ఉబెర్ శుభవార్త...అందుబాటులోకి ఉచిత సర్వీసులు

     Written by : smtv Desk | Sat, Apr 04, 2020, 08:50 PM

ఉబెర్ శుభవార్త...అందుబాటులోకి ఉచిత సర్వీసులు

ప్రముఖ ట్యాక్సీ సేవల సంస్థ ఉబెర్ తాజాగా శుభవార్త అందించింది. ఉచిత సర్వీసులు అందిస్తున్నట్లు ప్రకటించింది. అయితే ఈ సర్వీసులు అందరికీ అందుబాటులో ఉండవు. కేవలం కరోనా వైరస్‌ను ఎదుర్కొనేందుకు విశేష సేవలు అందిస్తున్న వైద్య సిబ్బందికి మాత్రమే ఉచిత క్యాబ్ సేవల లభిస్తాయి. పలు మెట్రో నగరాల్లో ఈ ఉచిత సర్వీసులు అందుబాటులో ఉంటాయి.

ఉబెర్ వైద్య సిబ్బంది కోసం ఉచితంగా క్యాబ్ సర్వీసులు అందించడం కోసం జాతీయ ఆరోగ్య సంస్థ (నేషనల్ హెల్త్ అథారిటీ)తో భాగస్వామ్యం కుదుర్చుకుంది. దీంతో దేశవ్యాప్తంగా కోవిడ్ 19 వ్యాప్తిని అడ్డుకునేందుకు, కరోనా పేషంట్లకు సేవలు అందిస్తున్న వైద్య సిబ్బందికి ప్రయోజనం కలుగనుంది. ఆరోగ్య కార్యకర్తలకు, వైద్య సిబ్బందికి సురక్షితమైన రవాణా అందించేందుకు ఈ నిర్ణయం తీసుకున్నట్లు ఉబెర్ తెలిపింది.


శరవేగంగా విస్తరిస్తూ వస్తున్న కరోనా వైరస్‌పై పోరాటంలో ముందు నిలిచిన ఆరోగ్య కార్యకర్తలకు సాయం అందించేందుకు ఉబెర్‌తో జతకట్టామని, వారికి ఉచిత ప్రయాణాన్ని అందిస్తామని నేషనల్ హెల్త్ అథారిటీ (ఎన్‌హెచ్‌ఏ) సీఈవో ఇందు భూషణ్ తెలిపారు. ఇకపోతే ఈయన ఆయష్మాన్ భారత్ ప్రధాన్ మంత్రి జన్ ఆరోగ్య యోజన సీఈవోగా కూడా ఉన్నారు.


ఉబర్ ఇండియా ఇటీవలనే ఉబెర్ మెడిక్ కార్స్ రూపంలో ప్రత్యేక సేవలు ప్రారంభించింది. ఈ మెడిక్ కార్స్ సర్వీసుల ద్వారానే ఇప్పుడు వైద్య సిబ్బందికి కూడా సేవలు అందిస్తామని కంపెనీ తెలిపింది. తొలిగా ఢిల్లీ, నోయిడా, ఘజియాబాద్, కాన్పూర్, లక్నో, ప్రయాగ్‌రాజ్, పాట్నా వంటి ప్రాంతాల్లో ఉచితంగా క్యాబ్ సర్వీసులు అందిస్తామని పేర్కొంది. దీని కోసం ప్రత్యేకంగా తయారు చేసిన 150 కార్లను ఉపయోగిస్తామని తెలిపింది.

అలాగే కేంద్ర ప్రభుత్వం జారీ చేసిన మార్గదర్శకాలకు అనుగుణంగా.. భద్రత, పరిశుభ్రతకు సంబంధించి అత్యున్నత ప్రమాణాలను ఈ ఉచిత క్యాబ్ సర్వీసులు అమలు చేస్తామని ఉబెర్ ఇండియా తెలిపింది. రైడ్ ముగిసిన తర్వాత కార్లను శానిటైజ్ చేస్తామని పేర్కొంది. డ్రైవర్లకు కూడా మాస్క్‌లుతోపాటు శానిటైజర్లు వంటివి అందజేస్తామని తెలిపింది.





Untitled Document
Advertisements