SBI: రుణ రేట్ల తగ్గింపు...తక్కువ వడ్డీకే రుణాలు!

Written by : smtv Desk | Fri, Jul 03, 2020, 02:50 PM

సొంతింటి కల సాకారం చేసుకోవాలని భావిస్తున్నారా? అయితే మీకు శుభవార్త. దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియా (SBI) తీపికబురు అందించింది. రుణ రేట్లు తగ్గిస్తూ నిర్ణయం తీసుకుంది. దీంతో చౌక వడ్డీకే హోమ్ లోన్స్‌ అందుబాటులోకి రానున్నాయి.

ఎస్‌బీఐ హోమ్ లోన్స్‌పై వడ్డీ రేటు ఇప్పుడు 6.95 శాతం నుంచి ప్రారంభమౌతోంది. బ్యాంక్ ఆఫ్ బరోడా తర్వాత తక్కువ వడ్డీకే రుణాలు అందిస్తున్న బ్యాంక్‌గా స్టేట్ బ్యాంక్‌ కొనసాగుతోంది. బ్యాంక్ ఆఫ్ బరోడా (BoB)లో హోమ్ లోన్‌పై వడ్డీ రేటు 6.85 శాతం నుంచి ప్రారంభమౌతోంది.

ఎస్‌బీఐ జూన్ రెండో వారంలోనే రుణ రేట్లు తగ్గిస్తున్నట్లు ప్రకటించింది. ఎక్స్‌టర్నల్ బెంచ్‌మార్క్ లింక్డ్ లెండింగ్ రేటును 7.05 శాతం నుంచి 6.65 శాతానికి తగ్గిస్తామని తెలిపింది. అలాగే ఎంసీఎల్ఆర్ రేటును 7.25 శాతం నుంచి 7 శాతానికి కోత విధిస్తున్నట్లు పేర్కొంది. ఈ రేట్ల తగ్గింపు నిర్ణయం జూలై 1 నుంచి అమలులోకి వచ్చింది.దీంతో ఇప్పుడు ఎస్‌బీఐ హోమ్ లోన్స్‌పై వడ్డీ రేటు 6.95 శాతం నుంచి ప్రారంభమౌతోంది. ఇది మహిళలకు వర్తిస్తుంది. అదే ఇతరులకు అయితే వడ్డీ రేటు 7 శాతం నుంచి ఆరంభమౌతోంది. రూ.30 లక్షల వరకు రుణానికి ఈ వడ్డీ పడుతుంది. అదే రూ.30 లక్షల నుంచి రూ.75 లక్షల వరకు హోమ్ లోన్స్‌కు వడ్డీ రేటు 7.25 శాతంగా ఉంది. ఇక రూ.75 లక్షలకు పైన మొత్తానికి వడ్డీ రేటు7.35 శాతంగా ఉంటుంది.