KXIP: 13 సీజన్లలో 12 మంది కెప్టెన్లు

ఢిల్లీ క్యాపిటల్స్‌తో జరిగిన ఐపీఎల్ రెండో మ్యాచ్‌లో కింగ్స్ ఎలెవన్ పంజాబ్ జట్టు విజయం వాకిట బొక్కబోర్లా పడింది. చివరి మూడు బంతుల్లో ఒక్క పరుగు చేయలేక.. సూపర్ ఓవర్లో తడబడి ఓడింది. కేఎల్ రాహుల్ ఈ మ్యాచ్‌లో తొలిసారి పంజాబ్ కెప్టెన్‌గా వ్యవహరించాడు. ఈ మ్యాచ్‌లో పంజాబ్ గెలవలేకపోయినా.. ఆకట్టుకునే ప్రదర్శన చేసింది. కింగ్స్ ఎలెవన్‌‌కు 12వ కెప్టెన్‌గా కేఎల్ రాహుల్ రికార్డ్ క్రియేట్ చేశాడు.

ఈ మ్యాచ్‌కు ముందు పంజాబ్, ఢిల్లీ జట్లకు 11 మంది చొప్పున కెప్టెన్లుగా వ్యవహరించారు. కానీ రాహుల్ కెప్టెన్సీతో ఢిల్లీని కింగ్స్ ఎలెవన్ దాటేసింది. ఐపీఎల్ ఆరంభం నుంచి పంజాబ్ జట్టు కెప్టెన్లను తరచుగా మారుస్తోంది. ఆ జట్టు స్థాయికి తగ్గ ఆటతీరు కనబర్చకపోవడంలో ఇది కూడా ఓ కారణం కావచ్చనే అభిప్రాయం ఉంది.

కెప్టెనే కాదు గత మూడు సీజన్లలో కోచింగ్ స్టాఫ్‌ను కూడా పంజాబ్ ఏటా మార్చేసింది. 2018లో బ్రాడ్ హాడ్జ్ కోచ్‌గా బాధ్యతలు చేపట్టగా.. గత ఏడాది కోచ్‌గా వ్యవహరించిన మైక్ హెస్సన్ ఆ సీజన్‌తోనే తన పదవి నుంచి తప్పుకున్నాడు. 2020 ఐపీఎల్ సీజన్లో అనిల్ కుంబ్లే పంజాబ్‌కు కోచ్‌గా వ్యవహరిస్తున్నాడు.

2008 నుంచి ప్రతి ఐపీఎల్ సీజన్‌లోనూ ఆడిన ఐదు జట్లలో కింగ్స్ ఎలెవన్ ఒకటి. తొలి సీజన్లో యువరాజ్ సింగ్ కెప్టెన్‌గా వ్యవహరించగా.. ఆ ఏడాది పంజాబ్ జట్టు పాయింట్ల పట్టికలో రెండో స్థానంలో నిలిచింది. యువీ కెప్టెన్సీలో 29 మ్యాచ్‌లు ఆడిన కింగ్స్ ఎలెవన్ 17 మ్యాచ్‌ల్లో గెలుపొందింది.

పంజాబ్ జట్టుకు ఎక్కువ మ్యాచ్‌ల్లో కెప్టెన్‌గా వ్యవహరించింది ఆడమ్ గిల్‌క్రిస్ట్ (34). 2018, 2019 సీజన్లలో అశ్విన్ ఈ జట్టు కెప్టెన్సీ చేపట్టాడు. కానీ రెండు సీజన్లలోనూ పంజాబ్ ప్లేఆఫ్స్‌కు చేరలేకపోయింది.

పంజాబ్ కెప్టెన్లు, విజయాల వివరాలు..

1. ఆడమ్ గిల్‌క్రిస్ట్ - 34 మ్యాచ్‌ల్లో 17 విజయాలు
2. జార్జ్ బెయిలీ - 16 మ్యాచ్‌ల్లో 14 విజయాలు
3. యువరాజ్ సింగ్ - 29 మ్యాచ్‌ల్లో 17 విజయాలు
4. అశ్విన్ - 28 మ్యాచ్‌ల్లో 12 విజయాలు
5. గ్లెన్ మ్యాక్స్‌వెల్ - 14 మ్యాచ్‌ల్లో 7 విజయాలు
6. కుమార సంగక్కర - 13 మ్యాచ్‌ల్లో 3 విజయాలు
7. డేవిడ్ హస్సీ - 12 మ్యాచ్‌ల్లో 6 విజయాలు
8. మురళీ విజయ్ - 8 మ్యాచ్‌ల్లో 3 విజయాలు
9. డేవిడ్ మిల్లర్ - 6 మ్యాచ్‌ల్లో 1 విజయం
10. మహేల జయవర్దనే - 1 మ్యాచ్‌లో ఓటమి
11. వీరేంద్ర సెహ్వాగ్ - ఒక్క మ్యాచ్, టై తర్వాత పంజాబ్ గెలుపు
12. కేఎల్ రాహుల్ - ఒక్క మ్యాచ్, టై (ఢిల్లీ విజయం)