టిక్‌టాక్ పిచ్చి...కరోనా సోకినా వదలట్లే...ఐసోలేషన్ వార్డులో యువతి వీడియో

Written by : smtv Desk | Wed, Apr 01, 2020, 02:18 PM

ఆమెకు టిక్‌టాక్ వీడియోలంటే పిచ్చి. పాపులర్ పాటలకు టిక్ టాక్ వీడియోలు చేస్తూ సోషల్ మీడియాలో పోస్టు చేస్తుంది. పెద్ద సంఖ్యలో ఫాల్లోవర్స్‌ను కూడా సంపాదించింది. ఇంతవరకు బాగానే ఉంది గానీ.. ఇటీవలే ఆమెకు కరోనా వైరస్ సోకింది. ఆస్పత్రిలో చేర్పించి చికిత్స అందిస్తున్నారు. అయితే.. ఐసోలేషన్ వార్డులోనూ ఆమె టిక్ టాక్‌ను వదల్లేదు. శానిటైజేషన్ సిబ్బందితో కలిసి టిక్ టాక్ వీడియో చేసింది. ఈసారి ఓ స్యాడ్ సాంగ్ అందుకుంది. గంటల వ్యవధిలోనే కరోనా వైరస్‌లా ఆ వీడియో వైరల్ అయింది. రంగంలోకి దిగిన అధికారులు 25 ఏళ్ల ఆ మహిళతో కలిసి టిక్ టాక్ వీడియో చేసిన శానిటైజేషన్ సిబ్బందిని సస్పెండ్ చేశారు. వారిని వెంటనే క్వారంటైన్‌కు తరలించారు. తమిళనాడులోని అరియలూర్ జిల్లాలో ఈ ఘటన చోటు చేసుకుంది.

అరియలూర్ జిల్లాకు చెందిన ఓ యువతి (25) చెన్నైలో ఓ షాపింగ్ మాల్‌లో పనిచేస్తోంది. ఖాళీ దొరికినప్పుడల్లా టిక్‌టాక్‌తో కాలక్షేపం చేయడం ఆమెకు సరదా. ఇటీవల ఆమె జ్వరం, దగ్గు లక్షణాలతో ఆస్పత్రిలో చేరింది. పరీక్షించగా మార్చి 26న కరోనా పాజిటివ్‌గా తేలింది. నాటి నుంచి ఆమెను అరియలూర్ జిల్లా కేంద్రంలోని ప్రభుత్వ ఆస్పత్రిలో ఐసోలేషన్ వార్డులో ఉంచి చికిత్స అందిస్తున్నారు.

ఐసోలేషన్ వార్డులో ఉన్న బాధిత మహిళ మార్చి 28న టిక్‌టాక్ వీడియో చేసింది. ఓ బాధాకరమైన పాట ఎంచుకొని కరోనాతో తాను ఎలాంటి తిప్పలు పడుతున్నానో వివరించింది. ఆ వీడియో చేయడానికి వార్డులోని ముగ్గురు సిబ్బంది కూడా సహకరించారు. ఈ వీడియో కాస్త వైరల్‌గా మారడంతో అధికారులు చర్యలు చేపట్టారు. ఆమెకు సహకరించిన ముగ్గురు పారిశుద్ధ్య సిబ్బందిని విధుల నుంచి తొలగించారు. వారిని వెంటనే క్వారంటైన్‌కు తరలించారు.