భారతీయ డ్రైవింగ్ లైసెన్స్ తో విదేశాల్లోనూ డ్రైవ్ చేయవచ్చు!...ఏయే దేశాల్లో అంటే!

     Written by : smtv Desk | Mon, Jan 20, 2020, 07:19 PM

భారతీయ డ్రైవింగ్ లైసెన్స్ తో విదేశాల్లోనూ డ్రైవ్ చేయవచ్చు!...ఏయే దేశాల్లో అంటే!

భారతీయ డ్రైవింగ్ లైసెన్స్ ను కేవలం మన దేశంలోనే కాదు కొన్ని విదేశాల్లోనూ ఉపయోగించుకోవచ్చు. సరదాగా హాలిడే ట్రిప్ కు లేదా ఇతర పనులపై విదేశాలకు వెళ్లే వారికి ఈ సమాచారం ఎంతో ఉపయోగపడుతుంది. విదేశాలకు వెళ్లడం చాలా మంది జీవితంలో ఒక గొప్ప అవకాశంగా భావిస్తారు. ప్రపంచాన్ని అన్వేషించాలని, కొత్త అనుభవాలతో జ్ఞాపకాలను నింపుకోవాలని కోరుకుంటారు. ఆయా దేశాల్లో మీకు మీరే సొంతంగా డ్రైవ్ చేసుకుంటూ విహరిస్తే ఆ అనుభూతి ఎలా ఉంటుందో ఒక్కసారి ఊహించుకోండి. అద్భుతంగా ఉంటుంది కదూ. ఈ అవకాశాన్ని యూఎస్ఏ నుంచి యునైటెడ్ కింగ్ డమ్ వరకూ 11 ప్రపంచ దేశాలు భారతీయ పర్యాటకులకు అందిస్తున్నాయి. ఈ దేశాల్లో భారతీయ డ్రైవింగ్ లైసెన్స్ తోనే సులభంగా పర్యటిస్తూ వెలకట్టలేని అనుభవాలను పొందవచ్చు. ఇంతకీ ఆ దేశాలు ఏమిటి? ఇప్పుడు చూద్దాం రండి.

​జెర్మనీ

మీరు జర్మనీకు చిన్న ట్రిప్ కోసం వెళ్లినట్లయితే అక్కడ కారు లేదా ద్విచక్ర వాహనం ఏది నడిపినా మీ డ్రైవింగ్ లైసెన్స్ ను అధికారులు అంగీకరిస్తారు. ఇక్కడ అంతర్జాతీయ డ్రైవింగ్ పర్మిట్ (ఐడిపి) పొందడం తప్పనిసరి కాకపోయినప్పటికీ మీ దగ్గర ఇది ఉంటే స్థానిక అధికారులకు మీ ఆధారాలను పరిశీలించడం సులభం అవుతుంది. అంతర్జాతీయ డ్రైవింగ్ లైసెన్స్ పొందడం మీకు సాధ్యపడకపోతే ఏదైనా జర్మన్ దౌత్య మిషన్ నుంచి మీ డ్రైవింగ్ లైసెన్స్ యొక్క అనువాదం పొందడం మంచిది.

బ్రిటన్

మీ వద్ద చెల్లుబాటులో గల లైసెన్స్ ఉన్నట్లయితే ఇంగ్లాండ్, స్కాట్ లాండ్, వేల్స్ రోడ్లపై ఒక ఏడాది పాటు భారతీయ టూరిస్టులు డ్రైవ్ చేయవచ్చు. ఇక్కడ మీ డ్రైవింగ్ లైసెన్స్ లో పేర్కొన్న వాహన తరగతిలో మాత్రమే డ్రైవ్ చేయడం సాధ్యపడుతుంది.

ఆస్ట్రేలియా

మీరు ఆస్ట్రేలియాలో భారతీయ డ్రైవింగ్ లైసెన్స్ తో స్వేచ్ఛగా తిరుగుతున్నప్పుడు ఉత్తర భూభాగం భారతీయ పర్యాటకులను అలా చేయకుండా నిషేధిస్తుంది. మీ వద్ద చెల్లుబాటు అయ్యే లైసెన్స్ ఉన్నప్పటికీ మీ లైసెన్స్ లో పేర్కొన్న వాహన తరగతులలో మాత్రమే డ్రైవ్ చెయ్యాలి. లైసెన్స్ ఉంది కాబట్టి ఏ వాహనం నచ్చితే ఆ వాహనం నడపడం కుదరదు.

​న్యూజిలాండ్

మీ లైసెన్స్ లో పదాలు ఇంగ్లీషులో ముద్రించి ఉంటే మాత్రం ఇది మీకు ఖచ్చితంగా ఒక శుభవార్త. అవును మీ వద్ద ఉండే భారతీయ లైసెన్స్ ప్రాంతీయ భాషల్లో కాకుండా ఇంగ్లీషు భాషలో ముద్రించి ఉంటే ఈ కివీ భూభాగంలో 12 నెలల పాటూ స్వేచ్ఛగా తిరగవచ్చు. ఒక వేళ మీ లైసెన్స్ ఇంగ్లీషులో లేనట్లయితే మీకు అనువాదం తప్పకుండా అవసరం. న్యూజిలాండ్ ట్రాన్స్ పోర్ట్ ఏజెన్సీ ద్వారా అనువదించిన డాక్యుమెంట్ పై స్టాంప్ వేయించుకుంటే సరిపోతుంది.

​స్విట్జర్లాండ్

ఈ సుందరమైన నగరాన్ని సందర్శించిన వారెవరికైనా కారు లేదా బైక్ పై సరదాగా షికారు చేయాలనిపిస్తుంది. మీకు భారతీయ డ్రైవింగ్ లైసెన్స్ ఉన్నట్లయితే ఆ కోరికను మీరు సులభంగా నెరవేర్చుకోవచ్చు. మీ లైసెన్స్ తో దాదాపు ఏడాది వరకూ స్విస్ రోడ్లపై హాయిగా చక్కర్లు కొట్టవచ్చు.

​దక్షిణాఫ్రికా

మీరు మీ భారతీయ డ్రైవింగ్ లైసెన్స్ తో దక్షిణాఫ్రికాలోని అందమైన పట్టణాలను, గ్రామీణ ప్రాంతాలను అన్వేషించవచ్చు. దీని కోసం మీ లైసెన్స్ తప్పనిసరిగా చెల్లుబాటు అయినదై, ఇంగ్లీషులో ముద్రించి ఉండాలి. అలాగే లైసెన్స్ పై మీ ఫోటోతో పాటు సంతకం కూడా తప్పనిసరి. అయితే మీరు రెంటల్ కంపెనీల ద్వారా కారు అద్దెకు తీసుకోవాలనుకుంటే వారు మీ అంతర్జాతీయ డ్రైవింగ్ పర్మిట్ (ఐడిబి) ను తప్పకుండా అడుగుతారు. కాబట్టి అవసరాన్ని బట్టి దాన్ని కూడా కలిగి ఉంటే మంచిది.

​స్వీడెన్

మీరు స్వీడెన్ కు ప్రయాణమైనప్పుడు మీ డ్రైవింగ్ లైసెన్స్ ఇంగ్లీష్, జెర్మన్, ఫ్రెంచ్, స్వీడిష్, డానిష్, నార్వేజియన్ భాషల్లో లేకపోతే ఆందోళన చెందాల్సిన పని లేదు. దీనికి సులువైన పరిష్కారం మీ డ్రైవింగ్ లైసెన్స్ యొక్క అనువాద కాపీని పైన పేర్కొన్న ఏదైనా భాషల్లో ముద్రించి మీ ఫోటోను దానిపై అతికించి, ఒక ఐడీ ప్రూఫ్ ను జత చేయండి. దీనికి ఆ దేశానికి సంబంధించి ట్రాన్స్ పోర్ట్ ఏజెన్సీ స్టాంప్ కూడా అవసరం.

​సింగపూర్

సింగపూర్ కు వెళ్లినప్పుడు రోడ్లపై మీకు కారులో చక్కర్లు కొట్టాలని అనిపిస్తే ప్రత్యేకంగా లైసెన్స్ అక్కర్లేదు. భారతదేశంలోని అధీకృత సంస్థ జారీ చేసే ఐడిపిను మీరు పొంది ఉంటే సరిపోతుంది. దీని కోసం సంబంధిత ఆర్టీవోను సంప్రదించండి. అలాగే మీ లైసెన్స్ ఇంగ్లీషులో లేకపోతే దానికి అధికారిక అనువాదాన్ని, చెల్లుబాటులో ఉన్న డ్రైవింగ్ లైసెన్స్ ను తీసుకువెళ్లండి.

​హాంగ్ కాంగ్

హాంగ్ కాంగ్ లో విదేశీ టూరిస్టులు ఎంతో సులభంగా డ్రైవ్ చేయవచ్చు. 12 నెలల వరకూ విదేశీ టూరిస్టులకు ఈ దేశంలో ప్రయాణించేందుకు అనుమతి ఉంది. ఇక్కడ మీరు వాహనాన్ని నడపాలనుకుంటే డ్రైవింగ్ లైసెన్స్ లేదా ఐడిపిను తప్పనిసరిగా వెంట తీసుకు వెళ్లాలి.

​మలేషియా

మలేషియాలో డ్రైవ్ చేయాలనుకునే వారి డ్రైవింగ్ లైసెన్స్ ఇంగ్లీషులో ప్రింట్ చేయబడి ఉండాలి. లేకపోతే టూరిస్టులు ఇంగ్లీష్ లేదా మలే భాషలో అనువదించబడిన లైసెన్స్ కాపీని వెంట తీసుకువెళ్లాలి. ఇది తప్పనిసరిగా మలేషియాలో ఉన్న భారత రాయబార కార్యాలయం నుంచి ధృవీకరణ పొందాలి. వీటన్నింటికీ దీనికి బదులుగా ఐడిపిను కూడా వినియోగించవచ్చు.

​యూఎస్ఏ

భారతీయ డ్రైవింగ్ లైసెన్స్ తో మీరు యూఎస్ఏలో కూడా స్వేచ్ఛగా డ్రైవ్ చేయవచ్చు. కాకపోతే ఆయా రాష్ట్రాలకు సంబంధించి డ్రైవింగ్ లైసెన్స్ వినియోగంపై మోటాల్ వెహికల్ విభాగం నుంచి కొంత సమాచారాన్ని సేకరించడం మంచిది. ఎందుకంటే కొన్ని రాష్ట్రాల్లో కార్ రెంటల్ ఏజెన్సీలు పర్యాటకులను డ్రైవింగ్ లైసెన్స్ తో పాటు ఐడిపిను కూడా అడుగుతాయి. కాబట్టి మీ డ్రైవింగ్ లైసెన్స్ ప్రాంతానికి సంబంధించిన ఆర్టీవోను సంప్రదించి మీరు ఐడిపిను పొందవచ్చు.





Untitled Document
Advertisements