కోహ్లి-అనుష్కలపై గావస్కర్ వివాస్పద కామెంట్స్

Written by : smtv Desk | Fri, Sep 25, 2020, 02:01 PM

రాయల్ ఛాలెంజర్స్ బెంగళూరు కెప్టెన్ విరాట్ కోహ్లి, అనుష్క శర్మపై దిగ్గజ క్రికెటర్, కామెంటేటర్ సునీల్ గావస్కర్ వివాదాస్పద వ్యాఖ్యలు చేశారు. పంజాబ్‌తో జరిగిన మ్యాచ్‌లో రాహుల్ ఇచ్చిన రెండు క్యాచ్‌లను వదిలేసిన కోహ్లి.. ఒక్క పరుగుకే ఔటై నిరాశపర్చిన సంగతి తెలిసిందే. ఛేజింగ్‌లో తిరుగులేని ఆటగాడిగా పేరిందిన విరాట్.. ఇలా బ్యాట్‌తో విఫలం కావడం ఆశ్చర్యానికి గురి చేసింది.

ఈ విషయమై కామెంట్రీ బాక్స్‌లో సునీల్ గావస్కర్ స్పందిస్తూ.. మధ్యలో కోహ్లి భార్య అనుష్క శర్మను కూడా లాగారు. ‘లాక్‌డౌన్ సమయంలో విరాట్ కోహ్లి కేవలం అనుష్క శర్మ బంతులపై మాత్రమే శిక్షణ పొందాడు’ అని ద్వందార్థం వచ్చేలా గావస్కర్ కామెంట్ చేశారు. విరుష్క జంటపై గావస్కర్ చేసిన కామెంట్ పట్ల కోహ్లి ఫ్యాన్స్ తీవ్ర విమర్శలు గుప్పిస్తున్నారు. గావస్కర్‌ను కామెంటేటర్‌గా తొలగించాలని డిమాండ్ చేస్తున్నారు.

కొంత మంది మాత్రం లాక్‌డౌన్ సమయంలో కోహ్లి, అనుష్క ముంబైలోని తమ నివాసంలో సరదాగా క్రికెట్ ఆడిన విషయాన్ని గావస్కర్ ప్రస్తావించి ఉంటారంటూ.. సన్నీని వెనకేసుకొస్తున్నారు. కోహ్లి విఫలమైనప్పుడల్లా.. అనుష్క శర్మపై విమర్శలు చేయడం సాధారణంగా మారిందంటూ కొందరు ఆగ్రహం వ్యక్తం చేస్తున్నారు.

పంజాబ్‌తో జరిగిన మ్యాచ్‌లో రాహుల్ 83, 89 పరుగుల వద్ద ఇచ్చిన క్యాచ్‌లను కోహ్లి జారవిడిచాడు. దీంతో చెలరేగిన రాహుల్ 69 బంతుల్లో 132 రన్స్ చేసి... ఐపీఎల్‌లో హయ్యస్ట్ రన్స్ చేసిన భారత క్రికెటర్‌గా నిలిచాడు.