కరోనా టైమ్లో థియేటర్లు మూతపడి, షూటింగ్స్ ఆగిపోయి దేశ వ్యాప్తంగా అన్ని సినీ పరిశ్రమలు ఇక్కట్లు పడుతుంటే సెన్సేషనల్ డైరెక్టర్ రామ్ గోపాల్ వర్మ మాత్రం ఫుల్ బిజీగా మారాడు. గంటలు, రోజుల వ్యవధిలో సినిమాలు పూర్తి చేయడమే కాకుండా.. డిజిటల్ మార్కెట్ ద్వారా వాటిని రిలీజ్ చేసి తెగ సంపాదిస్తున్నాడు. కరోనా టైంలో అందరూ ఇళ్లలో ఉంటే తాను మాత్రం డైరెక్టర్, ప్రొడ్యూసర్ వరుసగా మూవీలు తీస్తూ అందరినీ ఆశ్చర్య పరుస్తున్నాడు. సోషల్ మీడియాను తనదైన రీతిలో వాడేసుకుంటూ పైసా ఖర్చు లేకుండా తన మూవీస్కు ప్రమోషన్ కల్పిస్తున్నాడు. మూవీ అనౌన్స్మెంట్స్, ఫస్ట్లుక్, టీజర్స్, ట్రైలర్స్ అంటూ ఫ్యాన్స్ను ఆకట్టుకుంటున్నాడు. ఈ మధ్యే ‘క్లైమాక్స్’, ‘నగ్నం’ సినిమాలను తన ఆర్జీవీ వరల్డ్ థియేటర్లో విడుదల చేశాడు వర్మ. ఇప్పటికే కరోనాపై మూవీ తీస్తున్నాడు. అమృత, ప్రణయ్ల ప్రేమ కథ ఆధారంగా ‘మర్డర్’, ‘పవర్ స్టార్’ టైటిల్తో మరో మూవీని అనౌన్స్ చేశాడు. ఇప్పుడు స్వయంగా మెగాఫోన్ పట్టిన రాము మళ్లీ తన పాత జానర్లోకి వెళ్లాడు. పూర్తి స్తాయి హారర్ మూవీతో ప్రేక్షకుల ముందుకొచ్చాడు.
కంపెనీ ప్రొడక్షన్స్ బ్యానర్ పై వర్మ దర్శకత్వంలో తెరకెక్కుతున్న మూవీ ‘12 ఓ క్లాక్’.ఈ మూవీ ట్రైలర్ను వర్మ ఎప్పట్లాగే యూట్యూబ్లో రిలీజ్ చేశాడు. ఒకప్పుడు హారర్ సినిమాలకు కేరాఫ్గా నిలిచి రాత్రి, దెయ్యం, భూత్ వంటి సినిమాలను తీసిన వర్మ ఈ మూవీతో కూడా ప్రేక్షకులను భయపెట్టబోతున్నాడు. 1 నిమిషం 47 సెకన్ల నిడివి గల ట్రైలర్లో ప్రతి ఫ్రేమ్లోనూ తన మార్కు చూపించాడు. సైన్స్కు, ఆత్మలకు ఏదైనా సంబంధం ఉందా అనే అంశాన్ని ముడిపెడుతూ డైలాగే లేకుండా కేవలం హావభావాలతోనే అందరినీ భయపెట్టాడు. ఈ మూవీకి ఎంఎం కీరవాణి మ్యూజిక్ డైరెక్టర్ కావడం మరో ప్లస్ పాయింట్. వర్మ మార్కు కెమెరా ట్రిక్స్కు, కీరవాణి బ్యాగ్రౌండ్ స్కోరు తోడవడంతో ప్రతీ సీన్ హార్ట్బీట్ పెంచేలా ఉంది. ఈ చిత్రంలో ‘దండుపాళ్యం’ ఫేమ్ మకర్దేశ్ పాండే, మిథున్ చక్రవర్తి, ఆశిష్ విద్యార్థి, దిలీప్ తాహిల్, మానవ్ కౌల్ తదితరులు నటించారు.