రుణ గ్రహీతలకు తీపికబురు...రుణ రేట్ల తగ్గింపు!

     Written by : smtv Desk | Wed, Jul 01, 2020, 11:45 AM

కొత్త నెల ఆరంభంలోనే ప్రైవేట్ రంగ ప్రముఖ బ్యాంక్ ఐసీఐసీఐ బ్యాంక్ తన కస్టమర్లకు శుభవార్త అందించింది. రుణ రేట్లు తగ్గిస్తున్నట్లు ప్రకటించింది. దీంతో బ్యాంక్ నుంచి రుణం తీసుకున్న వారికి ప్రయోజనం కలుగనుంది. అలాగే కొత్త రుణాలపై వడ్డీ రేట్లు కూడా దిగిరానున్నాయి.

ఐసీఐసీఐ బ్యాంక్ రుణ రేట్లను 0.15 శాతం మేర తగ్గించింది. దీంతో హోమ్ లోన్, వెహికల్ లోన్, పర్సనల్ లోన్ తీసుకున్న వారికి ఈఎంఐ భారం దిగివస్తుంది. కేవలం ఐసీఐసీఐ బ్యాంక్ మాత్రమే కాకుండా ఇటీవల ఇతర బ్యాంకులు కూడా రుణ రేట్లను తగ్గించిన విషయం తెలిసిందే.కాగా ఐసీఐసీఐ బ్యాంక్ గత నెలలో అన్ని రకాల డిపాజిట్లపై కూడా వడ్డీ రేట్లను తగ్గించేసింది. 0.25 శాతం మేర కోత విధించింది. దీంతో ఇప్పుడు ఐసీఐసీఐ బ్యాంక్‌లో డబ్బులు డిపాజిట్ చేసే వారికి 3 శాతం వడ్డీ రేటు మాత్రమే వర్తిస్తుంది. రూ.50 లక్షల లోపు డిపాజిట్లకు ఇది వర్తిస్తుంది. అదే ఆపైన డిపాజిట్లకు అయితే 3.5 శాతం వడ్డీ వస్తుంది.

అలాగే బ్యాంక్ గత నెలలో టర్మ్ డిపాజిట్ రేట్లలో కూడా కోత విధించింది. ఏడాది నుంచి 389 రోజుల ఎఫ్‌డీలపై (ప్రిమెచ్యూర్ విత్‌డ్రాయెల్ ఫెసిలిటీ) వడ్డీ రేటు 5.15 శాతానికి తగ్గింది. రూ.5 కోట్లలోపు ఎఫ్‌డీలకు ఇది వర్తిస్తుంది. 18 నెలల 1 రోజు నుంచి రెండేళ్ల కాల పరిమితిలోని ఫిక్స్‌డ్ డిపాజిట్లపై వడ్డీ రేటు 5.35 శాతానికి దిగొచ్చింది. రెండేళ్ల ఒక్క రోజు నుంచి మూడేళ్ల కాల పరిమితిలోని ఎఫ్‌డీలపై కూడా ఇదే వడ్డీ రేటు వర్తిస్తుంది. ఇక మూడేళ్ల ఒక రోజు నుంచి ఐదేళ్ల కాల పరిమితిలోని ఎఫ్‌డీలపై 5.5 శాతం వడ్డీ వస్తుంది.





Untitled Document
Advertisements