సుకన్య సమృద్ధి స్కీమ్...రూ.200తో చేతికి రూ.33 లక్షలు!

Written by : smtv Desk | Sun, Mar 29, 2020, 10:49 AM

సుకన్య సమృద్ధి యోజన స్కీమ్ గురించి చాలా మందికి తెలిసే ఉంటుంది. కేంద్ర ప్రభుత్వం ఆడ పిల్లల ఆర్థిక భద్రత లక్ష్యంగా ఈ పథకాన్ని అందుబాటులోకి తీసుకువచ్చింది. ఇప్పటికే చాలా మంది ఈ స్కీమ్‌లో చేరారు. ఈ పథకంలో చేరడం వల్ల పలు ప్రయోజనాలు పొందొచ్చు. మరీముఖ్యంగా ఆడ పిల్లల పేరుపై డబ్బు డిపాజిట్ చేసుకోవచ్చు. దీనిపై అదిరిపోయే రాబడి పొందొచ్చు.

ఒక కుటుంబంలో గరిష్టంగా ఇద్దరు ఆడ పిల్లల పేర్లపై ఈ సుకన్య సమృద్ధి అకౌంట్లను ఓపెన్ చేయొచ్చు. సుకన్య సమృద్ది అకౌంట్‌పై 8.4 శాతం వడ్డీ రేటు లభిస్తోంది. వడ్డీ మొత్తం ప్రతి ఆర్థిక సంవత్సరం ముగింపు తర్వాత అకౌంట్‌లో జమవుతుంది. అలాగే వడ్డీ రేటు ప్రతి మూడు నెలలకు ఒకసారి మారుతుంది. కేంద్ర ప్రభుత్వం ఈ వడ్డీ రేటును సవరిస్తూ ఉంటుంది. పెంచొచ్చు.. లేదంటే తగ్గించొచ్చు.

ఒక ఆర్థిక సంవత్సరంలో గరిష్టంగా రూ.1.5 లక్షల వరకు సుకన్య సమృద్ధి అకౌంట్‌లో డిపాజిట్ చేయొచ్చు. కనీసం రూ.250 డిపాజిట్ చేసిన సరిపోతుంది. రూ.250 కాకుండా నెలకు కనీసం రూ.1,000 కట్టుకుంటే మంచిది. ఖాతా తెరిచిన దగ్గరి నుంచి 15 ఏళ్లు వరకు అకౌంట్‌లో డబ్బు డిపాజిట్ చేయాల్సి ఉంటుందనే విషయాన్ని గుర్తు పెట్టుకోవాలి.

సుకన్య సమృద్ధి యోజన స్కీమ్‌లో ఒక ఆర్థిక సంవత్సరంలో రూ.1.5 లక్షల వరకు ఇన్వెస్ట్ చేయవచ్చు. అంటే నెలకు రూ.12,500 వరకు డిపాజిట్ చేసే అవకాశముంది. దీంతో ఎవరి శక్తిమేరకు వాళ్లు ప్రతి నెలా డబ్బు డిపాజిట్ చేసుకుంటూ వెళ్లాలి. రోజుకు రూ.200 ఆదా చేశారునుకోండి.. సుకన్య అకౌంట్‌లో నెల చివరిలో రూ.6,000 ఇన్వెస్ట్ చేయవచ్చు. దీంతో మీరు మెచ్యూరిటీ సమయంలో రూ.33 లక్షలు మీ కూతురికి గిఫ్ట్‌గా ఇవ్వొచ్చు.

సుకన్య సమృద్ధి అకౌంట్‌ ద్వారా ఏకంగా రూ.75 లక్షలు పొందే అవకాశం కూడా ఉంది. రోజుకు రూ.300 ఆదా చేసి నెలకు రూ.9,000 సుకన్య అకౌంట్‌లో జమ చేస్తే మెచ్యూరిటీ సమయంలో రూ.50 లక్షలకు పైగా పొందొచ్చు. అదే రోజుకు రూ.400 పొదుపు చేస్తూ.. నెల చివరిలో ఆ మొత్తాన్ని సుకన్య ఖాతాలో జమ చేస్తే మెచ్యూరిటీ సమయంలో ఏకంగా రూ.75 లక్షలు పొందొచ్చు.