సేవింగ్స్ ఖాతాలపై తక్కువ వడ్డీ...ఈ బ్యాంకుల్లో డిపాజిట్ చేస్తే ఎక్కువ వడ్డీ!!

Written by : smtv Desk | Thu, Sep 24, 2020, 11:12 AM

బ్యాంకులో అకౌంట్ తెరవాలని ప్లాన్ చేస్తున్నారా? అయితే మీకు కొన్ని విషయాలు తెలుసుకోవాలి. అన్ని బ్యాంకులు వాటి వాటి కస్టమర్లకు ఒకేరకమైన వడ్డీ రేట్లను అందించవు. ఒక్కో బ్యాంక్‌లో ఒక్కో రకమైన వడ్డీ రేట్లు ఉంటాయి. ఒకే బ్యాంకులోనే వివిధ అకౌంట్లపై పలు రకాల వడ్డీ రేట్లు ఉండటాన్ని మనం గమనించే ఉంటాం.

అందువల్ల మీరు బ్యాంకుకు వెళ్లి అకౌంట్ తెరవాలని భావిస్తే మాత్రం అధిక వడ్డీ అందించే బ్యాంకుల్లో ఖాతా తెరవండి. అప్పుడు మీ అకౌంట్‌లో ఉన్న డబ్బులకు అధిక వడ్డీ లభిస్తుంది. ప్రస్తుతం చాలా వరకు ప్రభుత్వ రంగ బ్యాంకులు వాటి సేవింగ్స్ అకౌంట్లపై తక్కువ వడ్డీ రేట్లను అందిస్తున్నాయి.

అయితే ప్రభుత్వ రంగ బ్యాంకులతో పోలిస్తే ప్రైవేట్ రంగ బ్యాంకుల్లో సేవింగ్స్ ఖాతాలపై వడ్డీ రేట్లు కొంచెం ఎక్కువగానే ఉంటాయి. అంతేకాకుండా ఫిక్స్‌డ్ డిపాజిట్లతో పోలిస్తే సేవింగ్స్ అకౌంట్లపై తక్కువ వడ్డీ వస్తుంది. ప్రస్తుతం మార్కెట్‌లో ఏ ఏ బ్యాంకుల్లో అధిక వడ్డీ రేట్లు ఉన్నాయో తెలుసుకుందాం.

ఐడీబీఐ బ్యాంక్, పంజాబ్ అండ్ సింద్ బ్యాంక్ అనేవి సేవింగ్స్ ఖాతాలపై వరుసగా 3.6 శాతం, 3.5 శాతం చొప్పున వడ్డీని అందిస్తున్నాయి. ఇండియన్ ఓవర్సీస్ బ్యాంక్‌లో అయితే 3.1 శాతం వడ్డీని పొందొచ్చు. బ్యాంక్ ఆఫ్ బరోడా, యూనియన్ బ్యాంక్‌లో 3 శాతం వడ్డీని సొంతం చేసుకోవచ్చు. ఇతర ప్రభుత్వ రంగ బ్యాంకులు కూడా 3.1 శాతం వరకు వడ్డీని అందిస్తున్నాయి.

అదే ప్రైవేట్ రంగ బ్యాంకుల విషయానికి వస్తే.. దేశీ అతిపెద్ద ప్రైవేట్ రంగ బ్యాంక్ హెచ్‌డీఎఫ్‌సీ బ్యాంక్ తన కస్టమర్లకు 3 శాతం వరకు వడ్డీని అందిస్తోంది. అదే మరో ప్రైవేట్ రంగ బ్యాంక్ ఐసీఐసీఐ బ్యాంక్ కూడా తన కస్టమర్లకు 3.5 శాతం వరకు వడ్డీని ఆఫర్ చేస్తోంది. అయితే దేశీ అతిపెద్ద బ్యాంక్ ఎస్‌బీఐ మాత్రం కేవలం 2.7 శాతం వడ్డీనే అందిస్తోంది.