రూ.1కే శానిటైజర్...

Written by : smtv Desk | Tue, Mar 31, 2020, 12:09 PM

కరోనా వైరస్ దెబ్బకి ప్రజలు తీవ్ర ఇబ్బందులు ఎదుర్కొంటున్నారు. అన్ని రంగాలపై ప్రతికూల ప్రభావం పడుతోంది. మార్కెట్‌లో శానిటైజర్లకు ఫుల్ డిమాండ్ నెలకొంది. దీంతో పలు చోట్ల విక్రయదారులు కూడా ధరలు పెంచేసి విక్రయిస్తున్నారు. ఇలాంటి పరిస్థితుల్లో ప్రజలకు ఒక గుడ్ న్యూస్. మార్కెట్‌లోకి కేవలం రూ.1కే శానిటైజర్ అందుబాటులోకి రానుంది. బాబా రాందేవ్‌కు చెందిన పతంజలి ఆయుర్వేద్, చిక్ షాంపు తయారీ కంపెనీ కెవిన్‌కేర్ సంస్థలు ఇప్పుడు శానిటైజర్ విభాగంపై కన్నేశాయి. అధిక మార్కెట్ వాటా లక్ష్యంగా దూసుకెళ్లాలని భావిస్తున్నాయి. అందుకే అందుబాటు ధరలోనే శానిటైజర్‌ను తీసుకురావాలని యోచిస్తున్నాయి. నైల్, చిక్ బ్రాండ్లను తయారు చేస్తున్న కెవిన్‌కేర్ ఒక అడుగు ముందుకేసి కేవలం ఒక్క రూపాయికే శానిటైజర్ తీసుకువస్తామని ప్రకటించింది. చిక్ బ్రాండ్ కింద దీన్ని తీసుకురానుంది. ఈ కంపెనీ 2 ఎంఎల్ చిన్న ప్యాకేట్‌ను రూ.1 విక్రయించనుంది. దీన్ని రెండు సార్లు ఉపయోగించుకోవచ్చు. అంతేకాకుండా 10 ఎంఎల్, 50 ఎంఎల్, 90 ఎంఎల్, 400 ఎంఎల్, 800 ఎంఎల్, 5 లీటర్ల పరిమాణాల్లో కూడా శానిటైజర్లు అందుబాటులో ఉంటాయని వివరించింది. నీల్సన్ నివేదిక ప్రకారం.. హ్యాండ్ శానిటైజర్లు అమ్మకాలు ఫిబ్రవరి, మార్చి నెలలో భారీగా పెరిగాయి. హ్యాండ్ శానిటైజర్ల అమ్మకాలు ఫిబ్రవరి నెలలో ఏకంగా 53 శాతం పెరగడం గమనార్హం. సాధారణంగా వీటి అమ్మకాల్లో సగటు పెరుగుదల 11 శాతంగానే ఉంటుంది. ఫ్లోర్ క్లీనర్స్, టాయిలెట్ క్లీనర్స్ అమ్మకాలు కూడా గత నెలలో బాగా పెరిగాయి.