ఇంటిని లేదా కట్టడాన్ని సజీవంగా ఉంచాలన్న ఉద్దేశంతో అమెరికాలోని యూనివర్సిటీ ఆఫ్ కొలరాడో బౌల్డర్ సైంటిస్టుల ఈ సజీవ కాంక్రీట్కు రూపమిచ్చారు. మరి, దానికి ‘లైఫ్’ ఎలా ఇచ్చారు? అంటే వాళ్లకు కనిపించిన ఆప్షన్ బ్యాక్టీరియా. అవును, ఇప్పటిదాకా బ్యాక్టీరియాతో తయారు చేసిన సిమెంట్గానీ, కాంక్రీట్గానీ లేదు. ఇదే తొలిసారి. ఇసుక, హైడ్రోజెల్కు సయనోబ్యాక్టీరియాను కలిపారు. వాటిలో బ్యాక్టీరియా కాలనీలు ఏర్పడేలా చేశారు. తర్వాత బ్యాక్టీరియా ఇసుక, జెల్ను కాంక్రీట్లా మార్చేసింది. సయనోబ్యాక్టీరియా సూర్యుడి వెలుతురును తీసుకుంటూ గాల్లోని కార్బన్ డయాక్సైడ్ను పీల్చుకుని కాల్షియం కార్బొనేట్ను తయారు చేసింది. సిమెంట్లో అతి కీలకమైనది పదార్థం ఈ కాల్షియం కార్బొనేటే. అలా తయారైన కాల్షియం కార్బొనేట్, ఇసుక, హైడ్రోజెల్ మధ్య బంధాలను గట్టి పరిచింది. కాంక్రీట్ను తయారు చేసింది. ఒకవేళ గోడలకు ఎప్పుడైనా నెర్రెలు వచ్చినా, తనంతట తానే రిపేర్ చేసుకునే శక్తి దీనికి ఉంటుంది. కారణం, ఇప్పుడు చెప్పినట్టు కాల్షియం కార్బొనేట్ను తయారు చేసుకోవడమే. హైడ్రోజెల్లోని తేమ, పోషకాలను తీసుకుంటూ అవసరమైన కాల్షియం కార్బొనేట్ను ఆ బ్యాక్టీరియా తయారు చేసుకుంటుంది. అందుకే దీన్ని ‘అలైవ్ కాంక్రీట్’ అని సైంటిస్టులు పిలుస్తున్నారు. ప్రస్తుతం ప్రపంచాన్ని వేధిస్తున్న అతిపెద్ద సమస్యల్లో ఒకటి క్లైమేట్ చేంజ్. దానికి ప్రధాన కారణం కార్బన్ డయాక్సైడే. ప్రపంచంలో దాదాపు 6 శాతం కార్బన్ డయాక్సైడ్ వాయువులు సిమెంట్ వల్లే పుడుతున్నాయన్నది సైంటిస్టుల వాదన. సిమెంట్ తయారీ దగ్గర్నుంచి, కాంక్రీట్గా మారేంత వరకు ఆ విష వాయువులు వెలువడుతున్నాయన్నది సైంటిస్టులు చెబుతున్న మాట. అయితే, ఈ అలైవ్ బ్యాక్టీరియా కాంక్రీట్ వల్ల ఆ సమస్య ఉండదని, తనంతట తానే గోడను రిపేర్ చేసుకునే శక్తి దీని సొంతమని అంటున్నారు. ఓ ఇటుకను విరగ్గొట్టి దానికి బ్యాక్టీరియాను కలిపితే అది మళ్లీ కాంక్రీట్ ఇటుకలా మారుతుందని చెబుతున్నారు. మూడు తరాల బ్యాక్టీరియా (బ్యాక్టీరియా కాలనీలకు సంబంధించి) ఒక్కో ఇటుకను 8 ఇటుకలుగా మారుస్తుందంటున్నారు. ఈ అలైవ్ బ్యాక్టీరియా కాంక్రీట్ వల్ల పెద్దగా నష్టాలేమీ లేనప్పటికీ, ఒకే ఒక్క సమస్య మాత్రం ఉందని సైంటిస్టులు చెబుతున్నారు. ఈ బ్యాక్టీరియాతో కాంక్రీట్ తయారు చేయాలంటే ఎప్పుడూ ఆ బ్యాక్టీరియాకు తేమ అవసరం అని చెబుతున్నారు. కాంక్రీట్ బ్లాక్ తయారయ్యాక అది ఎండిపోవాల్సిన అవసరం ఉంటుంది. అయితే, దాని వల్ల ఆ కాంక్రీట్ బ్లాక్లోని బ్యాక్టీరియా బతికే చాన్సెస్ తగ్గిపోతాయి. దాని మీద ఒత్తిడి పెరిగిపోతుంది. దీంతో కాంక్రీట్పై ప్రభావం పడే అవకాశాలుంటాయి. ప్రస్తుతం ఈ లోపాన్ని సరిదిద్దేందుకు ప్రయత్నిస్తున్నామని, కొద్ది రోజుల్లో దానినీ అధిగమిస్తామని చెబుతున్నారు. తేమ ఎక్కువగా లేని ప్రాంతాల్లో ఈ కాంక్రీట్తో ఉపయోగం ఉండదని, అన్ని చోట్లా వాడుకునేలా దానిని డెవలప్ చేస్తామని అన్నారు.