కోహ్లీ బ్యాటింగ్‌ అంటే ఇష్టం : పాక్ బౌలర్ భార్య

Written by : smtv Desk | Sat, Mar 28, 2020, 10:35 AM

భారత కెప్టెన్ విరాట్ కోహ్లీకి ప్రపంచవ్యాప్తంగా అభిమానులున్నారు. దిగ్గజ క్రికెటర్ల నుంచి ప్రస్తుత తరం అగ్రశ్రేణి ఆటగాళ్ల వరకూ కోహ్లీ అంటే తమకి అభిమానమని బాహాటంగా ప్రకటిస్తున్నారు. తాజాగా కోహ్లీ ఫ్యాన్స్ లిస్ట్‌లోకి పాకిస్థాన్ ఫాస్ట్ బౌలర్ హసన్ అలీ భార్య అర్జూ కూడా చేరింది. భారత సంతతికి చెందిన అర్జూని గత ఏడాది దుబాయ్‌లో హసన్ అలీ పెళ్లి చేసుకున్నాడు. తాజాగా మీ ఫేవరెట్ బ్యాట్స్‌మెన్ ఎవరు అని..? ఆమెని ప్రశ్నించగా.. విరాట్ కోహ్లీ అని సమాధానమిచ్చింది. 2008లో అంతర్జాతీయ క్రికెట్‌‌లోకి అరంగేట్రం చేసిన విరాట్ కోహ్లీ.. మూడు ఫార్మాట్లలోనూ పరుగుల వరద పారిస్తూ అగ్రశ్రేణి బ్యాట్స్‌మెన్‌గా కొనసాగుతున్నాడు. ఇప్పటికే వన్డేల్లో 59.33 సగటుతో 11,867 పరుగులు చేసిన విరాట్ కోహ్లీ.. టెస్టుల్లో 7,240, టీ20ల్లో 2,794 పరుగులతో కొనసాగుతున్నాడు. క్రికెట్ దిగ్గజం సచిన్ టెండూల్కర్ 100 అంతర్జాతీయ శతకాల రికార్డ్‌ని బద్దలు కొట్టగల ఏకైక క్రికెటర్‌గా కోహ్లీ కనిపిస్తున్నాడు. మార్చి 29 నుంచి ఐపీఎల్ 2020 సీజన్ ప్రారంభంకావాల్సి ఉండగా.. కరోనా వైరస్ వ్యాప్తి నేపథ్యంలో.. ఈ టోర్నీకి బీసీసీఐ ఏప్రిల్ 15కి వాయిదా వేసింది. దీంతో.. క్రికెటర్లందరూ ప్రస్తుతం ఇంటి వద్దే విశ్రాంతి తీసుకుంటున్నారు. దేశంలో ప్రస్తుతం 21 రోజులు లాక్‌డౌన్ ఉండటంతో అందరూ ఇంట్లోనే ఉండాలని కోహ్లీ సూచిస్తున్నాడు. కరోనా వైరస్ వ్యాప్తిని అడ్డుకోవడంలో ఓ బాధ్యతాయుత పౌరుడిగా ప్రస్తుతం తాను ఇంట్లోనే ఉంటున్నట్లు వెల్లడించిన కోహ్లీ.. అందరూ కాస్త బాధ్యతాగా వ్యవహరించాలని చురకలేస్తున్నాడు. లాక్‌డౌన్ సమయంలోనూ కొందరు నిబంధనలు అతిక్రమిస్తుండటాన్ని కోహ్లీ తప్పుబట్టాడు.