SRH vs RCB: మ్యాచ్‌ను తిప్పేసిన చాహల్

కొత్త కుర్రాడు దేవ్‌దత్త పడిక్కల్ హాఫ్ సెంచరీ, బౌలింగ్‌లో చాహల్ మెరుపులతో సన్‌రైజర్స్ హైదరాబాద్‌పై బెంగళూరు విజయం సాధించింది. బెయిర్‌స్టో క్రీజులో ఉన్నంత వరకూ లక్ష్య చేధన దిశగా సాగిన సన్‌రైజర్స్ చివర్లో కుప్పకూలి మ్యాచ్‌ను చేజార్చుకుంది. టాస్ ఓడి ఫస్ట్ బ్యాటింగ్ చేసిన రాయల్ ఛాలెంజర్స్ 20 ఓవర్లలో ఐదు వికెట్ల నష్టానికి 163 రన్స్ చేసింది. ఐపీఎల్‌లో అరంగేట్రం చేసిన దేవ్‌దత్త్ పడిక్కల్ అదరగొట్టాడు. ఐపీఎల్‌లో ఆడిన తొలి మ్యాచ్‌లోనే 50+ రన్స్ కొట్టిన ఐదో ఆటగాడిగా రికార్డ్ క్రియేట్ చేశాడు. ఫించ్‌తో కలిసి ఓపెనర్‌గా బరిలో దిగిన పడిక్కల్.. సన్‌రైజర్స్ బౌలర్లపై ఆధిపత్యం చెలాయించాడు. బౌండరీల మీద బౌండరీలతో బెంగళూరు భారీ స్కోరుకు బాటలు వేశాడు. పడిక్కల్.. ఫస్ట్ క్లాస్ క్రికెట్ మ్యాచ్‌లో, లిస్ట్-ఏ‌ లో, టీ20 మ్యాచ్‌లో.. ఇప్పుడు ఐపీఎల్‌లో.. తొలి మ్యాచ్‌లోనే హాఫ్ సెంచరీ కొట్టడం విశేషం.

తొలి వికెట్‌కు 90 పరుగులు జోడించిన తర్వాత 56 రన్స్ వద్ద విజయ్ శంకర్ బౌలింగ్‌లో పడిక్కల్ ఔటయ్యాడు. మరుసటి ఓవర్ తొలి బంతికే ఫించ్ కూడా వెనుదిరిగాడు. కాసేపటికే కోహ్లి 14 పరుగుల వద్ద ఔటయ్యాడు. విరాట్ ఔటైనా డివిలియర్స్ దూకుడుగా ఆడి.. 29 బంతుల్లోనే హాఫ్ సెంచరీ పూర్తి చేసుకున్నాడు. ఆఖరి ఓవర్లో ఏబీ డివిలియర్స్, శివమ్ దూబే రనౌట్ కావడంతో.. బెంగళూరు జట్టు 20 ఓవర్లలో 5 వికెట్ల నష్టానికి 163 పరుగులు చేసింది.

ఈ మ్యాచ్‌లో సన్‌రైజర్స్ తరఫున అప్ఘాన్ ప్లేయర్ నబీ ఆడతాడని భావించినా.. ఆల్‌రౌండర్ మిచెల్ మార్ష్‌ బరిలో దిగాడు. కానీ బౌలింగ్‌కు దిగిన మార్ష్.. తొలి బంతి వేయగానే యాంకిల్ ఇంజ్యూరీతో ఇబ్బంది పడ్డాడు. అతి కష్టం మీద 3 బంతులు వేసిన మార్ష్ తర్వాత మైదానాన్ని వీడాడు. దీంతో విజయ్ శంకర్ మిగతా మూడు బంతులు వేయాల్సి వచ్చింది. మార్ష్ బౌలింగ్ చేయలేకపోవడం.. తప్పనిసరి పరిస్థితుల్లో బ్యాటింగ్‌కు దిగి ఔటవడం సన్‌రైజర్స్‌పై ప్రభావం చూపింది.

164 పరుగుల లక్ష్యంతో బరిలో దిగిన సన్‌రైజర్స్ అనూహ్య రీతిలో వార్నర్ వికెట్ కోల్పోయింది. రెండో ఓవర్లో బెయిర్‌స్టో స్ట్రయిట్ షాట్ కొట్టగా.. బంతి బౌలర్ ఉమేశ్ యాదవ్ చేతి వేళ్లను తాకుతూ వికెట్లను తగిలింది. క్రీజ్ బయటకు వచ్చిన వార్నర్ రనౌట్ రూపంలో వెనుదిరిగాడు. ఆ తర్వాత బెయిర్‌స్టోతో జత కలిసిన మనీష్ పాండే స్కోర్ బోర్డును ముందుకు నడిపించాడు.

మ్యాచ్ సన్‌రైజర్స్ వైపు మొగ్గుతున్న దశలో చాహల్ మాయ చేశాడు. 12వ ఓవర్లో మనీష్ పాండే (34)ను ఔట్ చేసిన చాహల్.. మరుసటి ఓవర్లో బెయిర్‌స్టో (43 బంతుల్లో 61), విజయ్ శంకర్‌లను వరుస బంతుల్లో పెవిలియన్ చేర్చాడు. కాసేపటికే ప్రియమ్ గార్గ్ ఔట్ అయ్యాడు. 15 ఓవర్లలో 121/2తో పటిష్ట స్థితిలో ఉన్న సన్‌రైజర్స్ చివరి 8 వికెట్లను 32 పరుగుల వ్యవధిలో కోల్పోయింది.

19వ ఓవర్లో మిచెల్ మార్ష్ కుంటుతూనే బ్యాటింగ్ దిగినప్పటికీ భారీ షాట్‌కు యత్నించి ఔటయ్యాడు. ఆఖరి ఓవర్లో ఓ బౌండరీ బాదిన సందీప్.. భారీ షాట్ ఆడే క్రమంలో ఔటయ్యాడు. దీంతో సన్‌రైజర్స్ 153 పరుగులకు ఆలౌట్ కాగా.. ఆర్సీబీ 10 పరుగుల తేడాతో విజయం సాధించింది.