బడ్జెట్‌లో కొత్త ట్యాక్స్ సిస్టమ్..పాత పన్ను విధానం కొనసాగింపు!

కేంద్ర ఆర్థిక మంత్రి నిర్మలా సీతారామన్ బడ్జెట్‌లో కొత్త పన్ను విధానాన్ని ప్రతిపాదించారు. ఇందులో ఎక్కువ ట్యాక్స్ స్లాబ్స్ (7) ఉన్నాయి. అలాగే పన్ను రేట్లు తక్కువగా ఉంటాయి. అయితే పన్ను మినహాయింపులు ఉండవు. పాత పన్ను విధానంలో ట్యాక్స్ స్లాబ్స్ తక్కువగా (4) ఉంటాయి. కానీ రేట్లు ఎక్కువ. అలాగే పన్ను మినహాయింపు ప్రయోజనాలు కూడా పొందొచ్చు.

పన్ను చెల్లించే సగటు ఉద్యోగి పాత పన్ను విధానంలో రూ.8.25 లక్షల వరకు తగ్గింపు పొందొచ్చు. ఈ లెక్కన రూ.18.25 లక్షల వార్షిక స్థూల ఆదాయం కలిగిన వారు కొత్త ట్యాక్స్ సిస్టమ్‌తో పోలిస్తే పాత పన్ను విధానంలో రూ.1.8 లక్షల వరకు ప్రయోజనం పొందొచ్చు. పాత విధానం ప్రకారం రూ.1.17 లక్షల పన్ను కట్టాలి. అదే కొత్త విధానంలో అయితే రూ.2.96 లక్షల పన్ను పడుతుంది. అంటే పాత పన్ను విధానం ఎంచుకుంటే దాదాపు రూ.1.8 లక్షలు ఆదా అవుతుంది.

అదే వేతన జీవులు కాకుండా స్వయం ఉపాధి పొందుతున్న వారు శాలరీపై స్టాండర్డ్ డిడక్షన్ రూ.50 వేల తగ్గింపు పొందలేరు. అయినాకూడా పాత పన్ను విధానంలో కొత్త ట్యాక్స్ సిస్టమ్‌తో పోలిస్తే రూ.1.63 లక్షలు ఆదా చేసుకోవచ్చు. రూ.17.75 లక్షల వార్షిక స్థూల ఆదాయం పొందుతున్న వారికి ఇది వర్తిస్తుంది. అందువల్ల ట్యాక్స్ సిస్టమ్ ఎంచుకునే సమయంలో జాగ్రత్తగా వ్యవహరించండి.

ఇక కొత్త పన్ను చెల్లింపు విధానం ప్రకారం.. రూ.2.5 లక్షల వరకు ఎలాంటి పన్ను ఉండదు. రూ.2,50,001 నుంచి రూ.5 లక్షలలోపు ఆదాయంపై 5 శాతం పన్ను పడుతుంది. దీన్ని రిబేట్ పొందొచ్చు. రూ.5,00,001 నుంచి రూ.7.5 లక్షల వరకు ఆదాయం ఉంటే 10 శాతం పన్ను పడుతుంది.

రూ.7,50,001 నుంచి రూ.10 లక్షలలోపు ఆదాయంపై 15 శాతం ట్యాక్స్ కట్టాలి. రూ.10,00,001 నుంచి రూ.12.5 లక్షలలోపు ఆదాయంపై 20 శాతం, 12,50,001 నుంచి రూ.15 లక్షలలోపు ఆదాయంపై 25 శాతం పన్ను, రూ.15 లక్షలకు పైన ఇన్‌కమ్‌పై 30 శాతం ట్యాక్స్ పడుతుంది. సర్‌చార్జ్, సెస్ వంటివి పన్ను రేటుకు అదనంగా చెల్లించాలి.

పాత పన్ను విధానంలో రూ.2.5 లక్షల వరకు ఆదాయంపై ఎలాంటి పన్ను ఉండదు. రూ.2,50,001 నుంచి రూ.5 లక్షల వరకు ఆదాయంపై 5 శాతం పన్ను పడుతుంది. అదే రూ.5,00,001 నుంచి రూ.10 లక్షల వరకు ఆదాయంపై 20 శాతం ట్యాక్స్ కట్టాలి. ఇక రూ.10 లక్షలకు పైన ఆదాయంపై 30 శాతం పన్ను పడుతుంది.