కరోనా వల్ల తగ్గిపోతున్న వీర్య కణాలు!?

Written by : smtv Desk | Thu, Jul 02, 2020, 06:13 PM

క‌రోనా వైరస్ సోకడం వల్ల వ్యక్తి ఎదుర్కొనే ఓ సమస్యను రష్యాకు చెందిన పరిశోధకులు గుర్తించారు. కొవిడ్-19 సోకిన వారిలో వీర్య కణాల సంఖ్య తగ్గుతున్నట్లుగా అధ్యయనంలో తేలింది. అంతేకాక, ఇది వంధ్యత్వానికి (ఇన్‌ఫర్టిలిటీ) కూడా దారితీసే ప్రమాదం లేకపోలేదని రష్యా ఆరోగ్యమంత్రిత్వశాఖ వెల్లడించింది. తమ వైద్య నిపుణులు పరిశీలించిన అధ్యయనం ద్వారా నమోదు చేసిన ఫలితాలను మాస్కోకు చెందిన చీఫ్ గైనకాలజిస్ట్ ఎలినా బుధవారం వెల్లడించారు. కొవిడ్‌-19తో బాధ‌ప‌డిన వారిలోనే వంధ్యత్వ సమస్య అధికంగా ఉన్నట్లు గుర్తించామని తెలిపారు.
కరోనా వైర‌స్ నుంచి కోలుకున్న మ‌గ‌వారిలో 38 శాతం వీర్య క‌ణాల సంఖ్య త‌గ్గిన‌ట్లు ర‌ష్యా వైద్య నిపుణులు గుర్తించారు. ఇది ఆందోళ‌న క‌లిగిస్తున్న అంశ‌మ‌ని పేర్కొన్నారు. నిజానికి రష్యాకు చెందిన పురుషుల్లో వీర్యకణాల నాణ్యత తక్కువే ఉంటుండగా.. కొవిడ్ ప్రభావంతో వారిలో మరింత నాసిరకంగా వీర్యకణాల సంఖ్య గుర్తించినట్లుగా తేలింది.

అయితే, వీర్యకణాల్లోకి కూడా వైర‌స్ చొచ్చుకుపోతున్నట్లుగా ఇప్పటికే కొన్ని అధ్యయనాలు వెల్లడించాయి. క‌రోనా వైర‌స్ వృష‌ణాల‌ను పాక్షికంగా దెబ్బతీసే అవ‌కాశం ఉన్నట్లుగా చైనా-అమెరికా గతంలో నిర్వహించిన ఓ అధ్యయనంలో తేలింది.

మరోవైపు, రష్యాలో కరోనా కేసుల సంఖ్య గురువారానికి 6,61,165కు చేరింది. గురువారం ఒక్కరోజే ఇక్కడ 6,760 కరోనా కేసులను గుర్తించారు. గత 24 గంటల్లో రష్యా వ్యాప్తంగా 147 మంది చనిపోయారు. దీంతో ఇప్పటి వరకూ రష్యాలో చనిపోయిన వారి సంఖ్య 9683కి చేరినట్లుగా రాయిటర్స్ వార్తా సంస్థ వెల్లడించింది.