కోపంతో కోచ్ మెడపై కత్తిపెట్టిన పాక్ క్రికెటర్

Written by : smtv Desk | Thu, Jul 02, 2020, 08:06 PM

క్రికెట్ ప్రపంచంలో పాకిస్థాన్ ఆటగాళ్ల స్టయిలే వేరు. ఫిట్‌నెస్ ట్రైనర్‌ల ముందు ప్యాంట్ విప్పి ఎగతాళి చేయడం, కోచ్‌ల ఆదేశాలకి ఎదురుదిరగడం మామూలే. గత ఏడాది ఫిట్‌నెస్ టెస్టులో ఫెయిలైన కమ్రాన్ అక్మల్.. శరీరంలో కొవ్వు ఎక్కడ ఉందో చూపించు..? అంటూ టీమ్ క్యాంప్‌లోనే ప్యాంట్ విప్పి ఫిట్‌నెస్ ట్రైనర్‌‌తో వాగ్వాదానికి దిగాడు. ఇక ఆ దేశానికి చెందిన దిగ్గజ బ్యాట్స్‌మెన్ యూనిష్ ఖాన్ అయితే.. సలహాలు ఇచ్చిన పాపానికి ఏకంగా బ్యాటింగ్ కోచ్ గ్రాంట్ ఫ్లవర్ మెడపైనే కత్తిపెట్టి బెదిరించాడట. ఈ విషయాన్ని తాజాగా గ్రాంట్ ఫ్లవర్ ఓ ఇంటర్వ్యూలో వెల్లడించాడు. పాకిస్థాన్ బ్యాటింగ్ కోచ్‌గా గ్రాంట్ ఫ్లవర్ 2014 నుంచి 2019 వరకూ పనిచేశాడు. ఈ క్రమంలో ఓసారి పాకిస్థాన్ జట్టు ఆస్ట్రేలియా పర్యటనకి వెళ్లగా.. సిరీస్ మధ్యలో ఒక రోజు ఉదయం పాక్ టీమ్ మొత్తం బ్రేక్‌ఫాస్ట్ చేస్తుండగా.. యూనిష్ ఖాన్ పక్కన కూర్చున్న గ్రాంట్ ఫ్లవర్ బ్యాటింగ్‌కి సంబంధించి ఏదో సలహా ఇచ్చాడట. దాంతో.. కోప్పడిపోయిన యూనిష్ ఖాన్.. టేబుల్‌పై ఉన్న కత్తిని తీసుకుని తన మెడపై ఉంచినట్లు గ్రాంట్ ఫ్లవర్ వెల్లడించాడు. యూనిష్ చర్యతో షాక్‌కి గురైన అప్పటి చీఫ్ కోచ్ మిక్కీ ఆర్థర్ అడ్డుపడటంతో ఆరోజు తనకి ఎలాంటి గాయం కాలేదని గ్రాంట్ ఫ్లవర్ చెప్పుకొచ్చాడు. ‘‘యూనిష్‌ ఖాన్‌ని హ్యాండిల్ చేయడం చాలా కష్టం. బ్రిస్బేన్‌లో జరిగిన ఘటన నాకు ఇంకా గుర్తుంది. ఓ టెస్టు మ్యాచ్‌కి ముందు బ్రేక్‌ఫాస్ట్ చేస్తుండగా.. యూనిష్‌కి బ్యాటింగ్‌పై ఓ చిన్న సలహా ఇచ్చా. అంతే.. అతను కోపంతో కత్తిని తీసి నా మెడపై ఉంచాడు. దాంతో నా పక్కనే కూర్చుని ఉన్న మిక్కీ ఆర్థర్ అతడ్ని నిలువరించాడు’’ అని గ్రాంట్ ఫ్లవర్ వెల్లడించాడు. ప్రస్తుతం శ్రీలంక జట్టుకి బ్యాటింగ్‌ కోచ్‌గా గ్రాంట్ ఫ్లవర్ పనిచేస్తుండగా.. పాకిస్థాన్ జట్టుకి యూనిష్ ఖాన్ బ్యాటింగ్ కోచ్‌గా ఇటీవల నియామకం కావడం కొసమెరుపు.