స‌చిన్ వర‌ల్డ్ రికార్డుకు @19 ఏళ్లు

Written by : smtv Desk | Tue, Mar 31, 2020, 05:15 PM

భార‌త లెజెండ‌రీ క్రికెట‌ర్ స‌చిన్ టెండూల్క‌ర్.. ఎన్నో రికార్డుల‌ను త‌న పేరిట లిఖించుకున్నాడు. అంత‌ర్జాతీయ క్రికెట్ నుంచి త‌ను వైదొలిగి ఇప్ప‌టికి ఏడేళ్లు అయినా.. త‌న రికార్డులు కొన్ని చెక్కు చెద‌ర‌లేదు. ముఖ్యంగా వ‌న్డేలు, టెస్టుల్లో స‌చిన్ నెల‌కొల్పిన రికార్డులు ఎన్నో ఉన్నాయి. మ‌రోవైపు వ‌న్డేల‌కు సంబంధించి ప‌దివేల ప‌రుగుల క్ల‌బ్‌ను (ఈరోజే మార్చి 31న) ప్రారంభించింది స‌చినే కావ‌డం విశేషం. 2001లో ఆస్ట్రేలియాపై స‌చిన్ ఈ ఘ‌న‌త‌ను సాధించాడు. ఇండోర్‌లో జ‌రిగిన ఈ వ‌న్డేలో స‌చిన్ సెంచ‌రీ (139)తో చెల‌రేగ‌డం విశేషం. ఇప్పటికీ వన్డేల్లో అత్యధిక పరుగుల వరల్డ్ రికార్డు సచిన్ పేరిటే ఉంది. త‌న 259వ వ‌న్డే ఇన్నింగ్స్‌లో స‌చిన్.. ప‌దివేల ప‌రుగుల‌ను సాధించాడు. ఈ మ్యాచ్‌లో హైద‌రాబాదీ సొగ‌స‌రి బ్యాట్స్‌మ‌న్ వీవీఎస్ ల‌క్ష్మ‌ణ్‌తో క‌ల‌సి ఎంతో ముఖ్య‌మైన ఇన్నింగ్స్ ఆడాడు. వీరిద్ద‌రూ క‌లిసి 199 ప‌రుగుల భారీ భాగ‌స్వామ్యం నెల‌కొల్పారు. దీంతో భార‌త్ 299 ప‌రుగుల భారీ స్కోరు సాధించింది. అనంత‌రం ఛేద‌న‌లో ఆసీస్‌ను మ‌న బౌల‌ర్లు ముప్పు తిప్ప‌లు పెట్టారు. ముఖ్యంగా పేస‌ర్ అజిత్ అగార్క‌ర్‌, స్పిన్న‌ర్ హ‌ర్భ‌జ‌న్ సింగ్ చెరో మూడు వికెట్ల‌తో స‌త్తాచాటారు. దీంతో 181 ప‌రుగుల‌కే ఆలౌటైన ఆసీస్‌.. 118 ర‌న్స్‌తో ప‌రాజ‌యం పాలైంది. ఈ ర‌కంగా ఈ మ్యాచ్ విజయాన్ని స‌చిన్‌ను కానుక‌గా భార‌త జ‌ట్టు స‌భ్యులు అందించారు. మ‌రోవైపు వ‌న్డేలు, టెస్టుల్లో అత్య‌ధిక ప‌రుగులు, అత్య‌ధిక సెంచ‌రీలు, అత్య‌ధిక మ్యాచ్‌లు ఇలా అనేక ఘ‌న‌త‌లు స‌చిన్ పేరిటే ఉన్నాయి.