ఆమీర్ ఖాన్ ఇంట్లో కరోనా కలకలం...

Written by : smtv Desk | Tue, Jun 30, 2020, 04:53 PM

బాలీవుడ్ ఇండస్ట్రీలో కరోనా కలకలం సృష్టిస్తోంది. ఇప్పటికే అనేకమంది ప్రముఖులు కరోనా బారిన పడ్డారు. తాజాగా బాలీవుడ్ ప్రముఖ హీరో ఆమీర్ ఖాన్ ఇంటికి కరోనా సోకింది. ఈ విషయాన్ని ఆమీర్ ఖాన్ సోషల్ మీడియా వేదికగా తెలిపారు. తన సిబ్బందిలో కొందరికి కరోనా వైరస్ సోకినట్లు నిర్ధారించినట్లుగా పేర్కొన్నాడు. ఈ విషయంపై వెంటనే స్పందించిన ముంబై మున్సిపల్ కార్పోరేషన్ అధికారులకు ఆమీర్ ధన్యవాదాలు తెలిపాడు.
అంతేకాకుండా కరోనా సోకిన తన సిబ్బందికి ఎలాంటి సాయం కావాలన్న తాను చేయడానికి సిద్ధంగా ఉన్నానన్నాడు. వైరస్ సోకిన వారిని క్వారంటైన్‌కు తరలించారన్నారు ఆమీర్. కోకిల బెన్ ఆస్పత్రి సిబ్బందికి కూడా ఆయన ధన్యవాదాలు తెలిపారు. కరోనా టెస్టుల విషయంలో ఆస్పత్రి డాక్టర్లు, సిబ్బంది,నర్సులు ఎంతో జాగ్రత్తగా వ్యవహరించారన్నారు. ఇక దేశంలో కరోనా ప్రమాద స్థాయి రోజురోజుకీ పెరిగిపోతుందని ఆందోళన వ్యక్తం చేశారు ఆమీర్ ఖాన్. ముంబైలో ఇప్పటికే లక్ష కేసులు దాటిపోయాయన్నాడు. దాంతో అంతా అప్రమత్తంగా ఉండాలని సూచించాడు. తన తల్లికి కూడా కరోనా పరీక్షలు నిర్వహించాల్సి ఉందన్నాడు. అయితే ఆమెకు నెగిటివ్ రావాలని భగవంతుడ్ని ప్రార్థిస్తూ అభ్యర్థించాడు ఆమీర్ ఖాన్.

ఇప్పటికే బాలీవుడ్‌లో చాలా మంది సెలబ్రిటీస్ కరోనా బారిన పడ్డారు. సంగీత దర్శకుడు వాజిద్ ఖాన్ కరోనాతో చనిపోయారు. ప్రముఖ నిర్మాతలు కరీం మోరాని ఇంట్లో కూడా ఆయనతో ఇద్దరు కూతుళ్లు కూడా కరోనా బారిన పడ కోలుకున్నారు. బోనీ కపూర్ ఇంట్లో కూడా పనిచేసే సిబ్బంది కరోనా వైరస్ సోకిన విషయం తెలిసిందే. దీంతో ఇప్పుడు ఆమీర్ ఖాన్ ఇంట్లో కూడా కరోనా విషయంలో ఆందోళన నెలకొంది.