వెబ్ సైట్‌కు కంచరపాలెం దర్శకుడి సవాల్

‘కేరాఫ్ కంచరపాలెం’ అనే మొదటి సినిమాతోనే అంతర్జాతీయ గుర్తింపు సంపాదించి.. తెలుగుసినిమా కీర్తినిపెంచిన దర్శకుడు వెంకటేష్ మహా. విశాఖపట్నంలోని కంచరపాలెం అనే ఊరు.. అక్కడ నేటివిటీ ఆధారంగా చేసుకుని ‘కేరాఫ్ కంచరపాలెం’ అనే అద్భుత చిత్రాన్ని రూపొందించారు వెంకటేష్ మహా.
సరికొత్త కథతో.. సుబ్బారావు, రాధ బెస్సీ, కేశవ కర్రీ, నిత్య శ్రీ, కార్తీక్‌ రత్నం, విజయ ప్రవీణ, మోహన్‌ భగత్‌, ప్రణీత పట్నాయక్‌ లాంటి 52 మంది కొత్త వాళ్లతో.. సినిమా మొత్తం డబ్బింగ్ లేకుండా.. లైవ్ రికార్డింగ్‌ అనే కొత్త ప్రయోగంతో ‘కేరాఫ్ కంచరపాలెం’ చిత్రాన్ని గుండెలకు హత్తుకునే విధంగా తీశారు కొత్త దర్శకుడు వెంకటేష్ మహా. నటన వచ్చినవాళ్లతో కాకుండా కంచరపాలెం అనే ఊరికి వెళ్లి అక్కడ తాను రాసుకున్న పాత్రలను చేయగలిగే వారిని పట్టుకుని వాళ్లకు నటన నేర్పి మరీ ఈ సినిమాను తీశాడు వెంకటేష్ మహా. సెప్టెంబర్ 7, 2018లో విడుదలైన ఈ మూవీ విమర్శల ప్రశంసలు దక్కించుకోవడమే కాదు.. ఎంతో మంది సినీ మేధావులు, రాజమౌళి, సుకుమార్, క్రిష్ లాంటి మహామహుల ప్రశంసలు దక్కాయి. ప్రస్తుతం వెంకటేష్ మహా.. ‘ఉమా మహేశ్వర ఉగ్రరూపస్య’ అను చిత్రాన్ని రూపొందిస్తున్నారు.
ఈ టాలెంటెడ్ దర్శకుడ్ని కించపరుస్తూ.. నెగిటివ్ కథనాలు ప్రచురిస్తున్న ఓ వెబ్ సైట్‌ ఫైర్ అయ్యారు వెంకటేష్ మహా. ఈ వెబ్ సైట్‌ను ఇన్ డైరెక్ట్‌గా ఏకిపారేస్తూ.. తన ఫేస్ బుక్‌లో వైరల్ పోస్ట్ పెట్టారు. అందులో వెంకటేష్ మహా ఏమన్నారంటే.. ‘వాడేసుకున్నారా? ఇంత ఆలస్యం అయ్యిందేంటి...? సామాజిక మాధ్యమం కోసం జరిగే ముఖాముఖీల్లొ, పది ప్రశ్నలకి సంబంధించిన పది సమాధానాలని, ఒకే ప్రశ్నకి కుదించి రాస్తుంటారు, ఆ ప్రక్రియ ఒక్కోసారి అపార్ధాలకి కారణం కావచ్చు. అది గమనించిన కొన్ని #Tupakiలు, మనపైన బురద పేల్చడానికి (అదే.. జల్లడానికి) ప్రయత్నిస్తాయి. అటువంటి అంతర్జాల #Tupakiలన్నిటికి నా గమనిక.. మీరు మీ #Tupakiలని ఎక్కుపెట్టే ముందు, మీ కళ్ళు నిమురుకుని ఒక్కసారి సరిగ్గా చూడండి, నా "టంగుటూరి ఛాతి" కనబడుతుంది. మెదలకుండా పనిచేసుకునే నాలో నిదురోతున్న "ఆ ప్రకాశాన్ని" తట్టమాకండి, అతగాడు మేలుకుంటే, స్వాతంత్ర్యం తెచ్చెయ్యగలడు మరి. మీలాంటి #Tupakiల నుండి మాకు, అలాగే మిమ్మల్ని గ్రుడ్డిగా నమ్మే ప్రజలకి.
అపార్ధపు ఆలోచనలను మా పరిశ్రమలొ అలాగే ప్రజలలొ ప్రవేశపెట్టలనే నీ #Tupaki గుండు తాపత్రయం నాకు అర్ధమయ్యింది, రెండు సినిమాలకే మట్లాడేస్తున్నాడు అని రాసావే.. నీదేమి పత్రికారచన? నువ్వేమి విలేఖరివి? రెండు సినిమాల వాడికైనా, నూటరెండు సినిమాల వాడికైనా, లేక రెండేళ్ళ పిల్లాడైనా ప్రాధమిక హక్కులు సమానం అనే విషయాన్ని గ్రహించలేని నీది ఒక పత్రికారచన. ఇకపై మా సదుద్దేశాలని కించపరిచి, వక్రీకరించే ముందు మీ #Tupakiల్లాంటి వారంతా ఒకటి గుర్తు పెట్టుకోండి.
మేము సినిమా వాళ్ళం.. మా కలాలు మీ కీబోర్డులకన్నా వెయ్యిరెట్లు పదునైనవి.. మా మెదళ్ళు మీ మెదళ్ళకన్నా భరువైనవి.. మా పని మీ పనికి తల్లివంటిది.. మా పనికి హానితలపెట్టాలని చూడటం మీ తల్లి రొమ్మును గుద్దడం సమానం.
సినీ ప్రేక్షకులందరికి నా విజ్ఞప్తి, ఇలాంటి #Tupakiగుండ్లకి గురి మీ మెదళ్ళూ వాటి ఆలోచనల మీదే. ఇటువంటి ద్వేషాభావాన్ని పెంపొందించే, సామాజిక మాధ్యమ పత్రికారచనలను అనుసరిస్తే మనందరికి ప్రశాంతత లేమితో పాటు, మన సాంస్కృతిక వికాసానికి ఏమాత్రమూ తోడ్పడదని నా గౌరవనీయ మనవి. ఓపిక కల్గిన వారు ఈ సందేశాన్ని ఆంగ్లములోకి తర్జుమా చెయ్యగలరు. నమస్కారం’ అంటూ ఫేస్ బుక్‌లో ఎమోషనల్ పోస్ట్ పెట్టారు యువ దర్శకుడు వెంకటేష్ మహా.