భారత్‌కు కరోనా ముప్పు.. అదే జరిగితే.....!!!

చైనాలో మొదలైన కొత్తరకం కరోనా వైరస్ ప్రస్తుతం ప్రపంచవ్యాప్తంగా 50 దేశాలకు విస్తరించింది. అయితే, అధిక జనాభా, అంతంత మాత్రంగానే ఉన్న ఆరోగ్య వ్యవస్థ, అధిక శాతం వలసలు కారణంగా ప్రత్యేకంగా భారత్‌కు కరోనా వైరస్ ముప్పు ఎక్కువ ఉంటుందని నిపుణులు అంచనా వేస్తున్నారు. ప్రస్తుతం దేశంలో మూడు కరోనా కేసులు నమోదయ్యాయి.., అనుమానిత లక్షణాలున్న మరో 25,531 మంది పర్యవేక్షణలో ఉన్నట్టు ప్రభుత్వం వెల్లడించింది. తమ దేశంలో ఒక కరోనా కేసు గుర్తించినట్టు శ్రీలంక తెలిపింది. పాకిస్థాన్‌లోనూ ఈ వారంలోనే తొలి కేసు నమోదయ్యింది. ప్రస్తుతం భారత్‌లో మూడు కరోనా కేసులే గుర్తించిన ప్రపంచంలోని మిగతా దేశాల్లో వేగంగా కోవిడ్ విస్తరించడంతో ప్రపంచ ఆరోగ్య సంస్థ అప్రమత్తం చేసింది. అమెరికాలోనూ తాజాగా ఓ వ్యక్తికి కరోనా నిర్ధారణ అయినా జనసాంద్రత తక్కువగా ఉండటంతో వైరస్ వేగంగా విస్తరించే అవకాశం ఉండదని నిపుణులు భావిస్తున్నారు. అదే భారత్‌లో వైరస్ మొదలైతే అధిక జనసాంద్రత, దీర్ఘకాలికంగా అరకొర నిధులతో సాగుతోన్న ఆరోగ్య సంరక్షణ వ్యవస్థ దీనిని అధిగమించగలదా అనే ఆందోళన వ్యక్తమవుతోంది. ‘ఇప్పటికే వైరస్ భారత్‌‌లో ప్రవేశించింది, కొత్త కేసులను గుర్తించారు.. ఒకవేళ ఇది వ్యాప్తించడం ప్రారంభమైతే చాలా వేగంగా ఉంటుందని’ హార్వర్డ్స్ టీహెచ్ చాన్ స్కూల్ ఆఫ్ పబ్లిక్ హెల్త్ ప్రొఫెసర్ కాశీసోమయాజుల విశ్వనాథ్ వ్యాఖ్యానించారు. ప్రస్తుతం వైరస్ అదుపులోనే ఉంది.. పర్యవేక్షణ కొనసాగుతోంది.. ప్రభావంతమైన చికిత్స జరుగుతుంది.. కానీ ఒకవేళ ఇతర అంటు వ్యాధులతో కలిసి వ్యాపిస్తే నిరోధించడం చాలా కష్టమవుతుందని ఆయన అన్నారు. భారత్‌లో చదరపు కిలోమీటరుకు 420 మంది నివసిస్తుంటే, చైనాలో ఇది 148గా ఉంది.. ముంబయిలో ధారవీ మురికివాడ లాంటి ప్రదేశాల్లో శ్వాస తీసుకున్నా, మాట్లాడినా, దగ్గినా లేదా తుమ్మినా విడుదలయ్యే వైరస్ వేగంగా వ్యాపిస్తుంది. అటు పాకిస్థాన్, బంగ్లాదేశ్‌లకు కూడా ముప్పు పొంచి ఉంది.. ఈ రెండు దేశాలూ ఆరోగ్యం సంరక్షణ కోసం భారత్ కంటే తక్కువ మొత్తం ఖర్చుచేస్తున్నాయి. పాకిస్థాన్‌లో తొలి కేసు ఈ వారంలోనే నమోదు కాగా.. బాధితుడు పొరుగున ఉన్న ఇరాన్ నుంచి వచ్చినట్టు తెలిపింది. చైనా వెలుపల కరోనా వైరస్ తీవ్రత ఎక్కువగా ఇరాన్‌లోనే ఉంది. ఇప్పటి వరకు 26 మంది మృతిచెందగా, 245 కేసులు నమోదయ్యాయి. చైనా, జపాన్ నుంచి వచ్చే విమానాలను నిషేధించిన పాక్.. తాజాగా ఇరాన్‌ను కూడా ఆ జాబితాలో చేర్చింది. అలాగే, చైనాలోని చిక్కుకున్న తమ విద్యార్థులను స్వదేశానికి తరలించడానికి పాక్ నిరాకరించింది. వుహాన్‌లో ఉన్న 312 తమ పౌరులను బంగ్లాదేశ్‌ స్వదేశానికి తరలించి, ఢాకా సమీపంలో శిబిరంలో ఉంచింది. చైనా మాదిరిగానే ఇండియాలోనూ అంతర్గత వలసలు అధికం. 2011 జనాభా లెక్కల ప్రకారం ఉపాధి కోసం వేరే ప్రాంతానికి 450 మిలియన్ల మంది తరలివెళ్లారు. ప్రతి రోజూ గ్రామాల నుంచి అనేక మంది పట్టణాలకు పనిమీద వెళ్తుంటారు. వైరస్ వ్యాప్తిని అరికట్టడానికి హుబే ప్రావిన్సులను చైనా దిగ్బంధనం చేయడంతో దీని ప్రభావం కొంత కనిపించింది. అయితే, భారత్‌లో ఇది సాధ్యం కాదని జార్జ్ ఇన్‌‌స్టిట్యూట్ ఫర్ గ్లోబల్ హెల్త్‌ ఎగ్జిక్యూటివ్ డైరెక్టర్ వివేకానంద్ ఝా అన్నారు. ఒకవేళ వైరస్ ఒక వ్యక్తికి సోకితే అది ఆరోగ్య వంతులకు వేగంగా వ్యాప్తిచెందుతుందని అన్నారు. మరోవైపు, వైరస్ తీవ్రత ఎక్కువైతే ఇప్పటికే మందగమనంలో ఉన్న ఆర్ధిక వ్యవస్థను అతలాకుతలం చేస్తుంది. వృద్ధిరేటు గడిచిన దశాబ్ద కాలం కనిష్టానికి పడిపోవడంతో ఆర్ధిక వ్యవస్థపై తీవ్ర ప్రభావం చూపుతుంది. ఆరోగ్య రంగంపై కూడా ప్రభుత్వం చేసే ఖర్చు ప్రపంచ సగటు కంటే తక్కువగానే ఉంది.. జీడీపీలో ఇది కేవలం 3.7 శాతం మాత్రమే. ప్రజారోగ్యం కోసం చేసే ఖర్చు తక్కువగా ఉండటం వల్ల ప్రయివేట్ హాస్పిటల్స్‌లో బిల్లులను భరించలేక ప్రభుత్వ హాస్పిటల్స్‌లకు భారీగా జనం క్యూ కడుతున్నారు. మరోవైపు, కరోనా వైరస్ బారినపడిన ముగ్గురు కేరళ బాధితులు కోలుకుని హాస్పిటల్ నుంచి ఇళ్లకు చేరకున్నారు. అయినా, భారత్‌కు కరోనా వైరస్ ముప్పు అధికంగా ఉందని ఇండియాలో క్షయ వ్యాధి నివారణకు కృషిచేస్తున్న న్యూ సౌత్‌వేల్స్ యూనివర్సిటీ పబ్లిక్ హెల్త్ విభాగం ప్రొఫెసర్ పద్మనేసన్ నరసింహన్ అన్నారు. అంతర్గత వలసలు, అధిక జనసాంద్రత, అంతంత మాత్రంగానే ఉన్న ఆరోగ్య వ్యవస్థ భారత్‌కు సవాల్‌గా పరిణమించాయని అన్నారు. కాబట్టి వైరస్ విషయంలో ప్రభుత్వం, ప్రజలు అప్రమత్తంగా ఉండాలని సూచించారు. కరోనావైరస్ ఇప్పటికే వ్యాప్తి చెందుతున్న దేశాల కంటే భారత్, దక్షిణాసియాలోని పొరుగువారికి ప్రస్తుత వాతావరణం వల్ల కొంత ప్రయోజనం కలుగుతోంది. చల్లగా, పొడి వాతావరణంలో వైరస్ వేగంగా విస్తరిస్తుంది. అందుకే శీతాకాలంలో స్వైన్‌ఫ్లూ ప్రభావం ఎక్కువగా ఉంటుంది. ఉపఖండంలో వేసవి కాలం సమీపిస్తున్న తరుణంలో వైరస్ కూడా తగ్గుముఖం పడుతుంది.