‘చావుకబురు చల్లగా’ టీజర్...రెస్పాన్స్ అదిరింది!

     Written by : smtv Desk | Mon, Sep 21, 2020, 06:54 PM

‘చావుకబురు చల్లగా’ టీజర్...రెస్పాన్స్ అదిరింది!

యంగ్ హీరో కార్తికేయ, లక్కీ బ్యూటీ లావణ్య త్రిపాఠి జంటగా నటిస్తోన్న చిత్రం ‘చావుకబురు చల్లగా’. ఈ చిత్రం ద్వారా కౌశిక్ పెగళ్లపాటి దర్శకుడిగా పరిచయమవుతున్నారు. ప్రముఖ నిర్మాత అల్లు అరవింద్ సమర్పణలో జీఏ2 పిక్చర్స్ బ్యానర్‌పై బన్నీవాస్ నిర్మిస్తున్నారు.‌ టైటిల్‌తోనే అటు చిత్ర ప‌రిశ్రమ వ‌ర్గాల్లో, ఇటు సినిమా ప్రేక్షకుల్లో చర్చనీయాంశం అయిన ఈ సినిమా ఫస్ట్‌లుక్ అందరినీ ఆకట్టుకుంది. కార్తికేయ పోషించిన ‘బ‌స్తి బాల‌రాజు’ ఫ‌స్ట్ లుక్ సైతం సోష‌ల్ మీడియాలో ఫుల్ క్రేజ్ సొంతం చేసుకుంది.

ఇదిలా ఉంటే, సోమవారం (సెప్టెంబర్ 21న) కార్తికేయ పుట్టినరోజు సందర్భంగా చిత్ర నిర్మాణ సంస్థ ‘చావుకబురు చల్లగా’ టీజర్‌ను విడుదల చేసింది. ఈ టీజర్ ఇప్పుడు ప్రేక్షకులను విపరీతంగా ఆకట్టుకుంటోంది. టీజర్‌లో కార్తికేయ గెట‌ప్‌, డైలాగ్ డెలివ‌రి మాడ్యూలేష‌న్ అద్భుతంగా ఉన్నాయి. టీజర్ చూసిన ప్రేక్షకులు మళ్లీ మళ్లీ చూడాలనిపించేలా ఉందని యూట్యూబ్‌లో కామెంట్లు చేస్తున్నారు. అంతే కాదు.. టీజర్‌లో ఆమ‌ని, భ‌ద్రం డైలాగులు ప్రేక్షకుల‌కి బాగా కనెక్ట్ అవుతున్నాయి.

ఈ సినిమాలో శవాలను తీసుకెళ్లే వాహనానికి డ్రైవర్‌గా కార్తికేయ కనిపించనున్నారు. ‘‘మా బంధువు ఒకరు చనిపోయారు. శ్మశానానికి తీసుకెళ్లాలి. మరి మేం దేవుని బిడ్డలం మీరు తీసుకెళ్తారా’’ అని ఫోన్‌లో వ్యక్తి బాలరాజు (కార్తికేయ)ను అడగగా.. ‘‘డబ్బులిస్తే ఎవ్వరి బిడ్డలినైనా తీసుకెళ్తాం, అడ్రస్ చెప్పండి’’ అని కార్తికేయ ఇచ్చే సమాధానంతో టీజర్ మొదలైంది. ఇక అక్కడి నుంచి ప్రతి డైలాగ్ పేలింది. ‘‘నేను రోజూ చావులకు పోతా.. దీనమ్మ అందరి ఏడుపులు చూసి చూసి ఏడుపంటేనే చిరాకు దొబ్బింది’’ అనే డైలాగ్ కూడా ఆడియన్స్‌కు బాగా రీచ్ అవుతోంది.






Untitled Document
Advertisements