'లాయర్ సాబ్' ఈజ్ ఆన్ డ్యూటి...పవన్ ఫొటోలు వైరల్

Written by : smtv Desk | Mon, Jan 20, 2020, 07:47 PM

పవన్ కళ్యాణ్ 26వ సినిమా షూటింగ్ మొదలైంది. బాలీవుడ్‌లో సూపర్ హిట్ అయిన ‘పింక్’ సినిమాను తెలుగులో రీమేక్ చేస్తున్న విషయం తెలిసిందే. అక్కడ అమితాబ్ బచ్చన్ చేసిన లాయర్ పాత్రను ఇక్కడ పవన్ కళ్యాణ్ చేస్తున్నారు. ఈ విషయాన్ని ఆ మధ్య ఓ సినీ కార్యక్రమంలో నిర్మాత దిల్ రాజు ప్రకటించారు.ఈ మధ్య కాలంలో పవన్ కళ్యాణ్ గుబురు గెడ్డంతో కనిపిస్తున్నారు. ఈ లుక్‌లోనే ‘పింక్’ రీమేక్‌లో కనిపించనున్నారని ఇప్పటికే వార్తలు వచ్చాయి. ఆ రూమర్ ఇప్పుడు నిజమైంది. పవన్ కళ్యాణ్ నిజంగానే అదే లుక్‌‌తో ఈ సినిమాలో కనిపించనున్నారు. ఈ మేరకు సోషల్ మీడియాలో వైరల్ అవుతోన్న ఫొటోల ద్వారా తెలుస్తోంది. బ్లాక్ అండ్ బ్లాక్ డ్రెస్‌లో గుబురు గెడ్బంతో ఉన్న పవన్ కళ్యాణ్ నడుచుకుంటూ వెళ్తోన్న లుక్ ప్రస్తుతం సోషల్ మీడియాను షేక్ చేస్తోంది.ప్రస్తుతం రాజకీయాల్లో బిజీగా ఉన్న పవన్ కళ్యాణ్ ఎలాంటి హడావుడి లేకుండా ‘పింక్’ రీమేక్‌ను మొదలుపెట్టేశారు. ఈ ఫొటోలు లీకయ్యేంత వరకు సినిమా షూటింగ్ ప్రారంభమైందనే విషయం ఎవరికీ తెలీదు. షూటింగ్ కూడా రియల్ లొకేషన్‌లో చేస్తున్నట్టు వైరల్ అవుతోన్న ఫొటోలు చూస్తుంటే అర్థమవుతోంది. ఓవైపు పొలిటికల్‌గా యాక్టివ్‌గా ఉంటూనే పవన్ ఈ సినిమా షూటింగ్‌లో పాల్గొననున్నట్టు సమాచారం.‘పింక్’ సినిమాను ఇప్పటికే నిర్మాత బోనీ కపూర్ తమిళంలో రీమేక్ చేశారు. అజిత్ లాయర్ పాత్ర పోషించిన ఈ సినిమాను ‘నేర్కొండ పార్వాయి’గా తమిళంలో తెరకెక్కించారు. అజిత్ కూడా ఈ సినిమాలో గుబురు గెడ్బంతో కనిపించారు. అయితే, తెలుగులో ఈ సినిమాకు ‘లాయర్ సాబ్’ టైటిల్‌ను పరిశీలిస్తున్నట్టు తెలిసింది. ఇప్పటికే ఈ టైటిల్‌తో ఫ్యాన్ మేడ్ పోస్టర్లు కూడా వచ్చేశాయి.పవర్ స్టార్‌తో సినిమా చేయాలనే కలను నిర్మాత దిల్ రాజు ఈ సినిమాతో నెరవేర్చుకుంటున్నారు. బోనీ కపూర్‌తో కలిసి ఈ సినిమాను దిల్ రాజు తన శ్రీ వేంకటేశ్వర క్రియేషన్స్ బ్యానర్‌పై నిర్మిస్తున్నారు. ‘ఎంసీఏ’ ఫేమ్ వేణు శ్రీరామ్ ఈ చిత్రానికి దర్శకత్వం వహిస్తున్నారు. తమన్ సంగీతం సమకూరుస్తున్నారు. వీలైనంత త్వరగా షూటింగ్ పూర్తిచేసి వేసవిలో చిత్రాన్ని ప్రేక్షకుల ముందుకు తీసుకురావాలని చూస్తున్నారు.