108 మెగా పిక్సెల్ కెమెరా ఫోన్ ను లాంచ్ చేసిన షియోమీ

భారతదేశ నంబర్ వన్ స్మార్ట్ ఫోన్ బ్రాండ్ షియోమీ ఎప్పట్నుంచో ఊరిస్తున్న ఎంఐ 11, ఎంఐ 11 ప్రోలను లాంచ్ చేసేసింది. చైనాలో జరిగిన ఈవెంట్ లో వీటిని షియోమీ మార్కెట్లోకి తీసుకువచ్చింది. ఇందులో ఎంఐ 10 ప్రో స్మార్ట్ ఫోన్ కెమెరాకు DxOMark 124 పాయింట్లను ఇచ్చింది. ఆ సంస్థ ఒక స్మార్ట్ ఫోన్ కు అంత స్కోర్ ఇవ్వడం ఇదే ప్రథమం. స్మార్ట్ ఫోన్ల కెమెరాలను పరీక్షించి వాటికి రేటింగ్ ఇవ్వడమే DxOMark కంపెనీ పని. ప్రస్తుతం ఆ వెబ్ సైట్ లో అత్యధిక స్కోరు కలిగి ఉంది ఎంఐ 10 ప్రోనే. ఈ రెండు ఫోన్లూ 5జీ ఫోన్లు కావడం విశేషం. ఎంఐ 10 స్మార్ట్ ఫోన్ లో మొత్తం మూడు వేరియంట్లు అందుబాటులో ఉన్నాయి. వీటిలో ప్రారంభ వేరియంట్ అయిన 8 జీబీ ర్యామ్ + 128 జీబీ స్టోరేజ్ వేరియంట్ ధరను 3,999 యువాన్లుగా(సుమారు రూ.40,000) నిర్ణయించారు. 8 జీబీ ర్యామ్ + 256 జీబీ స్టోరేజ్ వేరియంట్ ధర 4,299 యువాన్లుగా(సుమారు రూ.43,000) ఉండగా, హైఎండ్ వేరియంట్ అయిన 12 జీబీ ర్యామ్ + 256 జీబీ స్టోరేజ్ వేరియంట్ ధరను 4,699 యువాన్లుగా(సుమారు రూ.47,000) నిర్ణయించారు. టైటానియం సిల్వర్ బ్లాక్, పీచ్ గోల్డ్, బ్లూ కలర్ ఆప్షన్లలో ఈ ఫోన్ అందుబాటులో ఉంది. దీనికి సంబంధించిన ప్రీ-ఆర్డర్లు నేటి నుంచే ప్రారంభం కానున్నాయి. మొదటి సేల్ చైనాలో ఫిబ్రవరి 14వ తేదీన జరగనుంది. షియోమీ దీని కోసం ప్రత్యేకంగా ఒక కూలర్ అటాచ్ మెంట్ ను కూడా అందించనుంది. ఈ కూలర్ ధర 129 యువాన్లుగా(సుమారు రూ.1,300) ఉంది. దీంతో పాటు 65W చార్జర్ ను కూడా షియోమీ లాంచ్ చేసింది. దీని ధర 149 యువాన్లుగా(సుమారు రూ.1,500)గా ఉంది. ఎంఐ 10 ప్రోలో కూడా ఎంఐ 10 తరహాలోనే మూడు వేరియంట్లు అందుబాటులో ఉన్నాయి. వీటిలో ప్రారంభ వేరియంట్ అయిన 8 జీబీ ర్యామ్ + 256 జీబీ స్టోరేజ్ వేరియంట్ ధర 4,999 యువాన్లుగా(సుమారు రూ.50,000) ఉంది. 12 జీబీ ర్యామ్ + 256 జీబీ స్టోరేజ్ వేరియంట్ ధర 5,499 యువాన్లుగా(సుమారు రూ.55,000) ఉండగా, హైఎండ్ వేరియంట్ అయిన 12 జీబీ ర్యామ్ + 512 జీబీ స్టోరేజ్ వేరియంట్ ధరను 5,999 యువాన్లుగా(సుమారు రూ.60,000) నిర్ణయించారు. పెరల్ వైట్, స్టారీ బ్లూ రంగుల్లో ఈ ఫోన్ అందుబాటులో ఉంది. దీనికి సంబంధించిన ప్రీ-ఆర్డర్లు ఇప్పటికే ప్రారంభం అయ్యాయి. మొదటి సేల్ ఫిబ్రవరి 18వ తేదీన నిర్వహించనున్నారు. షియోమీ దీని కోసం ప్రత్యేకంగా ఒక ప్రొటెక్టివ్ కేస్ ను లాంచ్ చేసింది. దీని ధర 69 యువాన్లుగా(సుమారు రూ.700) ఉంది. ఆండ్రాయిడ్ 10 ఆధారిత ఎంఐయూఐ 11 ఆపరేటింగ్ సిస్టంపై ఈ ఫోన్ పనిచేయనుంది. 6.67 అంగుళాల ఫుల్ హెచ్ డీ+ అమోఎల్ఈడీ(AMOLED) డిస్ ప్లేను ఇందులో అందించారు. దీని రిఫ్రెష్ రేట్ 90 హెర్ట్జ్ కాగా, టచ్ సాంప్లింగ్ రేట్ 180 హెర్ట్జ్ గా ఉంది. పంచ్ హోల్ డిజైన్ ను ఇందులో అందించారు. ఎంఐ 10 స్మార్ట్ ఫోన్ లో వెనకవైపు నాలుగు కెమెరాల సెటప్ ను అందించారు. వీటిలో ప్రధాన కెమెరా సామర్థ్యం 108 మెగా పిక్సెల్ గా ఉంది. 13 మెగా పిక్సెల్ వైడ్ యాంగిల్ లెన్స్, 2 మెగా పిక్సెల్ సామర్థ్యమున్న మరో రెండు కెమెరాలను ఇందులో అందించారు. 8కే రిజల్యూషన్ వీడియోలను ఇందులో తీయవచ్చు. సెల్ఫీల కోసం ముందువైపు 20 మెగా పిక్సెల్ కెమెరాను అందించారు. క్వాల్ కాం తాజా ప్రాసెసర్ స్నాప్ డ్రాగన్ 865పై ఈ స్మార్ట్ ఫోన్ పనిచేయనుంది. 8 జీబీ నుంచి 12 జీబీ వరకు ఉన్న LPDDR5 ర్యామ్ ఇందులో ఉండగా, 256 జీబీ వరకు యూఎఫ్ఎస్ 3.0 స్టోరేజ్ ను కూడా ఇందులో అందించారు. ఎంఐ 10లో 4,780 ఎంఏహెచ్ బ్యాటరీని అందించారు. ఇది 30W వైర్డ్ చార్జింగ్, 30W వైర్ లెస్ చార్జింగ్ ఫీచర్ ను సపోర్ట్ చేస్తుంది. దీంతోపాటు 10W వైర్ లెస్ రివర్స్ చార్జింగ్ ఫీచర్ ను కూడా ఇందులో అందించడం విశేషం. ఆండ్రాయిడ్ 10 ఆధారిత ఎంఐయూఐ 11 ఆపరేటింగ్ సిస్టంపైనే ఈ ఫోన్ కూడా పనిచేయనుంది. 6.67 అంగుళాల ఫుల్ హెచ్ డీ+ హెచ్ డీఆర్+ అమోఎల్ఈడీ(AMOLED) డిస్ ప్లేను ఇందులో అందించారు. దీని రిఫ్రెష్ రేట్ 90 హెర్ట్జ్ గా ఉంది. పీక్ బ్రైట్ నెస్ 1,200 నిట్స్ గా ఉండనుంది. 5,00,000:1 కాంట్రాస్ట్ రేషియో, డీసీ డిమ్మింగ్, డీసీఐ-పీ3 కలర్ గాముట్ సపోర్ట్, 180 హెర్జ్జ్ టచ్ శాంప్లింగ్ రేట్ ఫీచర్లు కూడా ఇందులో ఉన్నాయి. ఎంఐ 10ప్రోలో కూడా వెనకవైపు నాలుగు కెమెరాలను అందించారు. వీటిలో ప్రధాన కెమెరా సామర్థ్యం 108 మెగా పిక్సెల్ గా ఉంది. 20 మెగా పిక్సెల్ వైడ్ యాంగిల్ లెన్స్, 8 మెగా పిక్సెల్ టెలిఫొటో లెన్స్ తో పాటు మరో 12 మెగా పిక్సెల్ కెమెరాను కూడా అందించారు. DxOMarkలో ఎంఐ 10 ప్రో ఫొటోగ్రఫీ స్కోర్ 124గా ఉంది. దీన్ని బట్టి ప్రస్తుతం ఉన్న ఫోన్లన్నిటిలో ఫొటోగ్రఫీ విషయంలో ఇదే నంబర్ వన్ అని చెప్పవచ్చు. ఇందులో కూడా క్వాల్ కాం తాజా ప్రాసెసర్ స్నాప్ డ్రాగన్ 865నే అందించారు. 8 జీబీ నుంచి 12 జీబీ వరకు ఉన్న LPDDR5 ర్యామ్ ఇందులో ఉండగా, 512 జీబీ వరకు యూఎఫ్ఎస్ 3.0 స్టోరేజ్ ను ఇందులో అందించారు. ఎంఐ 10 ప్రోలో 4,500 ఎంఏహెచ్ బ్యాటరీని అందించారు. ఇది ఎంఐ 10 కంటే తక్కువే. 50W వైర్డ్ చార్జింగ్, 30W వైర్ లెస్ చార్జింగ్ ఫీచర్ ను ఎంఐ 10 ప్రో సపోర్ట్ చేస్తుంది. దీంతోపాటు ఎంఐ 10 తరహాలోనే 10W వైర్ లెస్ రివర్స్ చార్జింగ్ ఫీచర్ ను కూడా ఇందులో అందించడం విశేషం.