కర్ణాటక పీసీసీ చీఫ్‌గా ప్రమాణస్వీకారం చేసిన డీకే శివకుమార్

కాంగ్రెస్ సీనియర్ నేత డీకే శివకుమార్ కర్ణాటక పీసీసీ చీఫ్‌గా బాధ్యతలు స్వీకరించారు. గురువారం ఉదయం 10.30 గంటలకు ఆయన కేపీసీసీ చీఫ్‌గా ప్రమాణ స్వీకారం చేశారు. ఈ కార్యక్రమానికి తెలంగాణ పీసీసీ చీఫ్ ఉత్తమ్ కుమార్ రెడ్డి హాజరయ్యారు. ‘‘కర్ణాటక కాంగ్రెస్ అధ్యక్షుడిగా సీనియర్ సహచరుడు, శ్రేయోభిలాషి, మంచి మిత్రుడైన డీకే శివకుమార్ ప్రమాణ స్వీకారం చేశారు. ఈ రోజు (జులై 2)న బెంగళూరులో ఈ కార్యక్రమానికి హాజరయ్యాను. కర్ణాటకలో మళ్లీ అద్భుతమైన రోజులను చూస్తాం’’ అని ఉత్తమ్ ట్వీట్ చేశారు. డీకేతో దిగిన సెల్ఫీని ఆయన పోస్టు చేశారు. లక్షలాది మంది కార్యకర్తల సమక్షంలో పార్టీ చీఫ్‌గా పగ్గాలు చేపట్టాలని డీకే భావించారు. కానీ కరోనా వ్యాప్తి.. లాక్‌డౌన్ ఆంక్షల నేపథ్యంలో 50 మంది మాత్రమే ఈ కార్యక్రమానికి హాజరయ్యారు. కానీ పార్టీ కార్యకర్తలు లైవ్ ద్వారా డీకే ప్రమాణ స్వీకార కార్యక్రమాన్ని తిలకించడం కోసం రాష్ట్రవ్యాప్తంగా 7200 భారీ టీవీ తెరలను ఏర్పాటు చేశారు.

కర్ణాటక ఉప ఎన్నికల్లో పార్టీ ఓటమికి నైతిక బాధ్యత వహిస్తూ.. గుండు రావు గత ఏడాది డిసెంబర్ 9న కర్ణాటక పీసీసీ చీఫ్ పదవికి రాజీనామా చేశారు. ఆ ఉపఎన్నికల్లో బీజేపీకి 15 సీట్లు రాగా.. కాంగ్రెస్ రెండు స్థానాలకే పరిమితమైంది. దీంతో డీకే శివకుమార్‌కు పీసీసీ బాధ్యతలను అప్పగిస్తున్నట్లు కాంగ్రెస్ పార్టీ ఐదు నెలల క్రితం ప్రకటించింది.ఒక్కలిగ సామాజిక వర్గానికి చెందిన డీకే శివకుమార్ ఏడుసార్లు ఎమ్మెల్యేగా గెలుపొందారు. ప్రస్తుతం కనకపుర నియోజకవర్గానికి ఎమ్మెల్యేగా ప్రాతినిధ్యం వహిస్తున్నారు. గత మూడేళ్లుగా డీకే బీజేపీతో ఢీ అంటే ఢీ అనేలా తలపడుతున్నారు. అక్రమాస్తుల కేసులో అరెస్ట్ అయిన ఆయన రెండు నెలల తర్వాత తిహార్ జైలు నుంచి బెయిల్ మీద బయటకొచ్చారు. ఇటీవలే ఆయన కుమార్తె ఐశ్వర్య ఎంగేజ్‌మెంట్ అమర్త్యతో జరిగింది. డీకే స్నేహితుడు, కాఫీ డే వ్యవస్థాపకుడు దివంగత వీజీ సిద్ధార్థ కుమారుడే అమర్త్య. వీజీ సిద్ధార్థ కర్ణాటక మాజీ సీఎం సీఎం కృష్ణ అల్లుడనే సంగతి తెలిసిందే.
శివ కుమార్ సోదరుడు డీకే సురేశ్ బెంగళూరు రూరల్ నుంచి రెండోసారి ఎంపీగా గెలుపొందారు. 2019 లోక్ సభ ఎన్నికల్లో కాంగ్రెస్ తరఫున పోటీ చేసిన తన ఎంపీ సీటును మళ్లీ దక్కించుకున్న ఏకైక నేత సురేశ్ కావడం గమనార్హం.