బ్యాంక్ నుంచి సూపర్ ఆఫర్...రూ.1 చెల్లించి కొత్త బైక్ ఇంటికి పట్టుకెళ్లొచ్చు!

Written by : smtv Desk | Thu, Sep 24, 2020, 11:01 AM

కొత్తగా బైక్ కొనుగోలు చేయాలని ప్లాన్ చేస్తున్నారా? లేదంటే స్కూటర్ ఇంటికి తీసుకెళ్లాలని యోచిస్తున్నారా? అయితే మీకు అదిరిపోయే ఆఫర్ అందుబాటులో ఉంది. ఇక్కడ ఒక బ్యాంక్ డెబిట్ కార్డుపైనే ఈఎంఐ ప్రయోజనాన్ని కల్పిస్తోంది. అంటే మీ వద్ద ఈ బ్యాంక్ డెబిట్ కార్డు ఉంటే సులభంగానే నచ్చిన టూవీలర్‌ను ఇంటికి తీసుకెళ్లొచ్చు.

ప్రముఖ బ్యాంక్ ఫెడరల్ బ్యాంక్ తాజాగా ఈఎంఐ ఫెసిలిటీ ఆప్షన్ అందుబాటులోకి తీసుకువచ్చింది. డెబిట్ కార్డులపై కూడా ఈఎంఐ ఆప్షన్ అందిస్తోంది. డెబిట్ కార్డు ద్వారా టూవీలర్ కొనుగోలు చేసే వారికి ఇది వర్తిస్తుంది. లోన్ కోసం తిరగకుండా కేవలం డెబిట్ కార్డు ద్వారా ఈఎంఐ ఆప్షన్‌లో కొత్త టూవీలర్ కొనుగోలు చేయొచ్చు.

అర్హత కలిగిన కస్టమర్లు హీరో మోటొకార్ప్, హోండా మోటార్‌సైకిల్స్, టీవీఎస్ మోటార్ షోరూమ్‌లకు వెళ్లి కేవలం రూ.1 చెల్లించి కొత్త వెహికల్‌‌ను ఇంటికి పట్టుకెళ్లొచ్చు. తర్వాతి నెల నుంచి ఈఎంఐ కడుతూ రావాలి. డౌన్ పేమెంట్ కూడా అవసరం లేదు. కొత్తగా బైక్ లేదా స్కూటర్ కొనుగోలు చేసే వారికి ఇది బంపరాఫర్ అని చెప్పుకోవచ్చు.

కస్టమర్లు ఇక్కడ బ్యాంక్‌కు వెళ్లాల్సిన పనిలేదు. ఈఎంఐ ప్రాసెస్ మొత్తం ఆన్‌లైన్‌లోనే పూర్తవుతుంది. డాక్యుమెంట్లతో కూడా పని లేదు. తీసుకున్న రుణాన్ని 3 నుంచి 12 నెలలోగా తిరిగి చెల్లించాల్సి ఉంటుంది. ఇంకా ప్రాసెసింగ్ ఫీజు ఉండదు. ఎందుకంటే లోన్ తీసుకుంటే ఈ చార్జీ పడుతుంది. ఇక్కడ డైరెక్ట్‌గా డెబిట్ కార్డు ద్వారానే కొనుగోలు చేస్తున్నందును ఈ చార్జీలు ఉండవు.

అంతేకాకుండా హోండా మోటార్‌సైకిల్ కొనుగోలు చేసే వారికి ఫెస్టివ్ ఆఫర్ కింద 5 శాతం క్యాష్‌బ్యాక్ కూడా లభిస్తోంది. ఇలా డెబిట్ కార్డుపై టూవీలర్ కొనుగోలు చేయాలని భావించే వారు వారి అర్హతను సులభంగానే తెలుసుకోవచ్చు. దీని కోసం డీసీ అని టైప్ చేసి స్పేస్ ఇచ్చి ఈఎంఐ అని టైప్ చేసి 5676762 నెంబర్‌కు ఎస్ఎంఎస్ పంపాలి. లేదంటే 7812900900 నెంబర్‌కు మిస్డ్ కాల్ ఇవ్వాలి. దేశవ్యాప్తంగా 900కు పైగా షోరూమ్‌లలో ఈ ఆఫర్ అందుబాటులో ఉంది.