లపూడికి సినిమాలంటే ద్వేషం...ఎందుకో?

విలక్షణ నటుడిగా.. హాస్యనటుడు, ప్రతి నాయకుడు, రచయిత, కవి, జర్నలిస్టు, ప్రసంగీకుడు, వక్తగా, కాలమిస్టుగా తెలుగు సాహితీలోకంలో ప్రత్యేకమైన స్థానాన్ని సంపాదించిన గొల్లపూడి మారుతీరావు మరణం తెలుగు పరిశ్రమకు తీరని లోటు. కవిగా.. కథకుడిగా ఎన్నో పాత్రలకు జీవం పోసి ప్రేక్షకుల మదిలో చిరస్థాయిగా నిలిచారు గొల్లపూడి. అయితే రచయిత నుండి సినిమాలకు వైపుకు ఎలా వచ్చారు? 42 ఏట ఆయన సినిమాల్లోకి వచ్చి సంవత్సరానికి 31 సినిమాలు చేసే బిజీ నటుడు ఎలా అయ్యారో..ప్రముఖ మీడియాకు ఇంటర్వ్యూలో ఆయన మాటల్లోనే.. నన్ను చూడగానే చాలా మందికి గద్దముక్కు పంతులు పాత్ర గుర్తుకువస్తోంది. దీంతో పాటు సింగిల్ పూరీ శర్మ అనే పాత్ర కూడా ఫేమస్. రాఘవేంద్రరావుగారి సుందరకాండ సినిమాలో సింగిల్ పూరీ శర్మ అనే పాత్ర చేశాను. నేను 280 పైగా సినిమాలు చేసినా చూడగానే గుర్తుకువచ్చే పేర్లు రెండే రెండు. అవి గద్దముక్కు పంతులు కాదు.. సింగిల్ పూరీ శర్మ. గద్దముక్కు పంతులు పేరు నాకు నేను రాసుకున్నది కాదు. నా తొలి సినిమా 'ఇంట్లో రామయ్య వీధిలో కృష్ణయ్య' సినిమా పెద్ద సక్సెస్ అయిన తరువాత వరుసగా నాకు అవకాశాలు వచ్చాయి. గద్దముక్కు పంతులు పేరు నా రెండో సినిమాకి వచ్చింది. కోడి రామక్రిష్ణకి ఓ జీనియస్ ఉంది. చాలా మంది దర్శకులకు లేనిది.. ఆయనకి ఉన్నది ఏంటంటే.. అతను పాత్రీకరణ, డైలాగ్‌లను చాలా బాగా ఇంప్రూవ్ చేశారు. ఆయన తొలి సినిమాకు నా దగ్గర ఆర్నెళ్లకు పైగా శిష్యరికం చేశాడు. నేనంటే చాలా గౌరవం, చొరవ. అయితే అతని సినిమాలో నన్ను గద్దముక్కు పంతులుగా చూపించాలని కోరిక కలిగి.. నాతో చెప్పలేక రాఘవ గారితో చెప్పాడట. గురువుగారిని గద్దముక్కు పంతులు అని పేరు పెడితే బాగుంటుందేమో అని అన్నాడట. అది ఆయన నాతో చెప్పడంతో పెట్టండి.. బాగుంటుంది అన్నా.. అలా గద్దముక్కు పంతులు అనే పేరు కోడి రామక్రిష్ణ పెట్టాడు. నాకు సక్సెస్ అయిన చిత్రాలకంటే.. సక్సెస్ కాని చిత్రాల్లో మంచి విషయాలు నాకు బాగా గుర్తుకు వస్తుంటాయి. ఎలా అంటే.. బలహీనమైన కొడుకు మీద తల్లి ప్రేమలాంటిదన్నమాట. నేను రంగుల వల అనే సినిమా చేశా. దాంట్లో మోహన్ బాబు హీరో.. అందులో నాది కింగ్ మేకర్ పాత్ర. చెవుడు కూడా ఉంటుంది. ఈ సినిమాలో కోడి రామక్రిష్ణకు భార్య అయిన ఆమె నాకు కూతురుగా నటించింది. కాని ఆ సినిమా పెద్దగా ఆడలేదు. నేను ఎప్పుడూ సినీ రచయితను అవ్వాలని అనుకోలేదు. అలాగే సినిమా నటుడు కావాలనుకోలేదు. ఇవన్నీ తప్పసరి పరిస్థితుల్లో అలా జరిగిపోయాయి. నా 42 వ ఏట నేనే నటుడినయ్యా. 42వ ఏట సినిమా ఎందుకయ్యా.. పోవయ్యా!! అని నన్ను నేను అనుకునేవాడిని. నేను స్టేజ్ మీద నటించా కాని.. నా దృష్టి నటన వైపు కాదు. 42వ ఏట సినిమాల్లో నటించడం ప్రారంభిస్తే.. 35 ఏళ్ల పాటు 280కి పైగా సినిమాల్లో నటిస్తూనే ఉన్నాను. ఇది నేను ఊహించలేదు. అయితే చాలా మంది మీరు మంచి నటుడే కాదు.. మంచి రచనలు కూడా చేస్తారట కదా అంటారు. అప్పుడు నాకు నవ్వువస్తుంది. నేను రచనలే చేస్తుంటా.. అప్పుడప్పుడూ నటిస్తా అని చెప్పా చాలామందికి. నేను రచయితగా.. నటుడుగా.. ఉద్యోగిగా ఇలా చాలా చేసినప్పటికీ డబ్బుపై ఆశలేదు. డబ్బే ముఖ్యం అనుకునేవాడిని కాదు. నాకు నూరు రూపాయిల జీతం ఉన్నప్పుడు నాకు నూట పాతిక రూపాయిలు వచ్చేవి.. ఎలా అంటే నేను కథలు రాసేవాడిని. ఇలా వెయ్యి రూపాయిల జీతం ఉంటే పదివేలు కథలు, నాటకాల ద్వారా వచ్చేవి. ఎప్పుడు నేను డబ్బుకు వెతుక్కోలేదు. ఎప్పుడూ నేను డబ్బు కోసం శ్రమ పడలేదు. ఎప్పుడూ నాకు డబ్బు లేకుండా పోలేదు. నా జీవితంలో డబ్బు అనేది సమస్య ఎప్పుడూ కాలేదు. అందుకే ఆదాయం కోసం నా ఆర్ట్‌ని కాంప్రమైజ్ చేయలేదు. నా కెరియర్ ప్రారంభంలో నాకు రూ. 10 వచ్చేవి. 1959-61లో రూ. 10 కోసం కూడా కథలు రాశా. నాకు డబ్బు ముఖ్యం కాదు. ఏదీ మన చేతుల్లో ఉండదు. రచయిత, నటన, కథనం, కథ ఇలా ఏదీ నేను అనుకుని చేసింది కాదు. సినిమాల ద్వారా నేను నా రచనలకు చాలా కాలం దూరం కావాల్సి వచ్చింది. ఏదీ మన చేతుల్లో ఉండదు. ఏ మాత్రం వీలున్నా.. నేను నటించకుండా బయట ఉండేందుకే ప్రయత్నించా. నేను మొదటి సినిమా చేస్తున్నప్పుడు ఆహా ఓహో అనుకోలేదు. ఎందుకయ్యా.. ఈ దిక్కుమాలిన షూటింగ్.. రాత్రి 12 గంటలకు షూటింగ్ ఏంటి? అనుకుని ఏడుస్తూ పనిచేశా. నేను గొప్ప నటుడ్ని అని నాకు అనిపించకోవడం వల్ల నాకు పెద్ద నష్టం జరిగేది కాదు.. ఒకవేళ గొప్ప రచయితను కాదని అనిపిస్తే నా ఇగో ఎక్కడో దెబ్బ తినేది. నాకు నటన అంటే ఇష్టం ఉండేది కాదు.. చాలా ద్వేషించే వాడిని. 42వ ఏట సినిమాల్లో నటించడం మొదలు పెడితే.. క్షణం తీరిక ఉండేది కాదు. నాది బిందాస్ లైఫ్. ఆఫీసర్‌గా చక్కని జీవితం గడిపేవాడిని. ఎప్పుడైతే సినిమాల్లో నటించడం మొదలుపెట్టానో.. నేను ఇంటి నుండి బయటకు వచ్చే సరికి ఐదు కార్లు వెయిట్ చేసివి. వాటిని చూసి ఏంటయ్యా.. ఈ కార్లు ఎందుకయ్యా ఇది అని మా మేనేజర్‌ని అనేవాడిని. సార్.. సార్.. ఒకే ఒక్క షాట్. మీరు, అన్నపూర్ణ అక్షింతలు వేసే క్లోజ్ షాట్ ఉండిపోయింది అని బతిమిలాడేవారు. మరోవైపు ఇంకొకడు ఇంకో సీన్‌ కోసం అడిగేవారు. నాకు ఇది నచ్చేది కాదు.. ద్వేషించేవాడిని. సంవత్సరానికి 31 సినిమాలు చేశా.. నమ్ముతారా మీరు. నాకు డబ్బులు ఎలా వచ్చేయో తెలిసేది కాదు.. అన్నీ మా ఆవిడ చూసుకునేది. నేను డబ్బు కావాలని పని చేయలేదు. ఏనాడూ దాని కోసం ఆలోచించలేదు.