SRH vs KKR: వార్నర్‌ను దాటితేనే కోల్‌కతా విజయం!

Written by : smtv Desk | Sat, Sep 26, 2020, 08:36 PM

కోల్‌కతా నైట్‌రైడర్స్, సన్‌రైజర్స్ హైదరాబాద్ జట్ల మధ్య ఐపీఎల్ 8వ మ్యాచ్ జరుగుతుంది. ఆడిన తొలి మ్యాచ్‌ల్లో ఓడిన ఇరు జట్లూ.. ఈ మ్యాచ్‌లో ఎలాగైనా విజయం సాధించాలనే కసితో బరిలో దిగాయి. కోల్‌కతాపై సన్‌రైజర్స్ కెప్టెన్ డేవిడ్ వార్నర్‌కు అద్భుతమైన బ్యాటింగ్ రికార్డ్ ఉంది. నైట్ రైడర్స్‌పై 21 మ్యాచ్‌లు ఆడిన వార్నర్.. 43.63 యావరేజ్‌.. 147.77 స్ట్రైక్ రేట్‌తో 829 పరుగులు చేశాడు.

గత మ్యాచ్‌లో కోల్‌కతాపై 80 రన్స్ చేసిన రోహిత్ శర్మ మాత్రమే నైట్ రైడర్స్‌పై వార్నర్‌ను దాటేశాడు. ప్రస్తుతం వార్నర్ కంటే హిట్ మ్యాన్ కోల్‌కతాపై 74 పరుగులు ఎక్కువ చేశాడు.

ఐపీఎల్‌లో కోల్‌కతాపై అత్యధిక వ్యక్తిగత స్కోరు చేసిన రికార్డు మాత్రం వార్నర్ పేరిటే ఉంది. 2017 సీజన్లో వార్నర్ కేకేఆర్‌పై 127 రన్స్ చేశాడు. కోల్‌కతాపై ఆరుసార్లు 50+ స్కోర్లు చేసిన వార్నర్.. శిఖర్ ధావన్‌తో కలిసి మూడోస్థానంలో ఉన్నాడు. నైట్ రైడర్స్‌పై సురేశ్ రైనా అత్యధికంగా 9సార్లు 50+ స్కోర్ చేయగా.. రోహిత్ శర్మ ఏడుసార్లు ఈ ఫీట్ సాధించాడు.

కోల్‌కతాపై అత్యధిక సిక్సులు బాదిన ఆటగాళ్ల జాబితాలో వార్నర్ (37) రెండో స్థానంలో ఉన్నాడు. 49 సిక్సర్లతో క్రిస్ గేల్ ప్రథమ స్థానంలో ఉన్నాడు. వార్నర్ ముప్పును ఎదుర్కోవడంలో నైట్ రైడర్స్‌కు కుల్దీప్ యాదవ్ కీలకం కానున్నాడు. నాలుగు మ్యాచ్‌ల్లో కుల్దీప్ రెండుసార్లు వార్నర్‌ను ఔట్ చేశాడు. కుల్దీప్ బౌలింగ్‌లో 37 బంతులను ఎదుర్కొన్న వార్నర్ 53 రన్స్ చేశాడు.

ఈ సీజన్లో కోల్‌కతా తొలి విజయం రుచి చూడటానికి వార్నర్ ప్రధాన అడ్డంకిగా మారే అవకాశం ఉంది. వార్నర్-బెయిర్‌స్టో ఓపెనింగ్ జోడిని విడదీయడంలో ఆసీస్ పేసర్ ప్యాట్ కమిన్స్ ఏ మేర ప్రభావం చూపుతాడో చూడాలి. ఈ మ్యాచ్‌లో ఓపెనర్లతోపాటు మనీష్ పాండే రాణిస్తే.. సన్‌రైజర్స్ గెలిచే అవకాశాలు మెరుగ్గా ఉన్నాయి.