చైనా వివాదం: చర్చల ద్వార సమస్య పరిష్కారం!

భారత్‌కు చెడు తలపెట్టాలని చూసేవారికి దీటైన సమాధానం ఇస్తామని కేంద్ర న్యాయ శాఖ మంత్రి రవిశంకర్‌ ప్రసాద్‌ పేర్కొన్నారు. గల్వాన్‌ లోయలో జరిగిన ఘర్షణలో 20 మంది భారత జవాన్లు అమరులైతే.. చైనా వైపు ఆ సంఖ్య రెండింతలుగా ఉంటుందని చెప్పారు. ఏడాదిలో పశ్చిమ బెంగాల్‌లో అసెంబ్లీ ఎన్నికలు జరుగనున్న నేపథ్యంలో ఆ రాష్ట్ర బీజేపీ శ్రేణులతో గురువారం (జులై 2)
రవిశంకర్ ప్రసాద్ వర్చువల్‌ ర్యాలీ (వీడియో కాన్ఫరెన్స్) ద్వారా ప్రసంగించారు. ఈ సందర్భంగా చైనా సరిహద్దుల్లో చోటుచేసుకుంటున్న పరిణామాలపై కీలక వ్యాఖ్యలు చేశారు.
‘‘ప్రస్తుతం మనం రెండు ‘సీ’ల గురించే వింటున్నాం. ఒకటి కరోనా వైరస్.‌ మరొకటి చైనా. మనం శాంతిని విశ్వసిస్తాం. చర్చల ద్వారా సమస్యను పరిష్కరించుకుంటామనే నమ్మకం ఉంది’’ అని రవిశంకర్ ప్రసాద్ పేర్కొన్నారు.

చైనాపై డిజిటల్‌ దాడి ప్రారంభించామని మంత్రి రవిశంకర్ ప్రసాద్ చెప్పారు. చైనా సంస్థలకు చెందిన 59 యాప్‌లపై నిషేధం విధించడం ఇందులో భాగమేనని చెప్పుకొచ్చారు. భారతీయుల వ్యక్తిగత డేటా రక్షించేందుకు కట్టుబడి ఉన్నామని తెలిపారు.

గల్వాన్‌ లోయలో జరిగిన ఘర్షణలో ప్రాణాలు కోల్పోయిన జవాన్ల త్యాగం వృథా కానివ్వబోమని ప్రధాని మోదీ అన్న మాటలను మంత్రి రవిశంకర్ ప్రసాద్ గుర్తుచేశారు. ఇండియన్ ఆర్మీ గతంలో పాక్‌ భూభాగంలోకి వెళ్లి సర్జికల్‌ స్ట్రైక్స్‌ చేసిన విషయాన్ని ఈ సందర్భంగా ఆయన ప్రస్తావించారు.

గల్వాన్‌ లోయలో జూన్ 15న రాత్రి జరిగిన ఘర్షణలో భారత్‌ తమ వైపు 20 మంది జవాన్లు మృతి చెందినట్టుగా ప్రకటించగా.. చైనా మాత్రం ఇందుకు సంబంధించి ఎలాంటి అధికారిక ప్రకటన చేయలేదు. నాటి ఘర్షణల్లో చైనా వైపు 40 మందికి పైగా జవాన్లు మరణించినట్లు చైనా ప్రజల సంభాషణను బట్టి తెలుస్తోందని అంతర్జాతీయ మీడియా పేర్కొంది. అమెరికా ఇంటెలిజెన్స్ వర్గాలు కూడా ఇదే విషయాన్ని చెప్పాయి. బీజింగ్ దీన్ని తీవ్ర అవమానంగా భావిస్తున్నట్లు పేర్కొంది.



చైనా బలగాలు దొంగ దెబ్బ తీశాయి. ప్రణాళిక ప్రకారం.. ఇనుప మేకులు అమర్చిన రాడ్లు, రాళ్లు, కర్రలతో భారత సైనికులపై దాడి చేశాయి. చైనా వైపు 300 మందికి పైగా జవాన్లు ఉన్నా.. కల్నల్ సంతోశ్ బాబు వెన్నుచూపలేదు. కేవలం వంద మంది సైనికులతో ఎలాంటి ఆయుధాలు లేకున్నా వారికి దీటుగా బదులిచ్చారు. ఈ క్రమంలో ఆయనతో పాటు 19 మంది జవాన్లు అమరులయ్యారు.