కన్నడ నటుడితో బాడ్మింటన్‌ ప్లేయర్ గుత్తా జ్వాల డేటింగ్

బాడ్మింటన్‌ క్రీడాకారిణి గుత్తా జ్వాల తన పెళ్లి విషయంలో జరుగుతున్న ప్రచారంపై స్పష్టత ఇచ్చింది. కన్నడ నటుడు విష్ణు విశాల్‌తో తాను డేటింగ్‌లో ఉన్నానని.. త్వరలోనే తామిద్దరం పెళ్లి బంధంతో ఒక్కటవనున్నామని వెల్లడించింది. పెళ్లి ముహూర్తం ఖరారైన తర్వాత ఆ విషయాన్ని అధికారికంగా వెల్లడిస్తామని తెలిపింది. కన్నడ నటుడు విష్ణు విశాల్‌తో గుత్తా జ్వాల సన్నిహితంగా ఉన్న ఫోటోలో కొన్ని రోజులుగా సోషల్ మీడియాలో చక్కర్లు కొడుతున్నాయి. దీంతో వారిద్దరూ ప్రేమలో ఉన్నట్లు ప్రచారం జరుగుతోంది. ఈ నేపథ్యంలో వీరి బంధంపై ఆమె స్పష్టత ఇచ్చింది. వీరిద్దరూ గతంలో మరో వ్యక్తులను పెళ్లి చేసుకొని విడాకులు పొందిన వారే కావడం గమనార్హం. గుత్తా జ్వాల ఆరేళ్ల వైవాహిక జీవితం తర్వాత విడాకులు తీసుకోగా.. విష్ణు విశాల్ ఏడేళ్ల వైవాహిక జీవితం తర్వాత విడాకులు తీసుకున్నాడు. ‘అవును.. మేమిద్దరం డేటింగ్‌లో ఉన్నాం. ఇందులో దాచుకోవడానికి ఏమీ లేదు. త్వరలోనే మా వివాహం జరుగనుంది. పెళ్లి తేదీ ఖరారైన తర్వాత లేదా పెళ్లి ఏర్పాట్లు ప్రారంభించినప్పుడు మేమే అధికారికంగా ప్రకటిస్తాం’ అని గుత్తా జ్వాల పేర్కొంది. కొన్ని రోజుల కిందట ఓ మీడియా ప్రతినిధికి ఇచ్చిన ఇంటర్వ్యూలో ఆమె ఈ విషయం చెప్పింది. తాజాగా ఆమె చేసిన ట్వీట్ ద్వారా ఈ విషయంపై అభిమానులకు ఓ క్లారిటీ వచ్చింది. విష్ణు విశాల్‌తో సన్నిహితంగా తీసుకున్న ఫొటోలను గుత్తా జ్వాల గుత్తా మార్చి 28న ట్విటర్‌ ద్వారా షేర్ చేసింది. తనను చాలా మిస్ అవుతున్నట్లు కామెంట్ పెట్టింది. దీనికి విష్ణు విశాల్ ఆసక్తికరంగా బదులిచ్చాడు. ‘ఇట్స్ ఓకే.. ఇప్పుడు సామాజిక దూరం పాటించడమే ముఖ్యం. అందరి కోసం ప్రార్థిద్దాం..’ అని విష్ణు విశాల్ బదులిచ్చాడు. కరోనా వైరస్ లాక్‌డౌన్ నేపథ్యంలో అతడు ఈ వ్యాఖ్యలు చేశాడు. గుత్తా జ్వాల 2005లో బాడ్మింటన్‌ క్రీడాకారుడు చేతన్‌ ఆనంద్‌ను పెళ్లి చేసుకున్న విషయం తెలిసిందే. ఆరేళ్ల వైవాహిక జీవితం అనంతరం వారిద్దరూ విడిపోయారు. నాటి నుంచి గుత్తా జ్వాల తన తల్లిదండ్రులతో కలిసి ఉంటోంది. నటుడు విష్ణు విశాల్‌ 2011లో కాస్ట్యూమ్‌ డిజైనర్‌ రజనీ నటరాజ్‌ను పెళ్లి చేసుకున్నాడు. ఏడేళ్ల వైవాహిక జీవితం తర్వాత మనస్పర్ధలు వచ్చి 2018లో వీరిద్దరూ విడాకులు తీసుకున్నారు. ‘లోకంలో కచ్చితత్వం లేదు. ఏదైనా ఎప్పుడైనా జరగొచ్చు. నేను గ్రహించిన విషయం ఇదే’ అని విష్ణు విశాల్ గతంలో ఒకసారి తన విడాకుల విషయంపై అడిగిన ప్రశ్నకు బదులిస్తూ వ్యాఖ్యానించాడు. తాజాగా గుత్తా జ్వాల, విష్ణు విశాల్ పెళ్లి అంశం హాట్ టాపిక్‌గా మారింది.

Its oki..Right now social distancing is important..pray for all... https://t.co/al7iPw261N

mdash; VISHNU VISHAL - VV (@TheVishnuVishal) March 28, 2020