"వరల్డ్‌కప్ గెలిచిన తర్వాతే పెళ్లి"

     Written by : smtv Desk | Mon, Jul 13, 2020, 10:12 AM


అఫ్గానిస్థాన్ టీమ్ వరల్డ్‌కప్ గెలిచిన తర్వాత తాను పెళ్లి చేసుకుంటానని ఆ దేశ స్పిన్ సంచలనం రషీద్ ఖాన్ వెల్లడించాడు. 2019 వన్డే ప్రపంచకప్‌లో ఆడిన 9 మ్యాచ్‌ల్లోనూ చిత్తుగా ఓడిపోయిన అఫ్గానిస్థాన్‌కి ప్రపంచకప్‌లో పెద్దగా రాణించిన రికార్డ్ లేదు. కానీ.. మునుపటితో పోలిస్తే తమ ప్రదర్శనని మెరుగుపర్చుకున్న అఫ్గానిస్థాన్.. పసికూన ముద్రని చెరిపేసుకుంటూ అప్పుడప్పుడు అగ్రశ్రేణి జట్లకి చెమటలు పట్టిస్తోంది.



కరోనా వైరస్ కారణంగా క్రికెట్ సిరీస్‌లన్నీ రద్దవగా.. తాజాగా అజాది రేడియోలో రషీద్ ఖాన్ మాట్లాడాడు. ఈ సందర్భంగా అతని పెళ్లి గురించి చర్చ తెరపైకిరాగా.. ‘‘అఫ్గానిస్థాన్ వరల్డ్‌కప్ గెలిచిన తర్వాత నేను పెళ్లి చేసుకుంటా’’ అని 21 ఏళ్ల రషీద్ ఖాన్ స్పష్టం చేశాడు. 2015లో అంతర్జాతీయ క్రికెట్‌లోకి ఎంట్రీ ఇచ్చిన రషీద్ ఖాన్.. 2019 వన్డే ప్రపంచకప్‌లో ఆశించిన మేర రాణించలేకపోయాడు.

అఫ్గానిస్థాన్ తరఫున ఇప్పటి వరకూ 4 టెస్టులాడి 23 వికెట్లు పడగొట్టిన రషీద్ ఖాన్.. 70 వన్డేల్లో 133 వికెట్లని ఖాతాలో వేసుకున్నాడు. ఇక 2017 నుంచి ఐపీఎల్‌లో ఆడుతున్న ఈ స్పిన్ సంచలనం 48 మ్యాచ్‌ల్లో 89 వికెట్లు పడగొట్టాడు. గత ఏడాది అతని చేతికి అఫ్గానిస్థాన్ టీమ్ పగ్గాలు వచ్చాయి. కానీ.. అఫ్గానిస్థాన్ క్రికెట్ బోర్డు (ఏసీబీ)లో రాజకీయాల కారణంగా రోజుల వ్యవధిలోనే అతని చేతి నుంచి కెప్టెన్సీ చేజారింది.





Untitled Document
Advertisements