గుడ్ న్యూస్.. భారీగా దిగిరానున్న గ్యాస్ సిలిండర్ ధర

ఆయిల్ మార్కెటింగ్ కంపెనీలు సామాన్యులకు, మధ్యతరగతి ప్రజలకు భారీ షాకిచ్చిన విషయం తెలిసిందే. ఎల్‌పీజీ గ్యాస్ సిలిండర్‌ ధరను భారీగా పెంచేశాయి. ఫిబ్రవరి 12 నుంచే ఈ నిర్ణయం అమలులోకి వచ్చింది. దీంతో ఇప్పుడు గ్యాస్ బుక్ చేసుకోవాలంటే బాదుడు భరించాల్సిందే.

రూ.149 జంప్

నాన్ సబ్సిడీ ఎల్‌పీజీ సిలిండర్ ధరను పెంచుతున్నట్లు ఆయిల్ మార్కెటింగ్ కంపెనీలు ప్రకటించాయి. ఇండియన్ ఆయిల్ వెబ్‌సైట్ ప్రకారం.. గ్యాస్ సిలిండర్ ధర రూ.149 పెరిగింది. 14.2 గ్యాస్ సిలిండర్‌కు ఇది వర్తిస్తుంది. దీంతో గ్యాస్ సిలిండర్ బుక్ చేసుకునే వారిపై నేరుగానే ప్రతికూల ప్రభావం పడుతోంది.



లేటెస్ట్ ధరలు ఇలా

ఇండియన్ ఆయిల్ లేటెస్ట్ ధరల జాబితా ప్రకారం.. ఇండేన్ గ్యాస్ 14.2 కేజీల నాన్ సబ్సిడీ ఎల్‌పీజీ సిలిండర్ ధర ఇప్పుడు రూ.858.5కు చేరింది. ఢిల్లీలో ఈ ధర వర్తిస్తుంది. ఎల్‌పీజీ గ్యాస్ సిలిండర్ ధర కోల్‌కతాలో రూ.896కు చేరింది. ధర రూ.149 పెరిగింది. ముంబైలో సిలిండర్ ధర రూ.145 పెరుగుదలతో రూ.829.5కు, చెన్నైలో రూ.147 పెరుగుదలతో రూ.881కు చేరింది.


కేంద్ర ప్రభుత్వ స్పందన

నాన్ సబ్సిడీ ఎల్‌పీజీ గ్యాస్ సిలిండర్ ధర పెరుగుదలపై కేంద్ర ప్రభుత్వం స్పందించింది. పెట్రోలియం అండ్ నేచురల్ గ్యాస్ శాఖ మత్రి ధర్మేంద్ర ప్రధాన్ సిలిండర్ ధర పెంపుపై మాట్లాడుతూ.. అంతర్జాతీయ మార్కెట్‌లోని ధరలకు అనుగుణంగా దేశీ మార్కెట్లో సిలిండర్ ధర పెరిగిందని పేర్కొన్నారు.


వచ్చే నెల తగ్గొచ్చు

గ్యాస్ సిలిండర్ ధర వచ్చే నెలలో తగ్గొచ్చని ధర్మేంద్ర ప్రధాన్ అంచనా వేశారు. అంతర్జాతీయ మార్కెట్‌లో క్రూడ్ ఆయిల్ ధరలు మార్చి నెలలో దిగిరావొచ్చని ఆయన అభిప్రాయపడ్డారు. దేశీ ఎల్‌పీజీ గ్యాస్ సిలిండర్ ధర కూడా గ్లోబల్ మార్కెట్‌లోని ముడి చమురు ధరపై ఆధారపడి ఉంటుంది. అలాగే రూపాయి, అమెరికా మారకపు విలువ కూడా గ్యాస్ సిలిండర్ ధరను ప్రభావితం చేస్తుంది.


జనవరిలో ఒడిదుడుకులు

అంతర్జాతీయ మార్కెట్‌లో జనవరి నెలలో క్రూడాయిల్ ధరలో తీవ్ర ఒడిదుడుకులు చోటుచేసుకున్నాయి. బ్రెంట్ క్రూడ్ ధర బ్యారెల్‌కు 68.91 డాలర్ల స్థాయికి కూడా చేరింది. ప్రస్తుతం బ్రెంట్ క్రూడ్ ధర 55 డాలర్ల వద్ద కదలాడుతోంది. జనవరి నెలలోని గరిష్ట స్థాయి నుంచి చూస్తే ఇప్పుడు క్రూడ్ ధర ఏకంగా 20 శాతం దిగొచ్చింది. క్రూడ్ ధర ఈస్థాయిలో తగ్గిన నేపథ్యంలో వచ్చే నెలలో ఎల్‌పీజీ సిలిండర్ ధర కూడా భారీగా తగ్గే అవకాశముంది.


6 నెలలుగా పైకే

సిలిండర్ ధర పెరుగుతూ రావడం ఇది వరుసగా ఆరో నెల కావడం గమనార్హం. అక్టోబర్ నెలలో ఎల్‌పీజీ సిలిండర్ ధర రూ.15 మేర పెరిగింది. నవంబర్‌లో గ్యాస్ సిలిండర్ ధర రూ.76 పైకి కదిలింది. సెప్టెంబర్ నెలలోనూ ఎల్‌పీజీ ధర రూ.15.5 పెరిగింది. డిసెంబర్ నెలలో గ్యాస్ సిలిండర్ ధర పెరుగుదల రూ.14గా ఉంది. జనవరిలో గ్యాస్ ధర రూ.19 పైకి చేరింది. ఇప్పుడు మళ్లీ పెరిగింది.



ఇకపోతే గ్యాస్ కంపెనీలు ప్రతి నెలా ఎల్‌పీజీ సిలిండర్ రేట్లను సమీక్షిస్తూ ఉంటాయి. సంస్థలు అంతర్జాతీయ మార్కెట్‌లో ఎల్‌పీజీ రేట్లు, అమెరికా డాలర్-ఇండియన్ రూపాయి మారకపు విలువ వంటి అంశాలు ప్రాతిపదికన ధరను మారుస్తూ ఉంటాయి. కొన్ని సందర్భాల్లో ధరలో ఎలాంటి మార్పు ఉండకపోవచ్చు.