టీ20ల్లో ఎవర్‌గ్రీన్ హిట్టింగ్: యువరాజ్ 6, 6, 6, 6, 6, 6

క్రికెట్ ప్రపంచానికి టీ20 మజాని 2007లో టీ20 వరల్డ్‌కప్ పరిచయం చేయగా.. ఆ క్రేజ్‌ని భారత మాజీ ఆల్‌రౌండర్ యువరాజ్ సింగ్ తన హిట్టింగ్‌తో మరోస్థాయికి తీసుకెళ్లాడు. దక్షిణాఫ్రికా గడ్డపై జరిగిన ఆ టీ20 ప్రపంచకప్‌లో ఇంగ్లాండ్‌తో జరిగిన ఓ మ్యాచ్‌లో ఆకాశమే హద్దుగా చెలరేగిన యువరాజ్ సింగ్ వరుసగా ఆరు బంతుల్లో ఆరు సిక్సర్లు బాదేశాడు. ఆ రికార్డ్‌కి శనివారంతో సరిగ్గా 13 ఏళ్లు.

2007, సెప్టెంబరు 19న డర్బన్ వేదికగా జరిగిన ఆ మ్యాచ్‌లో టాస్ గెలిచి తొలుత బ్యాటింగ్ చేసిన టీమిండియా.. 16.4 ఓవర్లు ముగిసే సమయానికి 155/3తో నిలిచిన దశలో యువరాజ్ సింగ్ (58: 16 బంతుల్లో 3x4, 7x6) క్రీజులోకి వెళ్లాడు. ఈ క్రమంలో ఇన్నింగ్స్ 18వ ఓవర్ వేసిన ప్లింటాఫ్ బౌలింగ్‌లో యువరాజ్ సింగ్ వరుసగా 4, 4 బాదగా.. ప్లింటాఫ్ నోరు జారాడు. దాంతో.. మైదానంలోనే ఇద్దరి మధ్య వాగ్వాదం చోటు చేసుకోగా.. ఆ కోపం తర్వాత ఓవర్ వేసిన స్టువర్ట్ బ్రాడ్ బౌలింగ్‌లో యువరాజ్ సింగ్ చూపించాడు.

ఇన్నింగ్స్ 19వ ఓవర్ వేసిన స్టువర్ట్ బ్రాడ్ బౌలింగ్‌లో వరుసగా 6, 6, 6, 6, 6, 6 బాదిన యువరాజ్ సింగ్.. టీ20 వరల్డ్‌కప్‌లో ఈ ఘనత సాధించిన తొలి క్రికెటర్‌గా నిలిచాడు. అలానే 12 బంతుల్లో హాఫ్ సెంచరీ మార్క్‌ని అందుకోవడం ద్వారా టీ20ల్లో వేగంగా అర్ధశతకం నమోదు చేసిన ఆటగాడిగా ఘనత సాధించాడు. ఆ తర్వాత ఓవర్‌లో బౌలింగ్‌కి వచ్చిన ప్లింటాఫ్‌కి ఓ సిక్స్‌ బాదిన యువీ.. తర్వాత బంతికే ఔటయ్యాడు. మొత్తంగా తొలుత బ్యాటింగ్ చేసిన భారత్ 4 వికెట్ల నష్టానికి 218 పరుగులు చేయగా.. ఛేదనలో ఇంగ్లాండ్ 200/6కే పరిమితమైంది. యువరాజ్ సింగ్ కెరీర్ ఈ ఆరు సిక్సర్లకి ముందు ఆ తర్వాత అనేంతలా సాగింది. 2007 టీ20 ప్రపంచకప్‌ని గెలిచిన భారత్.. ఆ తర్వాత యువరాజ్ సింగ్ దూకుడుతో 2011 వన్డే ప్రపంచకప్‌లోనూ విజేతగా నిలిచింది. కానీ.. 2014 నుంచి యువీ కెరీర్ గాడి తప్పింది. గత ఏడాది అంతర్జాతీయ క్రికెట్‌కి రిటైర్మెంట్ ప్రకటించిన యువరాజ్ సింగ్.. ఇటీవల ఆ రిటైర్మెంట్‌ని వెనక్కి తీసుకునే ఆలోచనలో ఉన్నట్లు వెల్లడించాడు. కానీ.. భారత క్రికెట్ నియంత్రణ మండలి (బీసీసీఐ) నుంచి అతనికి అనుమతి లభించడం లేదు. భారత్ తరఫున 304 వన్డేలు, 58 టీ20లు, 40 టెస్టులని యువరాజ్ సింగ్ ఆడాడు.