‘త్రీడీ విజయ్ శంకర్’‌పై సెటైర్లు

బెంగళూరుతో జరిగిన మ్యాచ్‌లో సన్‌రైజర్స్ ఓటమిపాలైంది. పడిక్కల్, డివిలియర్స్ హాఫ్ సెంచరీలు.. చాహల్ మాయాజలంతో మ్యాచ్ కోహ్లిసేన వశమైంది. ఓ దశలో 122/2తో పటిష్ట స్థితిలో ఉన్న సన్‌రైజర్స్.. ఆఖరి ఐదు ఓవర్లో 8 వికెట్లు కోల్పోయిన తీరు అందర్నీ కలచి వేసింది. ఊరించే బంతితో మనీష్ పాండేను బోల్తా కొట్టించిన చాహల్.. తన చివర్లో ఓవర్లో వరుస బంతుల్లో బెయిర్‌స్టో, విజయ్ శంకర్‌లను బౌల్డ్ చేసి మ్యాచ్‌ను లాగేసుకున్నాడు.

విజయ్ శంకర్ క్రీజ్‌లోకి రాగానే గుగ్లీ వేయాలని డివిలియర్స్, కోహ్లి సూచించారని... అలాగే చేసి ఫలితం రాబట్టానని మ్యాచ్ అనంతరం చాహల్ తెలిపాడు. కాగా ఎదుర్కొన్న తొలి బంతికే డకౌట్‌గా వెనుదిరిగిన విజయ్ శంకర్‌పై నెటిజన్లు ఓ రేంజ్‌లో జోకులు పేలుస్తున్నారు.

ఐపీఎల్ 2020లో మీరు ఏ రికార్డు బద్దలు కొట్టాలనుకుంటున్నారని కొద్ది రోజుల క్రితం ప్రశ్నించగా.. ‘ఐపీఎల్‌లో డకౌట్‌ కాకుండా అత్యధిక ఇన్నింగ్స్‌లు‌ (29) ఆడిన భారత బ్యాట్స్‌మన్‌‌ను నేను’ అంటూ విజయ్ శంకర్ నవ్వుతూ బదులిచ్చాడు. ఐపీఎల్ 2019 వరకు టోర్నీలో మొత్తం 33 మ్యాచ్‌లు ఆడిన శంకర్ 557 పరుగులు చేశాడు. కానీ ఈ వ్యాఖ్యలు చేసిన కొద్ది రోజులకే బెంగళూరుతో మ్యాచ్‌లో విజయ్ శంకర్ డకౌట్ అయ్యాడు. దీంతో నెటిజన్లు ఓ రేంజ్‌లో ట్రోల్ చేస్తున్నారు. త్రీడీ ప్లేయర్ అంటూ వరల్డ్ కప్‌ జట్టులో విజయ్ శంకర్‌కు స్థానం కల్పించారని.. 1-డీ ప్లేయర్ రాయుడు ముంబైపై హాఫ్ సెంచరీతో సత్తా చాటితే.. త్రీడీ ప్లేయర్ డకౌట్ అయ్యాడంటూ.. ఇరు జట్లలో ఈ ఇద్దరు ఆటగాళ్లే తేడా అని ఏకేస్తున్నారు. ‘‘డివిలియర్స్, బుమ్రా డెడ్లీ కాంబినేషన్ విజయ్ శంకర్. బుమ్రాలా బ్యాటింగ్ చేయగలడు.. డివిలియర్స్‌లా బౌలింగ్ చేయగలడు’ అని ఓ నెటిజన్ చురకలు అంటించాడు. రెండు నోబాల్స్ వేసి 10 పరుగులు ఇచ్చావ్.. డకౌట్ అయ్యావంటూ మరో నెటిజన్ విజయ్ శంకర్‌పై ఫైరయ్యాడు. విజయ్ శంకర్‌ను టీమ్‌లో నుంచి తీసేయాలని... పది మందితోనైనా ఆడాలని సన్‌రైజర్స్‌కు కొందరు సలహాలిస్తున్నారు. ఈ మ్యాచ్‌లో బరిలోకి దిగిన మిచెల్ మార్ష్.. బంతి అందుకొని తొలి బంతి వేయగానే గాయపడ్డాడు. యాంకిల్ ఇంజ్యూరీతో అతి కష్టం మీద 4 బంతులు వేసి మైదానాన్ని వీడాడు. దీంతో మిగతా బంతులు వేసేందుకు కెప్టెన్ వార్నర్.. విజయ్ శంకర్‌కు బంతిని అప్పగించాడు. బంతిని అందుకున్న విజయ్ శంకర్.. రెండు నోబాల్స్, ఓ వైడ్ వేసి.. పది పరుగులు ఇచ్చాడు. కానీ ఆ తర్వాత పడిక్కల్‌ను ఔట్ చేసి సన్‌రైజర్స్‌కు బ్రేక్ ఇచ్చాడు.