సెప్టెంబర్ 22న రానున్న పోకో ఎక్స్3

పోకో ఎక్స్3 మనదేశంలో సెప్టెంబర్ 22వ తేదీన మధ్యాహ్నం 12 గంటలకు లాంచ్ కానుంది. ఈ విషయాన్ని కంపెనీ ట్వీటర్ ద్వారా ప్రకటించింది. గతేడాది యూరోపియన్ మార్కెట్లో లాంచ్ అయిన లాంచ్ అయిన పోకో ఎక్స్3 ఎన్ఎఫ్‌సీకి మరో వెర్షన్‌గా ఈ ఫోన్ లాంచ్ అవుతుందని వార్తలు వస్తున్నాయి. ఈ ఫోన్ కూడా పోకో ఎక్స్3 ఎన్ఎఫ్‌సీ తరహాలోనే క్వాల్ కాం స్నాప్ డ్రాగన్ 732జీ ప్రాసెసర్‌పై పనిచేయనుంది.

దీని గురించిన 10 సెకన్ల టీజర్‌ను కూడా పోకో సోషల్ మీడియా ద్వారా విడుదల చేసింది. దీని ప్రకారం ఈ ఫోన్ ముందువైపు హోల్ పంచ్ సెల్ఫీ కెమెరా, వెనకవైపు నాలుగు కెమెరాల సెటప్ ఉండనున్నాయి. పోకో ఎక్స్3 సేల్ కూడా ఫ్లిప్ కార్ట్ ద్వారానే జరగనుంది.

పోకో ఎక్స్3 ఎన్ఎఫ్‌సీ యూరోప్‌లో రెండు వేరియంట్లలో లాంచ్ అయింది. వీటిలో 6 జీబీ ర్యామ్ + 64 జీబీ స్టోరేజ్ వేరియంట్ ధరను 229 యూరోలుగా(సుమారు రూ.19,900)గా నిర్ణయించారు. 6 జీబీ ర్యామ్ + 128 జీబీ స్టోరేజ్ వేరియంట్ ధర 269 యూరోలుగా(సుమారు రూ.23,400) ఉంది. కోబాల్ట్ బ్లూ, షాడో గ్రే రంగుల్లో ఈ ఫోన్ లాంచ్ అయింది. మనదేశంలో ఈ ఫోన్ ధర రూ.18,999 లేదా రూ.19,999 నుంచి ప్రారంభం కానుందని ఇప్పటికే వార్తలు వచ్చాయి.

పోకో ఎక్స్3 ఎన్ఎఫ్‌సీ కంటే పెద్ద బ్యాటరీతో పోకో ఎక్స్3 లాంచ్ అవుతుందని తెలుస్తోంది. అలాగే మనదేశంలో కొత్తగా 8 జీబీ ర్యామ్ వేరియంట్‌ను కూడా లాంచ్ చేయనున్నారని వార్తలు వస్తున్నాయి. ఒకవేళ మిగతా స్పెసిఫికేషన్లన్నీ ఒకేలా ఉంటే.. ఇందులో 6.67 అంగుళాల ఫుల్ హెచ్ డీ+ డిస్ ప్లేను అందించనున్నారు. దీని స్క్రీన్ రిఫ్రెష్ రేట్ 120 హెర్ట్జ్ గా ఉండనుంది. ఆక్టా కోర్ క్వాల్ కాం స్నాప్ డ్రాగన్ 732జీ ప్రాసెసర్ పై ఈ ఫోన్ పనిచేయనుంది.

ఇందులో వెనకవైపు నాలుగు కెమెరాలు ఉండనున్నాయి. వీటిలో ప్రధాన కెమెరాగా 64 మెగా పిక్సెల్ సామర్థ్యమున్న సోనీ ఐఎంఎక్స్682 సెన్సార్ ను అందించనున్నారు. దీంతోపాటు 13 మెగా పిక్సెల్ అల్ట్రా వైడ్ యాంగిల్ కెమెరా, 2 మెగా పిక్సెల్ మాక్రో సెన్సార్, 2 మెగా పిక్సెల్ డెప్త్ సెన్సార్ లు కూడా ఇందులో ఉండనున్నాయి. సెల్ఫీలు, వీడియో కాల్స్ కోసం ముందువైపు 20 మెగాపిక్సెల్ కెమెరా ఉండనుంది. ఆండ్రాయిడ్ 10 ఆధారిత ఎంఐయూఐ 12 ఆపరేటింగ్ సిస్టంపై పోకో ఎక్స్3 పనిచేయనుంది. 33W ఫాస్ట్ చార్జింగ్ టెక్నాలజీని ఈ ఫోన్ సపోర్ట్ చేస్తుంది.