స్మిత్‌కి మళ్లీ కెప్టెన్సీ వద్దు: షేన్‌వార్న్

Written by : smtv Desk | Wed, Apr 01, 2020, 11:30 AM

ఆస్ట్రేలియా మాజీ కెప్టెన్ స్టీవ్‌స్మిత్‌కి మళ్లీ టీమ్ పగ్గాలు ఇవ్వొద్దని ఆ దేశ దిగ్గజ స్పిన్నర్ షేన్‌వార్న్ సూచించాడు. 2018‌లో దక్షిణాఫ్రికా గడ్డపై బాల్ టాంపరింగ్‌ ఉదంతంలో స్టీవ్‌స్మిత్ పాత్ర ఉన్నట్లు విచారణలో తేలడంతో.. అతనిపై ఏడాది పాటు నిషేధం విధించిన క్రికెట్ ఆస్ట్రేలియా.. రెండేళ్ల పాటు కెప్టెన్సీకి అనర్హుడిగా ప్రకటించింది. ఈ గడవు మార్చి 29న ముగియడంతో మళ్లీ స్టీవ్‌స్మిత్ కెప్టెన్సీ రేసులో వచ్చాడు. ఆస్ట్రేలియా వన్డే, టీ20 జట్టుకి ప్రస్తుతం అరోన్ ఫించ్ కెప్టెన్‌గా ఉండగా.. టెస్టు టీమ్‌ని టిమ్ పైనీ నడిపిస్తున్నాడు. అయితే.. ఈ ఇద్దరూ గత రెండేళ్లలో ఆశించిన మేర రాణించలేకపోవడంతో మళ్లీ స్టీవ్‌స్మిత్‌కి కెప్టెన్సీ బాధ్యతలు అప్పగించాలని ఆ దేశ మాజీ క్రికెటర్లు కొంత మంది డిమాండ్ చేస్తున్నారు. కానీ.. షేన్‌వార్న్ మాత్రం.. తాను సెలక్టర్‌గా ఉంటే..? స్మిత్‌కి కెప్టెన్సీ బాధ్యతలు ఎప్పటికీ ఇవ్వబోనని ప్రకటించాడు. ‘‘ఆస్ట్రేలియా కెప్టెన్‌గా స్టీవ్‌స్మిత్ ఎంపికవడం లాంఛనంగానే కనిపిస్తోంది. కానీ.. నేను సెలక్టర్‌గా ఉంటే మాత్రం అతడి చేతికి మళ్లీ టీమ్ పగ్గాలివ్వను. ఎందుకంటే.. నేను ఇప్పుడు స్టీవ్‌స్మిత్‌ని కేవలం బ్యాట్స్‌మెన్‌గా మాత్రమే చూడాలనుకుంటున్నాను. కెప్టెన్సీ రూపంలో అతనిపై అదనపు భారాన్ని మోపాలని అనుకోవడం లేదు’’ అని షేన్‌వార్న్ వెల్లడించాడు. ఏడాది నిషేధం తర్వాత గత ఏడాది మళ్లీ ఆస్ట్రేలియా జట్టులోకి రీఎంట్రీ ఇచ్చిన స్టీవ్‌స్మిత్.. ఇంగ్లాండ్‌తో జరిగిన యాషెస్ సిరీస్‌లో శతకాల మోత మోగించిన విషయం తెలిసిందే.