‘కృష్ణవేణి’ ఫుల్ వీడియో సాంగ్ రిలీజ్

Written by : smtv Desk | Tue, Sep 22, 2020, 12:39 PM

యంగ్ హీరో రాజ్ తరుణ్, మాళవిక నాయర్ జంటగా నటించిన చిత్రం ‘ఒరేయ్ బుజ్జిగా’. హెబ్బా పటేల్ కీలక పాత్ర పోషించారు. కొండా విజయ్ కుమార్ దర్శకత్వం వహించారు. శ్రీమతి లక్ష్మీ రాధామోహన్ సమర్పణలో శ్రీసత్యసాయి ఆర్ట్స్ పతాకంపై కె.కె.రాధామోహన్ నిర్మించారు. యూత్ ఎంటర్‌టైనర్‌గా రూపొందిన ఈ చిత్రం అక్టోబర్ 2 నుంచి అమెజాన్ ప్రైమ్ వీడియోలో అందుబాటులోకి రానుంది. నిజానికి ఈ సినిమాను ఉగాది కానుకగా మార్చి 25న విడుదల చేయాలని నిర్మాత భావించారు. కానీ, కరోనా వైరస్ కారణంగా థియేటర్లు మూతబడటంతో కుదరలేదు. అందుకే నేరుగా ఓటీటీలో విడుదల చేస్తున్నారు.

ఇదిలా ఉంటే, ఈ సినిమా ప్రచారంలో భాగంగా మంగళవారం ‘కృష్ణవేణి’ సాంగ్ ఫుల్ వీడియోను విడుదల చేశారు. ఇప్పటికే విడుదలైన ఈ పాట లిరికల్ వీడియో ఆకట్టుకుంది. కాసర్ల శ్యామ్ కుమార్ రాసిన ఈ తెలంగాణ యాసతో కూడిన సాంగ్‌ను రాహుల్ సిప్లిగంజ్ అంతే జోష్‌తో ఆలపించారు. పాటలో జోష్ ఎలా ఉందో.. వీడియోలో హీరో జోష్ కూడా అదే స్థాయిలో ఉంది. బుజ్జిగాడు దుమ్ములేపుతున్నాడు. ఈ పాటకు శేఖర్ మాస్టర్ కొరియోగ్రఫీ అందించారు.

కాగా, ఈ చిత్రంలో వాణీ విశ్వనాథ్‌, నరేష్‌, పోసాని కృష్ణమురళి, అనీష్‌ కురువిళ్ళ, సప్తగిరి, రాజా రవీంద్ర, అజయ్‌ ఘోష్‌, అన్నపూర్ణ, సిరి, జయక్ష్మి, సోనియా చౌదరి, సత్య, మధునందన్‌ ముఖ్యపాత్రలు పోషించారు. అనూప్ రూబెన్స్ సంగీతం సమకూర్చిన ఈ సినిమాకు నంద్యాల రవి మాటలు రాశారు. ఐ.ఆండ్రూ సినిమాటోగ్రఫీ అందించారు. ప్రవీణ్ పూడి ఎడిటర్. రియల్ సతీష్ ఫైట్స్ కంపోజ్ చేశారు. వేణు కూరపాటి కో-డైరెక్టర్. కథ, స్క్రీన్‌ప్లే, దర్శకత్వం కొండా విజయ్‌కుమార్‌.