మోదీ షాక్: సుకన్య సమృద్ధి అకౌంట్ స్కీమ్స్‌ వడ్డీ రేట్ల తగ్గింపు!

Written by : smtv Desk | Wed, Apr 01, 2020, 01:19 PM

కేంద్ర ప్రభుత్వం మధ్యతరగతి ప్రజలకు ఝలక్ ఇచ్చింది. స్మాల్ సేవింగ్ స్కీమ్స్‌పై వడ్డీ రేట్లను భారీగా తగ్గించేసింది. దీంతో పబ్లిక్ ప్రావిడెంట్ ఫండ్ (PPF), ఎస్ఎస్‌సీ, కేవీపీ, ఎస్‌సీఎస్ఎస్ వంటి పలు ప్రముఖ స్కీమ్స్‌పై తక్కువ వడ్డీ రానుంది. ఏప్రిల్ నుంచి జూన్ త్రైమాసికానికి తగ్గించిన వడ్డీ రేట్లు వర్తిస్తాయి. కేంద్ర ప్రభుత్వం ప్రతి 3 నెలలకు ఒకసారి చిన్న మొత్తాల పొదుపు పథకాలపై వడ్డీ రేట్లను సమీక్షిస్తూ వస్తుంది.

పీపీఎఫ్ అకౌంట్‌పై వడ్డీ రేటు 7.9 శాతం నుంచి 7.1 శాతానికి తగ్గింది. అంటే వడ్డీ రేటులో 80 బేసిస్ పాయింట్ల కోత ఉంది. సీనియర్ సిటిజన్స్ సేవింగ్స్ స్కీమ్ విషయానికి వస్తే వడ్డీ రేటు 8.6 శాతం నుంచి 7.4 శాతానికి దిగొచ్చింది. ఏడాది టైమ్ డిపాజిట్లపై వడ్డీ రేట్లు ఏకంగా 1.4 శాతం తగ్గింది. దీంతో ఈ రేటు 6.9 శాతం నుంచి 5.5 శాతానికి క్షీణించింది.

సుకన్య సమృద్ధి యోజన స్కీమ్‌పై కూడా వడ్డీ రేటు తగ్గింది. సుకన్య సమృద్ధి ఖాతాపై వడ్డీ రేటు 8.4 శాతం నుంచి 7.6 శాతానికి దిగొచ్చింది. రిజర్వు బ్యాంక్ (RBI) కీలక వడ్డీ రేట్లను 75 బేసిస్ పాయింట్ల మేర తగ్గించడంతో ఇప్పుడు కేంద్రం కూడా స్మాల్ సేవింగ్ స్కీమ్స్‌పై వడ్డీ రేట్లలో కోత విధించింది.

నేషనల్ సేవింగ్స్ సర్టిఫికెట్స్ (NSC), కిసాన్ వికాస్ ప్రత (KVP), టైమ్ డిపాజిట్స్, పబ్లిక్ ప్రావిడెంట్ ఫండ్ (పీపీఎఫ్), సీనియర్ సిటిజన్స్ సేవింగ్స్ స్కీమ్ (SCSS), సుకన్య సమృద్ధి యోజన (SSY) వంటి పలు స్కీమ్స్ అన్నింటిపైనా వడ్డీ రేట్లు తగ్గాయి. పోస్టాఫీస్‌లో ఈ స్కీమ్స్ అన్ని అందుబాటులో ఉంటాయి. బ్యాంకుల్లో కూడా కొన్ని పథకాలు అందుబాటులో ఉన్నాయి.

మరోవైపు ఆర్‌బీఐ రెపో రేటును తగ్గించడంతో బ్యాంకులు కూడా వరుసపెట్టి ఫిక్స్‌డ్ డిపాజిట్లు (FD), సేవింగ్స్ అకౌంట్లపై వడ్డీ రేట్లను తగ్గిస్తూ వస్తున్నాయి. ఇప్పటికైతే దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియా (SBI) ఎఫ్‌డీ రేట్లను తగ్గించింది. అలాగే సేవింగ్స్ ఖాతాలపై వడ్డీ రేట్లను కూడా సవరించింది.