కత్తి మహేష్ కు కరోనా?

తెలుగు రాష్ట్రాల్లో కరోనా వైరస్ విజృంభిస్తోంది. హైదరాబాద్ నగరంలో అయితే పరిస్థితి మరీ దారుణంగా ఉంది. ఈ మధ్యకాలంలో రోజూ 500కు పైగా పాజిటివ్ కేసులు హైదరాబాద్‌లో నమోదవుతున్నాయి. లాక్‌డౌన్ నుంచి చాలా వరకు సడలింపులు ఇచ్చిన తరవాత నుంచి కేసుల సంఖ్య పెరుగుతూ వస్తోంది. టీవీ, సినిమా షూటింగ్‌లు ప్రారంభం కావడంతో అక్కడ కూడా పాజిటివ్ కేసులు నమోదవుతున్నాయి. ఇప్పటికే ఇద్దరు టీవీ నటులకు కోవిడ్ పాజిటివ్ అని తేలింది. సినీ నిర్మాత బండ్ల గణేష్ కరోనా నుంచి కోలుకున్నారు. అయితే, సాధారణ వ్యక్తులకు కరోనా సోకింది అనే వార్త కన్నా సెలబ్రిటీలకు కోవిడ్-19 పాజిటివ్ వచ్చిందనే సమాచారాన్ని ప్రజలు ఆసక్తికరంగా చదువుతారు. అందుకే, కొంత మంది సోషల్ మీడియాలో సెలబ్రిటీలకు కరోనాపై ఫేక్ న్యూస్ స్ప్రెడ్ చేస్తున్నారు. తాజాగా ప్రముఖ సినీ విమర్శకుడు కత్తి మహేష్‌పై ఇలాంటి వార్తే వైరల్ అయ్యింది. కత్తి మహేష్‌కు కరోనా పాజిటివ్ అని సోషల్ మీడియాలో ఎవరో పోస్ట్ చేశారు. దీంతో ఈ సమాచారం వైరల్‌గా మారింది. కొంత మంది కత్తి మహేష్‌కు ఫోన్ చేసి మీకు కరోనా వచ్చిందా అని అడగడం మొదలుపెట్టారు. దీంతో కత్తి మహేష్ స్పందించారు. తనకు కరోనా సోకిందనే రూమర్‌పై వివరణ ఇస్తూ కత్తి మహేష్ ఫేస్ బుక్‌లో ఒక వీడియో పోస్ట్ చేశారు. మీడియా వాళ్లతో కలిసి రెండు వారాల క్రితం తాను కరోనా టెస్ట్ చేయించుకున్నానని, దానిలో నెగిటివ్ వచ్చిందని కత్తి మహేష్ చెప్పారు. అప్పటి నుంచీ తన పని తాను చేసుకుంటున్నానని.. అయితే, ఇప్పుడు ఈ వార్త అకస్మాత్తుగా ఎక్కడి నుంచి వచ్చిందో తెలియడం లేదని అన్నారు. తనకు కరోనా రావాలని కోరుకున్నవారే ఇలా రూమర్‌ను స్ప్రెడ్ చేస్తున్నారనే అనుమానాన్ని మహేష్ వ్యక్తం చేశారు. ‘‘నాకైతే ఏమీ కాలేదు. నేను చాలా బాగున్నాను. షో చేస్తున్నాను. ప్రతిరోజూ నా ఫేస్‌బుక్ వాల్‌ మీద మార్నింగ్ రాగా అంటూ ఒక పాట కూడా పాడుతున్నాను. కరోనా వచ్చినా అధైర్య పడే రకాన్ని అయితే కాదు. కరోనాతో పోరాడి మళ్లీ నా ఆరోగ్యాన్ని వెనక్కి తెచ్చుకునేంత కెపాసిటీ అయితే ఇంకా నాకు ఉంది. వచ్చినా నాకేం కాదు. కాబట్టి, అలా కోరుకునే వాళ్లకు నిరాశ తప్ప ఏమీ మిగలదు’’ అని కత్తి మహేష్ వెల్లడించారు. ‘‘ఈ శునకానందం ఏంటో.. ఎందుకు ఈ రూమర్స్ సృష్టిస్తున్నారో నాకైతే తెలీదు. బహుశా మీ కోరిక అది అయ్యుండొచ్చేమో’’ అంటూ మహేష్ ఫైర్ అయ్యారు.